ഓണപ്പരീക്ഷയില്‍ മിനിമം മാര്‍ക്ക് നേടാത്തവര്‍ക്ക് പഠനപിന്തുണ: മാര്‍ഗനിര്‍ദേശം പുറത്തിറങ്ങി
തിരുവനന്തപുരം:ഓണപ്പരീക്ഷയില്‍ 30% മിനിമം മാര്‍ക്ക് നേടാത്ത വിദ്യാര്‍ത്ഥികള്‍ക്കായി പഠനപിന്തുണ പരിപാടി നടപ്പാക്കുന്നതിനുള്ള മാര്‍ഗനിര്‍ദേശങ്ങള്‍ പൊതുവിദ്യാഭ്യാസ വകുപ്പ് പുറത്തിറക്കി. 5 മുതല്‍ 9 വരെ ക്ലാസുകളില്‍ മിനിമം മാര്‍ക്ക് നേടാത്ത വിദ്യാര്‍ത്ഥികള്‍ക്ക് ആയാണ് ഈ പഠനപിന്തുണ പരുപാടി.
ഓണാവധിക്ക് ശേഷം 9-ന് പരീക്ഷാഫലം പ്രസിദ്ധീകരിക്കും. തുടര്‍ന്നുള്ള രണ്ട് ദിവസങ്ങള്‍ക്കുള്ളില്‍ സ്‌കൂളുകളില്‍ ഫല വിശകലനം നടത്തി പഠനപിന്തുണ പരിപാടി ആസൂത്രണം ചെയ്യണം. മിനിമം മാര്‍ക്ക് നേടാത്ത വിദ്യാര്‍ത്ഥികളുടെ രക്ഷിതാക്കളുടെ യോഗം 12-ന് സ്‌കൂളുകളില്‍ വിളിക്കണം. തുടര്‍ന്ന് 26 വരെയാണ് പഠനപിന്തുണ പരിപാടി നടത്തേണ്ടത്. അധ്യാപകര്‍ തന്നെ ഫലപ്രാപ്തി വിലയിരുത്തണം.
പരിപാടിയുടെ പുരോഗതി ഉറപ്പാക്കാന്‍ ഉന്നത ഉദ്യോഗസ്ഥരെ മേല്‍നോട്ടത്തിനായി നിയോഗിച്ചിട്ടുണ്ട്. ജില്ലാതല അവലോകന റിപ്പോര്‍ട്ട് ഡിഡിഇമാര്‍ പൊതുവിദ്യാഭ്യാസ ഡയറക്ടര്‍ക്കു സമര്‍പ്പിക്കണം.