നമ്മള്‍ പരാജയപ്പെട്ടാലും, ദൈവത്തിന് പരാജയമില്ലായെന്നതാണ് പ്രത്യാശ: ലെയോ പാപ്പ
വത്തിക്കാന്‍ സിറ്റി: നമ്മള്‍ പരാജയപ്പെട്ടാലും, ദൈവം ഒരിക്കലും പരാജയപ്പെടില്ലായെന്ന് അറിയുന്നതാണ് പ്രത്യാശയെന്ന് ലെയോ പതിനാലാമന്‍ പാപ്പ. ഇന്നലെ പോള്‍ ആറാമന്‍ ഹാളില്‍ നടത്തിയ പ്രതിവാര പൊതുകൂടിക്കാഴ്ചയില്‍ നടത്തിയ പ്രഭാഷണത്തിലാണ് പാപ്പ ഇക്കാര്യം പറഞ്ഞത്.
നമ്മള്‍ ഒറ്റിക്കൊടുത്താലും, അവിടുന്ന് ഒരിക്കലും നമ്മെ സ്‌നേഹിക്കുന്നതിന് വിരാമമിടുന്നില്ല. എളിയതും മുറിവേറ്റതും എന്നാല്‍ എല്ലായ്‌പ്പോഴും വിശ്വസ്തവുമായ ഈ സ്‌നേഹത്താല്‍ സ്പര്‍ശിതരാകാന്‍ നാം നമ്മെത്തന്നെ അനുവദിച്ചാല്‍ നമുക്ക് യഥാര്‍ത്ഥത്തില്‍ പുനര്‍ജനിക്കാന്‍ കഴിയും. അപ്പോള്‍ നമ്മള്‍, ഒറ്റുകാരായിട്ടല്ല, എപ്പോഴും സ്‌നേഹിക്കപ്പെടുന്ന മക്കളായി ജീവിക്കാന്‍ തുടങ്ങുമെന്നും പാപ്പ പറഞ്ഞു.
നമ്മള്‍ വിധിക്കാന്‍ ശീലിച്ചവരാണ്. എന്നാല്‍, ദൈവമാകട്ടെ, സഹനം സ്വീകരിക്കുന്നു. തിന്മ കാണുമ്പോള്‍ അവിടുന്ന് പ്രതികാരം ചെയ്യുന്നില്ല, മറിച്ച് വേദനിക്കുന്നു.
നമ്മെ സൃഷ്ടിച്ച സ്‌നേഹത്തെ നാം നിഷേധിക്കുകയാണെങ്കില്‍, ഒറ്റിക്കൊടുക്കുന്നതിലൂടെ നാം നമ്മോട് തന്നെ അവിശ്വസ്തരായി തീരുകയാണെങ്കില്‍, ലോകത്തില്‍ ജനിച്ചതിന്റെ പൊരുള്‍ നമുക്ക് യഥാര്‍ത്ഥത്തില്‍ നഷ്ടപ്പെടുകയും രക്ഷയില്‍ നിന്ന് നാം സ്വയം ഒഴിവാക്കുകയും ചെയ്യുന്നു. നമ്മുടെ പരിമിതികള്‍ നാം തിരിച്ചറിഞ്ഞാല്‍, ക്രിസ്തുവിന്റെ വേദനയാല്‍ സ്പര്‍ശിക്കപ്പെടാന്‍ നാം അനുവദിച്ചാല്‍, ഒടുവില്‍ നമുക്ക് വീണ്ടും ജനിക്കാന്‍ കഴിയും.
വിശ്വാസം പാപ സാദ്ധ്യതയില്‍ നിന്ന് നമ്മെ ഒഴിവാക്കുന്നില്ല, എന്നാല്‍ അതില്‍നിന്ന് പുറത്തുകടക്കാനുള്ള ഒരു വഴി എല്ലായ്‌പ്പോഴും നമുക്ക് പ്രദാനം ചെയ്യുന്നു: അത് കരുണയുടെ പാതയാണ്.
അവന്‍ തന്റെ പ്രിയപ്പെട്ടവരുമൊത്ത് ഭക്ഷണമേശയ്ക്കരികില്‍ ഇരിക്കുന്നു. തന്നെ ഒറ്റിക്കൊടുക്കുന്നവനു വേണ്ടിപ്പോലും അപ്പം മുറിക്കാന്‍ അവന്‍ മടിക്കുന്നില്ല. ഇതാണ് ദൈവത്തിന്റെ നിശബ്ദ ശക്തി:
താന്‍ ഒറ്റപ്പെടുത്തപ്പെടുമെന്ന് അറിയുമ്പോള്‍ പോലും അവന്‍ ഒരിക്കലും സ്‌നേഹത്തിന്റെ മേശ ഉപേക്ഷിക്കുന്നില്ലായെന്നും പാപ്പ സന്ദേശത്തില്‍ ഓര്‍മ്മിപ്പിച്ചു.