വി എസ് അനുസ്മരണം, വാരാന്തപ്പതിപ്പ് അച്ചടിച്ചശേഷം വിതരണം വേണ്ടെന്നുവെച്ച് ദേശാഭിമാനി, നടപടിയിൽ ദുരൂഹത

തിരുവനന്തപുരം: സി.പി.എം. മുൻ സംസ്ഥാന സെക്രട്ടറിയും മുൻ മുഖ്യമന്ത്രിയുമായ വി.എസ്. അച്യുതാനന്ദന്റെ ഒന്നാം ചരമവാർഷികത്തോടനുബന്ധിച്ച് പ്രസിദ്ധീകരിക്കാനിരുന്ന പ്രത്യേക ഓർമ്മക്കുറിപ്പ് ഉൾപ്പെട്ട വാരാന്തപ്പതിപ്പ് ദേശാഭിമാനി അവസാന നിമിഷം പിൻവലിച്ചു. വാരാന്തപ്പതിപ്പ് അച്ചടിച്ചുകഴിഞ്ഞ ശേഷമാണ് വിതരണം ചെയ്യേണ്ടതില്ലെന്ന് അധികൃതർ തീരുമാനിച്ചത്.

തുടർച്ചയായി ഞായറാഴ്ചകളിൽ പുറത്തിറങ്ങാറുള്ള വാരാന്തപ്പതിപ്പ് ഇന്നത്തെ പത്രത്തോടൊപ്പം ഉണ്ടായിരുന്നില്ല. വി.എസിന്റെ മുൻ പ്രസ് സെക്രട്ടറിയും ജീവചരിത്രകാരനുമായ കെ.വി. സുധാകരൻ എഴുതിയ ഓർമ്മക്കുറിപ്പാണ് ഈ ലക്കത്തിൽ ഉൾപ്പെടുത്തിയിരുന്നത്. എന്നാൽ, സാങ്കേതിക പിഴവുണ്ടായതിനാലാണ് വാരാന്തപ്പതിപ്പ് പ്രസിദ്ധീകരിക്കാത്തതെന്നാണ് പത്രത്തിൽ നൽകിയിരിക്കുന്ന വിശദീകരണം.

പാർട്ടി പത്രത്തിന്റെ ഔദ്യോഗിക പതിപ്പിൽനിന്നും മുതിർന്ന നേതാവായ വി.എസിന്റെ ഓർമ്മക്കുറിപ്പ് അവസാന നിമിഷം ഒഴിവാക്കിയത് രാഷ്ട്രീയ കേന്ദ്രങ്ങളിലും വലിയ ചർച്ചകൾക്ക് വഴിവെച്ചിട്ടുണ്ട്. സാങ്കേതിക പിഴവാണെന്ന ഔദ്യോഗിക വിശദീകരണമുണ്ടെങ്കിലും, ഈ നടപടിക്ക് പിന്നിൽ മറ്റെന്തെങ്കിലും കാരണങ്ങളുണ്ടോ എന്ന സംശയവും ഉയരുന്നുണ്ട്.