ഭക്ഷണത്തിന് ശേഷം മധുരം കഴിച്ചില്ലെങ്കില് ഒരു സുഖവുമില്ല; എന്തുകൊണ്ടാണെന്ന് അറിയാമോ?
ഭക്ഷണം കഴിച്ചുകഴിഞ്ഞ ഉടന് മിഠായിയോ കേക്കോ ഐസ്ക്രീമോ പോലുള്ള മധുരമുള്ള എന്തെങ്കിലും കഴിക്കാന് തോന്നുന്നത് പലരിലും കണ്ടുവരുന്ന ഒരു ശീലമാണ്. സാധാരണയായി ഭക്ഷണം കഴിഞ്ഞ് ഒന്നുമുതല് മൂന്ന് മണിക്കൂര് വരെയുള്ള സമയത്താണ് ഇത്തരം ആഗ്രഹങ്ങള് കൂടുതലായി ഉണ്ടാകാറുള്ളത്.
'കറന്റ് ന്യൂട്രിയന്റ് റിപ്പോര്ട്ട്സ്' ഉള്പ്പെടെയുള്ള പഠനങ്ങള് വ്യക്തമാക്കുന്നത് പോലെ, രക്തത്തിലെ പഞ്ചസാരയുടെ അളവിലുണ്ടാകുന്ന ഏറ്റക്കുറച്ചിലുകളാണ് ഇത്തരം ആഗ്രഹങ്ങള്ക്ക് പ്രധാനമായും കാരണമാകുന്നത്.
രക്തത്തിലെ പഞ്ചസാരയുടെ അളവ് പെട്ടെന്ന് കൂടുകയും കുറയുകയും ചെയ്യുമ്പോഴാണ് മധുരത്തോടുള്ള ആഗ്രഹം വര്ദ്ധിക്കുന്നത്.
വൈറ്റ് ബ്രെഡ്, മധുരപാനീയങ്ങള്, മറ്റ് മധുരമുള്ള പലഹാരങ്ങള് എന്നിവ രക്തത്തിലെ പഞ്ചസാരയുടെ അളവ് കുത്തനെ ഉയര്ത്താന് ഇടയാക്കും.
തുടര്ന്ന് ഇത് പെട്ടെന്ന് താഴേക്ക് വരുമ്പോള് ശരീരം പെട്ടെന്നുതന്നെ ഊര്ജ്ജം ആവശ്യപ്പെടുകയും, അതിന്റെ ഫലമായി മധുരം കഴിക്കാനുള്ള തീവ്രമായ ചോദന ഉണ്ടാകുകയും ചെയ്യുന്നു.
ഹാര്വാര്ഡ് ന്യൂട്രിഷന് സോഴ്സസ് ചൂണ്ടിക്കാണിക്കുന്നത് പോലെ, നമ്മള് എന്താണ് കഴിക്കുന്നത്, എത്ര അളവിലാണ് കഴിക്കുന്നത് എന്നതൊക്കെ ഇത്തരം തോന്നലുകളെ സ്വാധീനിക്കുന്നുണ്ട്.
ഈ പ്രശ്നം ഒഴിവാക്കാന് ഭക്ഷണത്തില് കൃത്യമായ പോഷക സന്തുലിതാവസ്ഥ നിലനിര്ത്തേണ്ടത് അത്യാവശ്യമാണ്.
ദിവസം മുഴുവനുള്ള ആഹാരത്തില് കൃത്യമായ അളവില് പ്രോട്ടീന് ഉള്പ്പെടുത്തുന്നത് ദഹനപ്രക്രിയയുടെ വേഗത കുറയ്ക്കാനും, കൂടുതല് നേരം വയറു നിറഞ്ഞതായി തോന്നിപ്പിക്കാനും, അമിതമായി മധുരം കഴിക്കാനുള്ള ആഗ്രഹം തടയാനും സഹായിക്കുമെന്ന് ന്യൂട്രിയന്റ്സ് ജേണല് വ്യക്തമാക്കുന്നു.
കൂടാതെ, മോശമായ ഉറക്കവും സമ്മര്ദ്ദവും തലച്ചോറിലെ പ്രവര്ത്തനങ്ങളെ ബാധിച്ച് ഇത്തരം ആഗ്രഹങ്ങള് കൂട്ടിയേക്കാമെന്നും വിദഗ്ദ്ധര് ഓര്മ്മിപ്പിക്കുന്നു.