റസ്റ്റോറന്റ് ബില്ലില് 'ഗ്യാസ് ചാര്ജ്'; 10% അധിക തുക കണ്ട ഞെട്ടി ഉപഭോക്താവ്, ബില്ലിന്റെ ചിത്രം പുറത്തുവന്നതോടെ നിരവധി പേരാണ് സോഷ്യല് മീഡിയയില് പ്രതികരിച്ചത്
രാജസ്ഥാന്: റസ്റ്റോറന്റില് ഭക്ഷണം കഴിച്ച ശേഷം ലഭിച്ച ബില്ലില് സാധാരണ നികുതികള്ക്കൊപ്പം 'ഗ്യാസ് ചാര്ജ്' കൂടി ഉള്പ്പെടുത്തിയതോടെ സംഭവം സോഷ്യല് മീഡിയയില് ചര്ച്ചയാകുന്നു. രാജസ്ഥാനിലെ ജുഞ്ജുനുവിലെ ഒരു റസ്റ്റോറന്റില് നിന്നുള്ള ബില്ലാണ് ഇപ്പോള് വൈറലാകുന്നത്.
സെപ്റ്റംബര് 13ന് X ഉപയോക്താവ് @ChanakyaSpeaksX ആണ് ബില്ലിന്റെ ചിത്രം പങ്കുവെച്ചത്. കുടുംബത്തോടൊപ്പം ഉച്ചഭക്ഷണത്തിനായി റസ്റ്റോറന്റിലെത്തിയ തങ്ങള് ആകെ 10 വിഭവങ്ങള് ഓര്ഡര് ചെയ്തിരുന്നുവെന്ന് പോസ്റ്റില് പറയുന്നു.
ഭക്ഷണത്തിന്റെ അടിസ്ഥാന തുക 1,250 രൂപയായിരുന്നു. ഇതിന് പുറമെ 2.5 ശതമാനം SGST ആയി 30.75 രൂപയും 2.5 ശതമാനം CGST ആയി 30.75 രൂപയും ബില്ലില് ചേര്ത്തിരുന്നു. എന്നാല് പിന്നീട് ശ്രദ്ധയില്പ്പെട്ടത് 10 ശതമാനം 'Gas' എന്ന പേരിലുള്ള പ്രത്യേക ചാര്ജാണ്.
1,250 രൂപയുടെ 10 ശതമാനം കണക്കാക്കിയാല് 125 രൂപ വരുമെന്നിരിക്കെ, GST ഉള്പ്പെടുത്തിയ 1,310 രൂപയുടെ അടിസ്ഥാനത്തിലാണ് 10 ശതമാനം ഗ്യാസ് ചാര്ജ് കണക്കാക്കിയതെന്നാണ് ഉപഭോക്താവിന്റെ ആരോപണം. ഇതോടെ ആകെ തുക 1,443 രൂപയായി.
ബില്ലിന്റെ ചിത്രം പുറത്തുവന്നതോടെ നിരവധി പേരാണ് സോഷ്യല് മീഡിയയില് പ്രതികരിച്ചത്. 'ഗ്യാസ് ചാര്ജ്' എന്ന പേരില് പ്രത്യേകമായി തുക ഈടാക്കുന്നത് ആദ്യമായാണ് കാണുന്നതെന്നും പരാതി നല്കണമെന്നും ചിലര് അഭിപ്രായപ്പെട്ടു. റസ്റ്റോറന്റുകളില് പാചകത്തിനായി ഉപയോഗിക്കുന്ന ഗ്യാസിന്റെ ചെലവ് ഉപഭോക്താക്കളില് നിന്ന് ഇത്തരത്തില് പ്രത്യേകമായി ഈടാക്കുന്നത് എന്തുകൊണ്ടാണെന്നും ചിലര് ചോദിച്ചു.
അതേസമയം, ബില്ലിലെ ഈടാക്കല് നിയമപരമാണോ എന്നതിനെക്കുറിച്ചുള്ള വ്യക്തമായ ഔദ്യോഗിക വിശദീകരണം പുറത്തുവന്നിട്ടില്ല. സോഷ്യല് മീഡിയയിലെ പ്രതികരണങ്ങളില് പലരും ഇത് ഉപഭോക്താക്കളില് നിന്ന് അധിക തുക ഈടാക്കാനുള്ള രീതിയാണെന്ന വിമര്ശനവും ഉന്നയിക്കുന്നുണ്ട്.
സംഭവത്തെക്കുറിച്ചുള്ള ഔദ്യോഗിക പ്രതികരണം ലഭ്യമായിട്ടില്ല. വൈറലായ ബില്ലിന്റെ പശ്ചാത്തലത്തില് റസ്റ്റോറന്റ് ബില്ലുകളില് ഈടാക്കുന്ന അധിക ചാര്ജുകളെക്കുറിച്ചും ഉപഭോക്താക്കള്ക്കിടയില് ചര്ച്ച സജീവമായിരിക്കുകയാണ്.