ഹെലികോപ്റ്റര് പേരന്റിംഗ്: കുട്ടികളെ തളര്ത്തുന്ന അമിത നിയന്ത്രണം
മക്കളുടെ കാര്യത്തില് അതീവ ശ്രദ്ധാലുക്കളായ മാതാപിതാക്കളെയാണ് 'ഹെലികോപ്റ്റര് പേരന്റ്സ്' എന്ന് വിളിക്കുന്നത്.
ഒരു ഹെലികോപ്റ്റര് തലയ്ക്ക് മുകളില് വട്ടമിട്ട് പറക്കുന്നത് പോലെ, എപ്പോഴും മക്കളുടെ കൂടെ നടന്ന് അവരെ നിരീക്ഷിക്കുകയും അവരുടെ എല്ലാ കാര്യങ്ങളിലും ഇടപെടുകയും ചെയ്യുന്ന രീതിയാണിത്.
മക്കളോടുള്ള അമിതമായ സ്നേഹവും ഉത്കണ്ഠയുമാണ് ഇതിന് കാരണമെങ്കിലും, ഇത് പലപ്പോഴും കുട്ടികളുടെ സ്വാഭാവികമായ വളര്ച്ചയെ തടസ്സപ്പെടുത്തുന്നു.
കുട്ടികളുടെ പഠനം, കൂട്ടുകാര്, വികാരങ്ങള് തുടങ്ങി എല്ലാ കാര്യങ്ങളിലും മാതാപിതാക്കള് നേരിട്ട് ഇടപെടുന്ന രീതിയാണിത്. കുട്ടി തനിയെ ഒരു കാര്യം ചെയ്യുന്നതിന് മുന്പേ മാതാപിതാക്കള് അത് ഏറ്റെടുത്ത് നടത്തുന്നു. ഹോംവര്ക്ക് ചെയ്തു കൊടുക്കുക, അധ്യാപകരോട് എപ്പോഴും പരാതി പറയുക, കുട്ടിയുടെ ചെറിയ പരാജയങ്ങളില് പോലും അമിതമായി ആകുലപ്പെടുക എന്നിവ ഇതിന്റെ ലക്ഷണങ്ങളാണ്. ഇത് കുട്ടികള്ക്ക് തനിയെ ഒരു പ്രശ്നം പരിഹരിക്കാനുള്ള കഴിവ് ഇല്ലാതാക്കുന്നു.
ഭയമാണ് ഇതിന്റെ പ്രധാന കാരണം. തന്റെ മക്കള് പരാജയപ്പെടുമോ എന്ന പേടിയും മറ്റുള്ളവര് എന്ത് വിചാരിക്കും എന്ന ചിന്തയും മാതാപിതാക്കളെ ഇതിന് പ്രേരിപ്പിക്കുന്നു.
പലപ്പോഴും മാതാപിതാക്കളുടെ സ്വന്തം കുട്ടിക്കാലത്തെ മോശം അനുഭവങ്ങളോ ഒറ്റപ്പെടലോ അവരെ മക്കളുടെ കാര്യത്തില് കൂടുതല് കടുംപിടുത്തം ഉള്ളവരാക്കി മാറ്റുന്നു.
തന്റെ മക്കള്ക്ക് ഒരു കുറവും വരരുത് എന്ന നിര്ബന്ധം പലപ്പോഴും അമിത നിയന്ത്രണമായി മാറുകയാണ് ചെയ്യുന്നത്.
കുട്ടികളിലുണ്ടാകുന്ന മാറ്റങ്ങള്
എപ്പോഴും മാതാപിതാക്കളുടെ സഹായം ലഭിക്കുന്ന കുട്ടികള്ക്ക് സ്വന്തമായി തീരുമാനങ്ങള് എടുക്കാന് പ്രയാസമായിരിക്കും.
ആത്മവിശ്വാസക്കുറവ്, ചെറിയ കാര്യങ്ങളില് പോലും അമിതമായ പേടി, സങ്കടം വന്നാല് നിയന്ത്രിക്കാന് കഴിയാത്ത അവസ്ഥ എന്നിവ ഇത്തരക്കാരില് കണ്ടുവരാറുണ്ട്.
ജീവിതത്തിലെ വെല്ലുവിളികളെ നേരിടാന് അവര്ക്ക് ധൈര്യമുണ്ടാകില്ല. സ്വാതന്ത്ര്യം ലഭിക്കാത്തത് അവരില് മാനസിക സമ്മര്ദ്ദമുണ്ടാക്കാനും കാരണമാകും.
മാതാപിതാക്കള് ബോധപൂര്വം ചില മാറ്റങ്ങള് വരുത്തിയാല് ഈ സാഹചര്യം മാറ്റിയെടുക്കാം:
കുട്ടികളെ പരാജയപ്പെടാന് അനുവദിക്കുക: ചെറിയ വീഴ്ചകളില് നിന്ന് അവര് സ്വയം പഠിക്കട്ടെ. ഇത് അവരുടെ ആത്മവിശ്വാസം കൂട്ടും.
നിര്ദ്ദേശങ്ങള് മാത്രം നല്കുക: കാര്യങ്ങള് നേരിട്ട് ചെയ്തു കൊടുക്കുന്നതിന് പകരം അത് എങ്ങനെ ചെയ്യണമെന്ന് പറഞ്ഞു കൊടുക്കുക. ''നിനക്ക് ഇത് എങ്ങനെ ചെയ്യാന് പറ്റും?'' എന്ന് അവരോട് ചോദിക്കുക.
സ്വാതന്ത്ര്യം നല്കുക: പ്രായത്തിനനുസരിച്ചുള്ള ചെറിയ ജോലികളും ഉത്തരവാദിത്തങ്ങളും അവരെ ഏല്പ്പിക്കുക.
സ്വന്തം ഉത്കണ്ഠ കുറയ്ക്കുക: മാതാപിതാക്കള് സ്വന്തം മനസ്സിനെ ശാന്തമാക്കാന് ശ്രമിക്കണം. മക്കള് മിടുക്കരാകാന് അവരെ സ്വതന്ത്രമായി വളരാന് അനുവദിക്കണമെന്ന് മനസ്സിലാക്കുക.
കുട്ടികള്ക്ക് സ്നേഹവും സുരക്ഷയും നല്കുക എന്നത് മാതാപിതാക്കളുടെ കടമയാണ്. എന്നാല് അത് അവരുടെ സ്വാതന്ത്ര്യത്തെ തടയുന്ന രീതിയിലാകരുത്.
വീഴുകയും എഴുന്നേല്ക്കുകയും ചെയ്താല് മാത്രമേ ഒരു കുട്ടിക്ക് കരുത്തുള്ള മനുഷ്യനായി വളരാന് കഴിയൂ.
മക്കളെ ചേര്ത്തുപിടിക്കുന്നതിനൊപ്പം തന്നെ അവര്ക്ക് പറക്കാന് സ്വന്തം ചിറകുകള് നല്കുക കൂടി ചെയ്യുമ്പോഴാണ് ശരിയായ രക്ഷാകര്തൃത്വം പൂര്ണ്ണമാകുന്നത്.