സംസ്ഥാനത്ത് ഉഷ്ണതരംഗം തുടരുന്നു; മാസാവസാനത്തോടെ വേനൽ മഴയ്ക്ക് സാധ്യത

ഇടുക്കിയും വയനാടും ഒഴികെയുള്ള 12 ജില്ലകളിൽ കൊടും ചൂടിനെത്തുടർന്ന് യെല്ലോ അലർട്ട് പ്രഖ്യാപിച്ചിരിക്കുകയാണ്. പാലക്കാട് ജില്ലയിൽ താപനില 40 ഡിഗ്രി സെൽഷ്യസ് വരെ ഉയരാൻ സാധ്യതയുണ്ടെന്ന് കാലാവസ്ഥാ നിരീക്ഷണ കേന്ദ്രം മുന്നറിയിപ്പ് നൽകുന്നു. വടക്കൻ കർണാടകത്തിനും മഹാരാഷ്ട്രയ്ക്കും മുകളിൽ രൂപപ്പെട്ട എതിർ ചക്രവാതം കാരണമാണ് അന്തരീക്ഷം രാത്രിയിൽ പോലും തണുക്കാതിരിക്കാനും മഴമേഘങ്ങളുടെ രൂപീകരണത്തിന് തടസ്സമുണ്ടാകാനും ഇടയാക്കിയത്. എന്നാൽ ഈ പ്രതിഭാസം ഇന്ന് ദുർബലമാകുന്നതോടെ നാളെ മുതൽ ചൂടിന് അല്പം ആശ്വാസമുണ്ടാകുമെന്നും, ഉച്ചയ്ക്ക് ശേഷമുള്ള മഴയ്ക്ക് സാധ്യത തെളിയുമെന്നുമാണ് പ്രതീക്ഷിക്കുന്നത്. ഏപ്രിൽ അവസാന വാരത്തോടെ വേനൽമഴ ശക്തമാകുന്നതോടെ നിലവിലെ കഠിനമായ ചൂടിന് ഗണ്യമായ കുറവുണ്ടാകും.