യേശുവിന്റെ തിരുഹൃദയത്തിന് രാജ്യത്തെ സമര്‍പ്പിച്ച് ക്രൊയേഷ്യന്‍ ബിഷപ്പുമാര്‍
സാഗ്രെബ്: യൂറോപ്യന്‍ രാജ്യമായ ക്രൊയേഷ്യയെ യേശുവിന്റെ തിരുഹൃദയത്തിന് സമര്‍പ്പിച്ച് രാജ്യത്തെ ബിഷപ്പുമാര്‍. കഴിഞ്ഞ ജൂണ്‍ 27-ന് പ്രാദേശിക സമയം വൈകുന്നേരം 7 മണിക്ക് ക്രൊയേഷ്യയിലുടനീളമുള്ള ദേവാലയങ്ങളിലും ചാപ്പലുകളിലും തിരുഹൃദയ പ്രതിഷ്ഠ പ്രാര്‍ത്ഥനയും മറ്റു ശുശ്രൂഷകളും നടന്നു.
അഞ്ച് മിനിറ്റ് സമയം പള്ളി മണികള്‍ നീട്ടി മുഴക്കിയാണ് സമര്‍പ്പണ തിരുക്കര്‍മ്മങ്ങള്‍ക്ക് തുടക്കമിട്ടത്. തുടര്‍ന്ന് വിശുദ്ധ കുര്‍ബാന അര്‍പ്പണം നടന്നു. വിശുദ്ധ കുര്‍ബാനയ്ക്ക് ശേഷമാണ് വൈദികര്‍ യേശുവിന്റെ തിരുഹൃദയത്തിന് രാജ്യത്തെ ഭരമേല്‍പ്പിച്ച് പ്രാര്‍ത്ഥന നടത്തിയത്. വിവിധയിടങ്ങളില്‍ മെത്രാന്മാരും സമര്‍പ്പണം നടത്തി.
'ഞങ്ങള്‍, ക്രൊയേഷ്യന്‍ വിശ്വാസികള്‍, അങ്ങയുടെ നന്മയില്‍ ആശ്രയിച്ചുകൊണ്ട്, അങ്ങയുടെ ഏറ്റവും പരിശുദ്ധമായ ഹൃദയം ഒരിക്കല്‍ക്കൂടി ഞങ്ങള്‍ക്കായി തുറക്കാന്‍ അങ്ങയുടെ അടുക്കല്‍ വരുന്നു' എന്ന ആമുഖത്തോടെയാണ് പ്രാര്‍ത്ഥന ആരംഭിച്ചത്.
യേശുവിനെ 'ജ്ഞാനം, സ്‌നേഹം, പിതാവിന്റെ വചനം' എന്നിങ്ങനെ പ്രാര്‍ത്ഥനയില്‍ അഭിസംബോധന ചെയ്യുന്നുണ്ട്. ക്രൊയേഷ്യന്‍ കുടുംബങ്ങള്‍, വൈദികര്‍, സന്യാസ സമൂഹങ്ങള്‍, ഇടവകകള്‍, ദമ്പതികള്‍, കുട്ടികള്‍, യുവജനങ്ങള്‍, രോഗികള്‍, വൃദ്ധര്‍, വിവിധ മേഖലകളിലെ തൊഴിലാളികള്‍ എന്നിവരെ തിരുഹൃദയത്തിന് സമര്‍പ്പിച്ചുകൊണ്ടാണ് സമഗ്രമായ പ്രാര്‍ത്ഥന നടത്തിയത്.
2024 നവംബറില്‍ നടന്ന 69-ാമത് പ്ലീനറി അസംബ്ലിയില്‍ ക്രൊയേഷ്യന്‍ ബിഷപ്പുമാരുടെ സമിതി തിരുഹൃദയത്തോടുള്ള ചരിത്രപരമായ ഭക്തി പുതുക്കാനുള്ള തീരുമാനം എടുത്തിരിന്നു. ഫ്രാന്‍സിസ് പാപ്പ പ്രഖ്യാപിച്ച 2025 ജൂബിലി വര്‍ഷത്തോട് അനുബന്ധിച്ചു തിരുഹൃദയ സമര്‍പ്പണം നടത്തണമെന്ന തീരുമാനമാണ് അവര്‍ കൈക്കൊണ്ടത്.
1900-ല്‍ ഒന്നരലക്ഷത്തിലധികം ക്രൊയേഷ്യക്കാര്‍ തിരുഹൃദയത്തിന് സമര്‍പ്പിച്ച് തിരുഹൃദയത്തോട് പ്രതിജ്ഞയെടുത്ത അസാധാരണമായ ചടങ്ങിന്റെ 125-ാം വാര്‍ഷികം അടയാളപ്പെടുത്തിക്കൊണ്ടായിരിന്നു ഇത്തവണ സമര്‍പ്പണമെന്നതും ശ്രദ്ധേയമാണ്.