ഡോക്ടര്‍ പ്രതിയായ ബലാത്സംഗക്കേസ്; മൊബൈല്‍ ഫോണില്‍ 40ലേറെ സ്വകാര്യ ദൃശ്യങ്ങള്‍, അന്വേഷണം വ്യാപിപ്പിച്ച് പൊലീസ്, ഡോക്ടറുടെ ഫോണില്‍ സ്ത്രീകളുടെ സ്വകാര്യ ദൃശ്യങ്ങള്‍
കൊച്ചി: കൊച്ചിയില്‍ ഡോക്ടര്‍ പ്രതിയായ ബലാത്സംഗക്കേസില്‍ നിര്‍ണായക വിവരങ്ങള്‍ പുറത്ത്. കേസിലെ പ്രതി ജോണ്‍സണ്‍ കെ. വര്‍ഗീസിന്റെ മൊബൈല്‍ ഫോണുകളില്‍ നിന്ന് സ്ത്രീകളുടെ 40ലേറെ സ്വകാര്യ വീഡിയോ ദൃശ്യങ്ങള്‍ പൊലീസ് കണ്ടെത്തി. പിടിച്ചെടുത്ത ഫോണുകള്‍ പരിശോധിച്ചപ്പോഴാണ് ദൃശ്യങ്ങള്‍ ലഭിച്ചത്.
അതേസമയം, ജോണ്‍സണ്‍ കെ. വര്‍ഗീസിനെതിരായ മര്‍ദനം പ്രതികാരത്തിന്റെ ഭാഗമായിരിക്കാമെന്നാണ് പൊലീസിന്റെ നിഗമനം. ബന്ധുവിന് നേരിടേണ്ടിവന്ന പീഡനത്തെ ചോദ്യം ചെയ്തതിനെ തുടര്‍ന്നാകാം യുവ നടി ഉള്‍പ്പെട്ട മര്‍ദനമെന്നും അന്വേഷണസംഘം സംശയിക്കുന്നു.
സംഭവവുമായി ബന്ധപ്പെട്ട് കൂടുതല്‍ വിവരങ്ങള്‍ ശേഖരിച്ചുവരികയാണ് പൊലീസ്. ഒളിവിലുള്ള ജോണ്‍സണ്‍ കെ. വര്‍ഗീസിനായി തെരച്ചില്‍ ഊര്‍ജിതമാക്കിയിട്ടുണ്ട്. പ്രതിയെ കണ്ടെത്താനുള്ള അന്വേഷണം തുടരുകയാണ്.
കേസെടുത്തതിന് പിന്നാലെ ജോണ്‍സണ്‍ ഒളിവില്‍ പോയെന്നാണ് വിവരം. ഇയാളുമായി ബന്ധപ്പെടാന്‍ കഴിയാത്ത സാഹചര്യത്തില്‍ കണ്ടെത്താനുള്ള അന്വേഷണം പൊലീസ് ഊര്‍ജിതമാക്കി. മൊബൈല്‍ ഫോണുകള്‍ സ്വിച്ച് ഓഫ് ചെയ്തതിനാല്‍ കോള്‍ ഡീറ്റെയില്‍ റെക്കോര്‍ഡുകള്‍ വഴി ലൊക്കേഷന്‍ കണ്ടെത്തുന്നതിലും പ്രയാസം നേരിടുന്നുണ്ട്.
പ്രതിയെക്കുറിച്ച് ചില സൂചനകള്‍ ലഭിച്ചിട്ടുണ്ടെന്നാണ് അന്വേഷണസംഘത്തിന്റെ വിലയിരുത്തല്‍. ജോണ്‍സണെ കസ്റ്റഡിയിലെടുത്ത് വിശദമായി ചോദ്യം ചെയ്താല്‍ മാത്രമേ കേസുമായി ബന്ധപ്പെട്ട കൂടുതല്‍ വിവരങ്ങള്‍ പുറത്തുവരൂ. പ്രതിക്കായുള്ള തിരച്ചില്‍ തുടരുകയാണ്.