'മനം മാറിയിട്ടില്ല. മതംമാറ്റമുയര്‍ത്തി വിമര്‍ശനം'. മിഷണറിമാരെ വിമര്‍ശിച്ച് ആര്‍.എസ്.എസ് മുഖപത്രം കേസരിയില്‍ ഹിന്ദുഐക്യവേദി സംസ്ഥാന അദ്ധ്യക്ഷന്റെ ലേഖനം.
തിരുവനന്തപുരം : ക്രൈസ്തവരെയും മിഷണറിമാരെയും അതിരൂക്ഷ വിമര്‍ശനത്തിനിരയാക്കി കൊണ്ടുള്ള ഹിന്ദു ഐക്യവേദി സംസ്ഥാന അദ്ധ്യക്ഷന്‍ ഇ.എസ് ബിജുവിന്റെ ലേഖനം പ്രസിദ്ധീകരിച്ച് ആര്‍.എസ്.എസ് മുഖപത്രം കേസരി.
സംസ്ഥാനത്ത് ക്രൈസ്തവരെ ബി.ജെ.പിയോട് അടുപ്പിക്കാന്‍ കൊണ്ട് പിടിച്ച ശ്രമം നടക്കുന്നതിനിടെയാണ് തങ്ങളുടെ പ്രഖ്യാപിത ലക്ഷ്യത്തില്‍ നിന്നും വ്യതിചലിച്ചിട്ടില്ലെന്ന് വ്യക്തമാക്കി സംഘപരിവാര്‍ ലേഖനവുമായി രംഗത്തെത്തിയിട്ടുള്ളത്. ആഗോള മതപരിവര്‍ത്തനത്തിന്റെ നാള്‍വഴികള്‍ എന്ന ലേഖനത്തിലാണ് ക്രൈസ്തവ മിഷണറിമാരെ രൂക്ഷവിമര്‍ശനത്തിന് ഇരയാക്കുന്നത്.
മിഷണറിമാര്‍ മതം മാറ്റുന്നവരാണെന്നും രാജ്യവിരുദ്ധരായി മാറുന്നുവെന്നുമാണ് വാരികയില്‍ പറയുന്നത്. ക്രൈസ്തവ രാജ്യം സ്ഥാപിക്കാനാണ് ശ്രമം. ഭാഷയിലും സംസ്‌കാരത്തിലും അധിനിവേശമുണ്ടെന്നും ലേഖനം ചൂണ്ടിക്കാട്ടുന്നു. വിഘടനപരമായ ചിന്തയെ വളര്‍ത്തി സായുധ ഭീകരവാദത്തിലേക്ക് ആളുകളെ മിഷണറിമാര്‍ നയിക്കുകയാണ്.
മിസോറാം, ഒഡിഷ, നാഗാലാന്‍ഡ്, അരുണാചല്‍ പ്രദേശ്, ജാര്‍ഖണ്ഡ്, ഛത്തീസ്ഗഡ് സംസ്ഥാനങ്ങളില്‍ സായുധ കലാപത്തിന് മിഷണറിമാര്‍ അതിവിപ്ലവ പ്രസ്ഥാനങ്ങളെ വിലയ്ക്കെടുത്തുവെന്നും ലേഖനത്തില്‍ പറയുന്നു.
മതപരിവര്‍ത്തനത്തിന്റെ നാള്‍വഴികള്‍ ശ്രദ്ധാപൂര്‍വ്വം വീക്ഷിക്കുന്ന ഏതൊരു പൗരനും ആശങ്കപ്പെടുന്ന സ്ഥിതിവിശേഷങ്ങള്‍ 2025ലും തുടരുമ്പോള്‍ ഭൂരിപക്ഷ സമൂഹം ജാഗ്രതയോടെ നിലകൊള്ളേണ്ടത് അനിവാര്യമാണ്.
ഹൈന്ദവ സമൂഹത്തിന്റെ ഉന്നമനത്തിനും ഐക്യത്തിനുമായി പ്രവര്‍ത്തിക്കുന്നവര്‍ മതപരിവര്‍ത്തന ശക്തികള്‍ ഏതുപായം സ്വീകരിച്ചാലും അതിനെ ചെറുത്തു പരാജയപ്പെടുത്തണം. മതപരിവര്‍ത്തനം മതശക്തികളുടെ അവകാശമാണെങ്കില്‍ മതപരിവര്‍ത്തന പ്രതിരോധവും, പരിവര്‍ത്തനവും ഹിന്ദുക്കളുടെയും അവകാശവും കര്‍ത്തവ്യവുമാണ്.
ഇന്നത്തെ വിചിത്രമായ അവസ്ഥ മാറ്റിയേ തീരൂ. അതിന് ഭരണഘടന ഭേദഗതി ചെയ്യേണ്ടി വന്നാല്‍ അതും ചെയ്യണം, രാജ്യത്തെ മുഴുവന്‍ ജനസമൂഹത്തിനും സംരക്ഷണം ഉറപ്പുവരുത്താന്‍ മതപരിവര്‍ത്തനം നിയമം മൂലം നിരോധിക്കണം എന്നതാണ് ഇന്നിന്റെ ആവശ്യമെന്നും ലേഖനത്തില്‍ സമര്‍ത്ഥിക്കുന്നു.
മുമ്പ് ആര്‍.എസ്.എസ് മുഖപത്രമായ ഓര്‍ഗനൈസറില്‍ സീറോ മലബാര്‍ സഭയുടെ സ്വത്ത് സംബന്ധിച്ച പരാമര്‍ശം വലിയ വിവാദങ്ങള്‍ക്ക് വഴിമരുന്നിട്ടിരുന്നു. ലേഖനം വിവാദമായതോടെ ക്രൈസ്തവ സഭാ നേതാക്കള്‍ ഇതിനെതിരെ രംഗത്ത് വന്നിരുന്നു.
കെ.സി.ബി.സി, സി.ബി.സി.ഐ എന്നീ സംഘടനകളും വിമര്‍ശനവുമായി രംഗത്തു വന്നതോടെ ഓര്‍ഗനൈസറിന് ലേഖനം പിന്‍വലിക്കേണ്ടിയും വന്നിരുന്നു. ഇതിന് പിന്നാലെയാണ് കേസരിയില്‍ ക്രൈസ്തവ വിരുദ്ധ ലേഖനം വാരികയില്‍ പ്രസിദ്ധീകരിച്ചിരിക്കുന്നത്.
രാജ്യത്തെ ന്യൂനപക്ഷങ്ങളായ ക്രൈസ്തവരെയും മുസ്ലീം വിഭാഗത്തെയും ശത്രുക്കളായി പ്രഖ്യാപിക്കുന്ന ആര്‍.എസ്.എസ് മുന്‍സര്‍സംഘചാലക്ക് ഗുരുജി ഗോല്‍വാള്‍ക്കറുടെ പുസ്തകമായ വിചാരധാരയില്‍ വ്യക്തമാക്കുന്നതിനെ പിന്തുണച്ചു കൊണ്ടാണ് നിലവിലെ ലേഖനവും പ്രസിദ്ധീകരിക്കപ്പെട്ടിട്ടുള്ളത്.