കല്യാണ വിരുന്നില്‍ ഒരു ചിക്കന്‍ പീസ് അധികമായി ചോദിച്ചു. പിന്നാലെ കൂട്ടത്തല്ല്. 15കാരന് ദാരുണാന്ത്യം
ഉത്തര്‍ പ്രദേശ്: കല്യാണ വിരുന്നില്‍ ഒരു ചിക്കന്‍ പീസ് അധികമായി ചോദിച്ചതിന് പിന്നാലെയുണ്ടായ കൂട്ടത്തല്ലില്‍ 15കാരന് ദാരുണാന്ത്യം. ഉത്തര്‍ പ്രദേശിലെ കനൗജിലാണ് സംഭവം.
ഒരു ചിക്കന്‍ കാല്‍ അധികമായി ചോദിച്ച മുത്തച്ഛനെ പിന്തുണച്ച് സംസാരിച്ചതിന് പിന്നാലെയാണ് 15കാരനെ അതിക്രൂരമായി മര്‍ദ്ദിച്ച് കൊലപ്പെടുത്തിയത്. വെള്ളിയാഴ്ച രാത്രിയാണ് സംഭവം. വിവാഹ ചടങ്ങുകളുടെ ഭാഗമായ വിരുന്നില്‍ 15കാരനൊപ്പമുണ്ടായിരുന്ന 65കാരനായ മുത്തച്ഛന്‍ ഒരു ചിക്കന്‍ പീസ് അധികമായി ചോദിച്ചതിന് പിന്നാലെയാണ് പ്രശ്‌നങ്ങള്‍ തുടങ്ങിയത്.
65കാരനെ വിരുന്ന് നടത്തിയവര്‍ വലിയ രീതിയില്‍ പരിഹസിക്കാനും പൊതുജന മധ്യത്തില്‍ അപമാനിക്കാനും ശ്രമിച്ചതിനെ 15കാരന് ചോദ്യം ചെയ്തിരുന്നു.
ഇതിന് പിന്നാലെയാണ് 15കാരനെ അക്രമി സംഘം കട്ട കൊണ്ട് ആക്രമിച്ച് കൊന്നത്. നെഞ്ചിലും പുറത്തും കട്ട കൊണ്ടുള്ള ഇടിയേറ്റാണ് 15കാരന് കൊല്ലപ്പെട്ടത്.
പരിക്കേറ്റ് തളര്‍ന്ന് വീണ 15കാരനെ ആശുപത്രിയിലെത്തിച്ചെങ്കിലും ജീവന്‍ രക്ഷിക്കാനായില്ല.