സഭയുടെ നയതന്ത്രപ്രവര്ത്തനം ഒരു തൊഴിലല്ല, അജപാലനവിളിയാണ്: ലിയോ പതിനാലാമന് പാപ്പാ
വത്തിക്കാന്:കത്തോലിക്കാസഭയുടെ നയതന്ത്രം അജപാലനപരമായ ഒരു വിളിയാണെന്നും, അത് മറ്റു ജോലികള് പോലെ വെറുമൊരു തൊഴിലല്ലെന്നും ലിയോ പതിനാലാമന് പാപ്പാ.
വ്യക്തികള് തമ്മിലുള്ള വിശ്വാസം നശിക്കുകയും മതിലുകള് ഉയരുകയും ചെയ്യുന്നയിടങ്ങളില് അനുരഞ്ജനത്തിന്റെ വഴി തേടുന്ന സുവിശേഷപ്രവര്ത്തനമാണതെന്നും പാപ്പാ പ്രസ്താവിച്ചു.
പത്രോസിന്റെ പിന്ഗാമികളായ മാര്പാപ്പാമാരുടെ പേരില് നയതന്ത്രശുശ്രൂഷ ചെയ്യാനായി തയ്യാറാകുന്ന വൈദികര്ക്ക് പരിശീലനം നല്കുന്ന പൊന്തിഫിക്കല് എക്ലേസിയാസ്റ്റിക്കല് അക്കാദമിയുടെ മുന്നൂറ്റിയിരുപത്തിയഞ്ചാം സ്ഥാപനവര്ഷികത്തോടനുബന്ധിച്ച് നല്കിയ കത്തിലാണ്, സഭാത്മകമായ നയതന്ത്ര പ്രവര്ത്തനങ്ങളിലുണ്ടാകേണ്ട മൂല്യങ്ങളെക്കുറിച്ച് പാപ്പാ ഉദ്ബോധിപ്പിച്ചത്.
സഭയുടെ നയതന്ത്രം സുവിശേഷത്തില്നിന്നാണ് ഉത്ഭവിക്കുന്നതെന്നും, അത് തന്ത്രങ്ങളില് അടിസ്ഥാനമിട്ടുള്ളതല്ലെന്നും ഓര്മ്മിപ്പിച്ച പരിശുദ്ധ പിതാവ്, ചിന്താപൂര്വ്വമായ കാരുണ്യപ്രവര്ത്തനമാണതെന്ന് ഓര്മ്മപ്പിച്ചു.
വിജയികളെയോ പരാജിതരെയോ സൃഷ്ടിക്കാനല്ല, ആധികാരികമായ ബന്ധങ്ങള് പുനഃസ്ഥാപിക്കാന് വേണ്ടിയാണ് പരിശുദ്ധ സിംഹാസനത്തിന് വേണ്ടി നയതന്ത്രപ്രവര്ത്തനം നടത്തുന്നവര് പരിശ്രമിക്കുന്നതെന്നും പാപ്പാ എഴുതി.
ചെറിയവരെയും, മറ്റുള്ളവരാല് ചെവികൊടുക്കപ്പെടാത്തവരെയും കേള്ക്കേണ്ടതിന്റെ പ്രാധാന്യം ഓര്മ്മിപ്പിച്ച പാപ്പാ, സംസാരിക്കപ്പെടുന്ന ഓരോ വാക്കുകള്ക്കും പിന്നില് ഇത്തരം ശ്രവണമുണ്ടാകണമെന്നും, നയതന്ത്രജ്ഞര് ഐക്യം സൃഷ്ടിക്കുന്നവയാകണമെന്നും ഉദ്ബോധിപ്പിച്ചു.
പാലങ്ങള് പണിയാനായാണ് തന്റെ നയതന്ത്രജ്ഞര് വിളിക്കപ്പെട്ടിരിക്കുന്നവരെന്ന് പ്രസ്താവിച്ച പത്രോസിന്റെ പിന്ഗാമി, മറ്റുള്ളവര്ക്ക് താങ്ങാകുന്ന അദൃശ്യപാലങ്ങളും, നന്മ പരാജയപ്പെടുന്നയിടങ്ങളില് പ്രത്യാശയുടെ പാലങ്ങളും പണിയാനാണ് അവരുടെ വിളിയെന്ന് വിശദീകരിച്ചു.
മരുഭൂമിയുടെ നിശബ്ദതയെ ദൈവവുമായുള്ള ഫലപ്രദമായ സംവാദമാക്കി മാറ്റിയ വിശുദ്ധ അന്തോനീസിനെപ്പോലെ, മറ്റുള്ളവരുമായി കൂടിക്കാഴ്ചകള് നടത്താനും സംവദിക്കാനുമുള്ള ശക്തി പ്രാര്ത്ഥനയില്നിന്ന് നേടുന്ന, ആഴമേറിയ ആത്മീയതയുടെ പുരോഹിതന്മാരാകാന് പരിശുദ്ധ പിതാവ് തന്റെ നയതന്ത്രജ്ഞരോട് ആവശ്യപ്പെട്ടു.
ക്ലെമെന്റ് പതിനൊന്നാം പാപ്പായ്ക്ക് ശേഷം വന്ന പരിശുദ്ധ പിതാക്കന്മാര് അക്കാദമിയുടെ പ്രവര്ത്തനങ്ങളുമായി ബന്ധപ്പെട്ട് നടത്തിയ പ്രവര്ത്തനങ്ങളെ പരാമര്ശിച്ച പാപ്പാ, ഫ്രാന്സിസ് പാപ്പാ, പ്രെദിക്കാത്തെ എവഞ്ചേലിയും വഴി, വത്തിക്കാന് സ്റ്റേറ്റ് സെക്രെട്ടറിയേറ്റിന്റെ ഘടനയ്ക്കുള്ളില് അക്കാദമിയെ സ്ഥിരീകരിച്ചതും, പിന്നീട് 2025 മാര്ച്ച് 25-ന് പുറത്തുവിട്ട 'പത്രോസിന്റെ ശുശ്രൂഷ' എന്ന പേരിലുള്ള രേഖ വഴി, അതിനെ നയതന്ത്രശാസ്ത്രഗവേഷണത്തിനും അക്കാദമിക പരിശീലനത്തിനും വേണ്ടിയുള്ള കേന്ദ്രമായും, പരിശുദ്ധ സിംഹാസനത്തിന്റെ നയതന്ത്രപ്രവര്ത്തനങ്ങള്ക്കുവേണ്ടിയുള്ള ഉപകാരണമായും പ്രസ്താവിച്ചതും തന്റെ കത്തില് പ്രത്യേകം അനുസ്മരിച്ചു.