നൈജീരിയയിലെ ക്രിസ്ത്യാനികളെ ആസൂത്രിതമായി കൊല്ലുന്നു. 18,000 പള്ളികള്‍ കത്തിച്ചു. ആക്രമണത്തിന് പിന്നില്‍ ബൊക്കോഹറാം ഇസ്ലാമിസ്റ്റുളെന്ന് ബില്‍ മഹര്‍
കാലിഫോര്‍ണിയ: നൈജീരിയയില്‍ ക്രൈസ്തവര്‍ക്കു നേരെ നടന്നുകൊണ്ടിരിക്കുന്ന അക്രമങ്ങളെ അപലപിച്ച് അമേരിക്കന്‍ ഹാസ്യനടനും, രാഷ്ട്രീയ നിരൂപകനും, ടെലിവിഷന്‍ അവതാരകനുമായ ബില്‍ മഹര്‍.
സെപ്റ്റംബര്‍ 26നു എച്ച്ബിഓ ചാനലിന്റെ ടോക്ക് ഷോയായ റിയല്‍ ടൈം വിത്ത് ബില്‍ മഹറിലാണ് നൈജീരിയയിലെ ക്രൈസ്തവ വംശഹത്യയെ അപലപിച്ച് താരം രംഗത്ത് വന്നത്.
ഗാസയില്‍ നടക്കുന്നതിനേക്കാള്‍ വളരെ വലിയ ഒരു വംശഹത്യ ശ്രമമാണിതെന്നും ഒരു രാജ്യത്തെ മുഴുവന്‍ ക്രിസ്ത്യന്‍ ജനതയെയും ഇല്ലാതാക്കാന്‍ അവര്‍ അക്ഷരാര്‍ത്ഥത്തില്‍ ശ്രമിക്കുകയാണെന്നും അദ്ദേഹം ചൂണ്ടിക്കാട്ടി.
നൈജീരിയ, ഈ വിഷയം ആളുകളുടെ ശ്രദ്ധയില്‍പ്പെട്ടിട്ടില്ല എന്നത് വളരെ അത്ഭുതകരമാണെന്നു മഹര്‍ പറഞ്ഞു. 'നൈജീരിയയില്‍ എന്താണ് സംഭവിക്കുന്നതെന്ന് നിങ്ങള്‍ക്ക് അറിയില്ലെങ്കില്‍, നിങ്ങളുടെ മാധ്യമ സ്രോതസ്സുകള്‍ മോശമാണ്. നിങ്ങള്‍ ഒരു കുമിളയിലാണ്.
ഞാന്‍ ഒരു ക്രിസ്ത്യാനിയല്ല, പക്ഷേ അവര്‍ നൈജീരിയയിലെ ക്രിസ്ത്യാനികളെ ആസൂത്രിതമായി കൊല്ലുകയാണ്. 2009 മുതല്‍ അവര്‍ ഒരു ലക്ഷത്തിലധികം പേരെ കൊന്നൊടുക്കി.
അവര്‍ 18,000 പള്ളികള്‍ കത്തിച്ചു. ആക്രമണത്തിന് പിന്നില്‍ ബൊക്കോഹറാം ഇസ്ലാമിസ്റ്റുകളാണ്'- അദ്ദേഹം പറഞ്ഞു.
നൈജീരിയയിലെ ക്രൈസ്തവ കൂട്ടക്കൊലയില്‍ അമേരിക്കയില്‍ പൊതുജന പ്രതിഷേധം ഇല്ലാത്തതിനെയും വിഷയത്തില്‍ മുഖ്യധാരാ മാധ്യമങ്ങളുടെ നിസംഗതയും അദ്ദേഹം ചൂണ്ടിക്കാട്ടി.
രാജ്യത്ത് ക്രൈസ്തവ വിരുദ്ധ ആക്രമണത്തിന്റെ അളവ് ഇതിനകം തന്നെ പരമാവധിയിലെത്തിയിട്ടുണ്ടെന്ന് വേള്‍ഡ് വാച്ച് ലിസ്റ്റിനെ ഉദ്ധരിച്ച് അദ്ദേഹം ചൂണ്ടിക്കാട്ടി.
ലോകത്ത് ക്രൈസ്തവര്‍ക്ക് ജീവിക്കാന്‍ ഏറെ വെല്ലുവിളികളുള്ള ഓപ്പണ്‍ ഡോഴ്‌സിന്റെ 2025 വേള്‍ഡ് വാച്ച് ലിസ്റ്റില്‍ ഏഴാം സ്ഥാനത്താണ് നൈജീരിയ. കഴിഞ്ഞ ഒരു വര്‍ഷത്തിനിടെ ലോകമെമ്പാടും വിശ്വാസത്തിനുവേണ്ടി കൊല്ലപ്പെട്ട 4,476 ക്രൈസ്തവരില്‍ 3,100 പേര്‍ (69 ശതമാനം) നൈജീരിയയിലാണ്.