ഹൈറ്റി: തട്ടിക്കൊണ്ടുപോകപ്പെട്ട മിഷനറിയും മൂന്ന് വയസ്സുള്ള ഒരു കുട്ടിയുമുള്‍പ്പെടെ എട്ട് പേര്‍ സ്വതന്ത്രരാക്കപ്പെട്ടു
ഹൈറ്റി: തട്ടിക്കൊണ്ടുപോകപ്പെട്ട മിഷനറിയും മൂന്ന് വയസ്സുള്ള ഒരു കുട്ടിയുമുള്‍പ്പെടെ എട്ട് പേര്‍ സ്വതന്ത്രരാക്കപ്പെട്ടു
1993 മുതല്‍ ഹൈറ്റിയില്‍ സേവനമനുഷ്ഠിച്ചുപോന്നിരുന്ന ജെന ഹെരാറ്റി എന്ന ഐറിഷ് മിഷനറിയും, സെന്റ് ഹെലേന അനാഥാലയത്തിലെ മൂന്ന് വയസ്സുള്ള ഒരു കുട്ടിയുള്‍പ്പെടെ ഏഴ് പേരും ഏതാണ്ട് ഒരു മാസം നീണ്ട തടവിന് ശേഷം സ്വതന്ത്രരാക്കപ്പെട്ടു.
പ്രസ്തുത അനാഥാലയത്തിന്റെ ഡയറക്ടറായി സേവനമനുഷ്ഠിച്ചുവരികയായിരുന്നു ജെന ഹെരാറ്റി. ഓഗസ്റ്റ് മൂന്നാം തീയതിയാണ് അക്രമികള്‍ ഈ എട്ടുപേരെയും തട്ടിക്കൊണ്ടുപോയത്.
ചുറ്റുമതില്‍ തകര്‍ത്ത് അകത്തുകയറിയ തോക്കുധാരികള്‍ അനാഥാലയത്തിനുള്ളില്‍ പ്രവേശിച്ച് ഡയറക്ടറേയും പ്രവര്‍ത്തകരെയും തട്ടിക്കൊണ്ടുപോവുകയായിരുന്നു. ഇതിന് മുന്‍പും ഇതേ സ്ഥാപനം പലവട്ടം അവര്‍ത്തിക്കപ്പെട്ടിട്ടുണ്ട്.
ഹൈറ്റിയുടെ തലസ്ഥാനമായ പോര്‍ട്ട് ഓ പ്രന്‍സിന് അടുത്തുള്ള സെന്റ് ഹെലേന അനാഥാലയത്തില്‍ ഏതാണ്ട് ഇരുനൂറിലധികം അനാഥരെയാണ് ശ്രീമതി ഹെരാറ്റിയുടെ കീഴിലുള്ള പ്രവര്‍ത്തകര്‍ സംരക്ഷിച്ചുപോന്നിരുന്നത്.
'കൊച്ചുസഹോദരീസഹോദരന്മാരുടെ അന്താരാഷ്ട്രസംഘടന' എന്ന മാതൃസംഘടനയുടെ കീഴിലാണ് അനാഥാലയം പ്രവര്‍ത്തിച്ചുവന്നിരുന്നത്.
തട്ടിക്കൊണ്ടുപോകപ്പെട്ട എട്ട് പേരും സ്വാതന്ത്രരാക്കപ്പെട്ടുവെന്ന വാര്‍ത്ത സ്ഥിരീകരിച്ച അയര്‍ലണ്ട് ഉപപ്രധാനമന്ത്രി സൈമണ്‍ ഹാരിസ്, എല്ലാവരും ആരോഗ്യത്തോടെയാണിരിക്കുന്നതെന്ന് വ്യക്തമാക്കി. തട്ടിക്കൊണ്ടുപോയ എട്ടുപേരെയും സ്വാതന്ത്രരാക്കുന്നതിനായുള്ള ശ്രമങ്ങള്‍ ഏകോപിപ്പിച്ച അയര്‍ലണ്ട് വിദേശകാര്യമന്ത്രാലയത്തിന് ഹെരാറ്റിയുടെ കുടുംബം നന്ദി പറഞ്ഞു.
സായുധസംഘര്‍ഷങ്ങളും ആഭ്യന്തരപ്രശ്‌നങ്ങളും നിലനില്‍ക്കുന്ന ഹൈറ്റിയില്‍ ആളുകളെ തട്ടിക്കൊണ്ടുപോകുന്നത് പതിവായി വരികയാണ് അടുത്ത വര്‍ഷങ്ങളില്‍ നടന്ന ഏറ്റവും വലിയ തട്ടിക്കൊണ്ടുപോക്ക് 2021-ലാണ് നടന്നത്.
അന്ന് അഞ്ച് കുട്ടികളെയും പതിനേഴ് മിഷനറിമാരെയും അക്രമികള്‍ പിടിച്ചുകൊണ്ടുപോയിരുന്നു. ഇവരില്‍ പലരും മൂന്ന് മാസങ്ങള്‍ക്ക് ശേഷമാണ് സ്വാതന്ത്രരായത്.
2025-ന്റെ ആദ്യ ആറ് മാസത്തില്‍ ഈ കരീബിയന്‍ രാജ്യത്ത് 3000-ത്തിലധികം ആളുകള്‍ കൊല്ലപ്പെട്ടുവെന്നും 336 പേര്‍ തട്ടിക്കൊണ്ടുപോകപ്പെട്ടുവെന്നും ഐക്യരാഷ്ട്രസഭ അറിയിച്ചു.