നിതിൻ രാജിന്റെ മരണം, ഡോ. എം കെ റാമിനെ പിടികൂടാൻ അന്വേഷണം ഊർജ്ജിതമാക്കി ക്രൈംബ്രാഞ്ച്, ചിറ്റൂരിൽ പരിശോധന

കണ്ണൂർ: അഞ്ചരക്കണ്ടി ദന്തൽ കോളേജ് വിദ്യാർത്ഥി നിതിൻ രാജിന്റെ മരണവുമായി ബന്ധപ്പെട്ട കേസിൽ, പ്രതിയായ ഡോ. എം.കെ. റാമിനായി അന്വേഷണം ആന്ധ്രാപ്രദേശിലേക്ക് വ്യാപിപ്പിച്ചു. ഡോ. റാം ആന്ധ്രയിലെ ചിറ്റൂരിൽ ഒളിവിൽ കഴിയുന്നുണ്ടെന്ന വിവരത്തെത്തുടർന്ന് ക്രൈംബ്രാഞ്ച് സംഘം അവിടെയെത്തി പരിശോധന ആരംഭിച്ചു. പ്രതിയെ വൈകാതെ പിടികൂടാനാകുമെന്ന ഉറച്ച വിശ്വാസത്തിലാണ് അന്വേഷണ ഉദ്യോഗസ്ഥർ.

ഡോ. റാമിന്റെ മുൻകൂർ ജാമ്യാപേക്ഷ സുപ്രീംകോടതി തള്ളിയിരുന്നു. ഇതിനു പിന്നാലെയാണ് അന്വേഷണം ആന്ധ്രയിലേക്ക് വ്യാപിപ്പിച്ചത്. ജാമ്യാപേക്ഷ പരിഗണിക്കുമ്പോൾ അധ്യാപകനെതിരെ അതിരൂക്ഷമായ പരാമർശങ്ങളാണ് കോടതി നടത്തിയത്. ക്ലാസ് മുറിക്കുള്ളിൽ വെച്ച് വിദ്യാർത്ഥിയെ അധിക്ഷേപിച്ചത് മനുഷ്യത്വരഹിതമായ പ്രവൃത്തിയാണെന്നും, സഹപാഠികൾക്ക് മുന്നിൽ ഇത്തരത്തിൽ അപമാനിക്കപ്പെടുന്ന വിദ്യാർത്ഥിയുടെ മാനസികാവസ്ഥയെക്കുറിച്ച് അധ്യാപകൻ ചിന്തിച്ചിട്ടുണ്ടോയെന്നും കോടതി ചോദിച്ചു. അധ്യാപകർ ഇത്തരം പ്രവൃത്തികളുടെ പ്രത്യാഘാതം തിരിച്ചറിയണമെന്നും കോടതി നിരീക്ഷിച്ചു.

പ്രതിയായ ഡോ. റാം കഴിഞ്ഞ മൂന്ന് മാസമായി ഒളിവിലാണെന്ന് സംസ്ഥാന സർക്കാർ കോടതിയെ അറിയിച്ചിട്ടുണ്ട്. അതേസമയം, നിതിൻ രാജിനെ ജാതിപ്പേര് വിളിച്ച് അധിക്ഷേപിച്ചിട്ടില്ലെന്നും, അക്കാര്യത്തിൽ താൻ പാഠം പഠിച്ചെന്നുമാണ് ഡോ. റാമിന് വേണ്ടി ഹാജരായ അഭിഭാഷകൻ കോടതിയിൽ വാദിച്ചത്.

എങ്കിലും, കോടതിയുടെ നിർണ്ണായകമായ നിരീക്ഷണങ്ങളും ജാമ്യം തള്ളിയ നടപടിയും കേസിൽ അന്വേഷണ സംഘത്തിന് വലിയ കരുത്താണ് നൽകിയിരിക്കുന്നത്. ക്രൈംബ്രാഞ്ച് സംഘം ആന്ധ്രയിൽ തിരച്ചിൽ ശക്തമാക്കിയതോടെ, പ്രതി ഉടൻ പിടിയിലാകുമെന്നാണ് സൂചന.