വാഴക്കുലയ്ക്കുള്ളിൽ മയക്കുമരുന്ന് കടത്ത്; മികച്ച കര്‍ഷകനുള്ള അവാര്‍ഡ് പിന്‍വലിക്കാന്‍ നടപടിയുമായി സർക്കാർ,800 ഗ്രാമിലധികം ഹാഷിഷ് ഓയിലും 8 ഗ്രാം എം.ഡി.എം.എയുമായി പൊലീസിന്റെ പിടിയിലായിരുന്നു
തൃശൂർ: വാഴക്കുലകൾക്കുള്ളിൽ മയക്കുമരുന്ന് കള്ളക്കടത്ത് നടത്തിയെന്ന കേസിൽ അറസ്റ്റിലായ ധനേഷ് എസ്. നായർക്ക് നൽകിയ മികച്ച കർഷകനുള്ള അവാർഡ് പിൻവലിക്കാൻ സർക്കാർ നടപടി സ്വീകരിച്ചുവരുന്നതായി കൃഷി മന്ത്രി അറിയിച്ചു.
ആലപ്പുഴ ഹരിപ്പാട് സ്വദേശിയായ ധനേഷ് എസ്. നായർ ആലുവയിലെ ഒരു ലോഡ്ജിൽ നിന്ന് 800 ഗ്രാമിലധികം ഹാഷിഷ് ഓയിലും 8 ഗ്രാം എം.ഡി.എം.എയുമായി പൊലീസിന്റെ പിടിയിലായിരുന്നു.
അവാർഡ് ജേതാവായ കർഷകന് മയക്കുമരുന്ന് കള്ളക്കടത്തിൽ പങ്കുണ്ടെന്ന ആരോപണത്തെക്കുറിച്ച് സമഗ്രമായി അന്വേഷിച്ച് റിപ്പോർട്ട് സമർപ്പിക്കാൻ കൃഷി ഡയറക്ടർക്ക് നിർദ്ദേശം നൽകിയിട്ടുണ്ടെന്നും അതിന്റെ അടിസ്ഥാനത്തിൽ അവാർഡ് പിൻവലിക്കുന്നത് ഉൾപ്പെടെയുള്ള തുടർനടപടികൾ സ്വീകരിക്കുമെന്നും മന്ത്രി വ്യക്തമാക്കി.
ഒരു കർഷകനും ചിന്തിക്കാൻ പോലും കഴിയാത്ത പ്രവൃത്തിയാണ് പ്രതിയുടേത്. കർഷകരുടെ മനസ്സ് മണ്ണിന്റെ ജൈവഗന്ധത്തിലും കഠിനാധ്വാനത്തിലൂടെ അവർ ചൊരിയുന്ന വിയർപ്പിലുമാണ് വേരൂന്നിയതെന്നും, കുറ്റാരോപിതനായ കർഷകൻ ചെയ്തത് മുഴുവൻ കർഷക സമൂഹത്തിനും നേരെയുള്ള അപമാനമാണെന്നും മന്ത്രി കൂട്ടിച്ചേർത്തു. ഇത്തരം സാമൂഹികവിരുദ്ധ പ്രവർത്തനങ്ങൾ ഒരു സാഹചര്യത്തിലും വെച്ചുപൊറുപ്പിക്കില്ലെന്നും സർക്കാർ വ്യക്തമാക്കിയിട്ടുണ്ട്.