ഈജിപ്തിൽ ക്രൈസ്തവ ആശ്രമത്തിന് നേരെ അധികൃതരുടെ നടപടി

ഈജിപ്തിൽ ക്രൈസ്തവ ആശ്രമത്തിന് നേരെ അധികൃതരുടെ നടപടി. ഈജിപ്ത് ഗവൺമെന്റ് വിഭാവനം ചെയ്ത പുതിയ ഹൈവേ നിർമ്മാണത്തിനായി ഫയൂമിലെ പുരാതനമായ ദേർ അൽ-മലക് ആശ്രമത്തിന്റെ മതിൽ പൊളിക്കാനുള്ള നീക്കമാണ് സംഘർഷത്തിന് കാരണമായത്.

വികസനത്തിന്റെ പേരിൽ തങ്ങളുടെ പുണ്യഭൂമി വിട്ടുനൽകില്ലെന്ന് പറഞ്ഞ സന്യാസികൾ ബുൾഡോസറുകൾക്ക് മുന്നിൽ കിടന്ന് പ്രതിഷേധിച്ചു. ആശ്രമത്തിന്റെ നിയമസാധുതയെ അധികാരികൾ ചോദ്യം ചെയ്യുമ്പോൾ, നൂറ്റാണ്ടുകളുടെ വിശ്വാസ പാരമ്പര്യമാണ് തങ്ങൾക്കുള്ളതെന്ന് സഭാ നേതൃത്വം പറഞ്ഞു. ഈജിപ്തിലെ ക്രൈസ്തവ ന്യൂനപക്ഷങ്ങളുടെ മതസ്വാതന്ത്ര്യവും സർക്കാർ അധികാരവും തമ്മിലുള്ള വലിയൊരു പോരാട്ടമായി ഈ സംഭവം മാറിയിരിക്കുകയാണ്. നിലവിൽ ചർച്ചകൾ നടക്കുന്നുണ്ടെങ്കിലും ആശ്രമത്തിന്റെ ഭാവി ഇപ്പോഴും അനിശ്ചിതത്വത്തിലാണ്. 

സന്യാസികൾക്ക് നേരെ സുരക്ഷാ സേന ബലപ്രയോഗം നടത്തിയതായും ചിലർക്ക് പരിക്കേറ്റതായും റിപ്പോർട്ടുകളുണ്ട്. ഇതിന്റെ ദൃശ്യങ്ങൾ സമൂഹമാധ്യമങ്ങളിൽ പ്രചരിക്കുന്നത് വലിയ പ്രതിഷേധത്തിന് കാരണമായിട്ടുണ്ട്. മൂന്നാം നൂറ്റാണ്ട് മുതൽ നിലനിൽക്കുന്ന ക്രൈസ്തവ സന്യാസ പാരമ്പര്യത്തിന്റെ കേന്ദ്രങ്ങളിലൊന്നാണ് ഈജിപ്ത്. ഫയൂമിലെ ഈ ആശ്രമം പ്രദേശത്തെ വിശ്വാസികളുടെ പ്രധാന ആത്മീയ കേന്ദ്രം കൂടിയാണ്. നിലവിൽ പ്രദേശത്ത് വലിയ രീതിയിലുള്ള പോലീസ് കാവൽ ഏർപ്പെടുത്തിയിട്ടുണ്ട്. അന്താരാഷ്ട്ര സമൂഹവും മനുഷ്യാവകാശ സംഘടനകളും സംഭവത്തിൽ ആശങ്ക രേഖപ്പെടുത്തിയിട്ടുണ്ട്.