ഫാ. ജോർജ് കാവുക്കാട്ടിനെ 'മാനവത ഫൗണ്ടേഷൻ' സന്ത് ഗാഡ്‌ഗെ ബാബ പുരസ്കാരം നൽകി ആദരിക്കുന്നു

കഴിഞ്ഞ നാലു പതിറ്റാണ്ടിലേറെയായി മഹാരാഷ്ട്രയിലെ പിന്നാക്ക മേഖലകളിൽ സ്തുത്യർഹമായ സേവനമനുഷ്ഠിക്കുന്ന ഫാ. ജോർജ് കാവുക്കാട്ടിനെ 'മാനവത ഫൗണ്ടേഷൻ' സന്ത് ഗാഡ്‌ഗെ ബാബ പുരസ്കാരം നൽകി ആദരിക്കുന്നു. താനെ ജില്ലയിലെ ഷഹപുരിലെ ആദിവാസി മേഖലകളിലെ പാർശ്വവൽക്കരിക്കപ്പെട്ട ജനതയുടെ ഉന്നമനത്തിനായി ജീവിതം സമർപ്പിച്ച ഈ വൈദികന് ലഭിക്കുന്ന ഈ അംഗീകാരം, അവിടുത്തെ നാട്ടുകാർ നൽകുന്ന സ്‌നേഹോപഹാരമായാണ് കണക്കാക്കപ്പെടുന്നത്. നിലവിൽ കർണാടകയിലെ കാർക്കളയിൽ വിശ്രമജീവിതം നയിക്കുന്ന 77 വയസ്സുകാരനായ ഫാ. ജോർജ് കാവുക്കാട്ടിനെ തേടിയാണ് ഈ ആദരവ് എത്തിയത്. നാളെ രാവിലെ 10 മണിക്ക് മുംബൈ ടിറ്റ്‌വാല സായിബാബ മന്ദിർ ഹാളിൽ വെച്ച് നടക്കുന്ന ചടങ്ങിൽ അദ്ദേഹം പുരസ്കാരം ഏറ്റുവാങ്ങും.