“മക്കൾ തടസമല്ല; സംരക്ഷിക്കപ്പെടേണ്ട ജീവനാണ്” — പ്രൊ ലൈഫ് ഗ്ലോബൽ ഫെലോഷിപ്പ്, കുഞ്ഞുങ്ങളുടെ ജീവൻ കവർന്നെടുക്കുന്ന പ്രവണത ആശങ്കാജനകം

കൊച്ചി:സ്വന്തം താൽപര്യങ്ങളും വ്യക്തിപരമായ സ്വപ്നങ്ങളും സംരക്ഷിക്കുന്നതിനായി കുഞ്ഞുങ്ങളുടെ ജീവൻ പോലും കവർന്നെടുക്കുന്ന തരത്തിലുള്ള സംഭവങ്ങൾ കേരളത്തിൽ റിപ്പോർട്ട് ചെയ്യപ്പെടുന്നത് അതീവ വേദനാജനകവും ആശങ്കാജനകവുമാണെന്ന് പ്രൊ ലൈഫ് ഗ്ലോബൽ ഫെലോഷിപ്പ് അഭിപ്രായപ്പെട്ടു.

പാലക്കാട് മേനോൻപാറയിൽ രണ്ട് പിഞ്ചുകുഞ്ഞുങ്ങളുടെ മരണവുമായി ബന്ധപ്പെട്ട് പുറത്തുവരുന്ന വിവരങ്ങൾ സമൂഹത്തിന്റെ മനസ്സാക്ഷിയെ ഉണർത്തേണ്ടതാണ്. കുട്ടികളുടെ മരണവുമായി ബന്ധപ്പെട്ട് പുറത്തുവരുന്ന ആരോപണങ്ങളും അന്വേഷണത്തിലെ മൊഴികളും നിയമപരമായ നടപടിക്രമങ്ങളിലൂടെ മാത്രമേ അന്തിമമായി വിലയിരുത്താനാകൂ.

“മക്കൾ ഒരിക്കലും മാതാപിതാക്കളുടെ സ്വപ്നങ്ങൾക്കും വ്യക്തിപരമായ താൽപര്യങ്ങൾക്കും തടസമാകരുത്. ഒരു കുഞ്ഞ് ഒരു ഭാരമല്ല; സംരക്ഷിക്കപ്പെടേണ്ട മനുഷ്യജീവനാണ്. സ്വന്തം താൽപര്യങ്ങൾക്കായി കുഞ്ഞുങ്ങളുടെ ജീവൻ പോലും ഇല്ലാതാക്കുന്ന മനോഭാവം സമൂഹത്തിന് വലിയ മുന്നറിയിപ്പാണ്,” പ്രൊ ലൈഫ് ഗ്ലോബൽ ഫെലോഷിപ്പ് ചെയർമാൻ സാബു ജോസ് പറഞ്ഞു.

“മഹനീയ മാതൃത്വം” എന്ന മഹത്തായ സങ്കൽപ്പത്തിന് ഇത്തരം സംഭവങ്ങൾ കളങ്കം ചാർത്തുന്നതാണ്. അമ്മയാകുക എന്നത് ഒരു കുഞ്ഞിന് ജന്മം നൽകുന്നതിൽ മാത്രം ഒതുങ്ങുന്നതല്ല; അവന്റെ സുരക്ഷയും വളർച്ചയും ഭാവിയും ഉറപ്പാക്കാനുള്ള മഹത്തായ ഉത്തരവാദിത്വം കൂടിയാണ്.

മാറിക്കൊണ്ടിരിക്കുന്ന മാസ്മരിക ജീവിതശൈലിയുടെ സ്വാധീനം, ഉപഭോഗകേന്ദ്രിതമായ ചിന്തകൾ, ബന്ധങ്ങളോടുള്ള ഉത്തരവാദിത്വബോധത്തിന്റെ കുറവ്, വികലമായ ചിന്താഗതികൾ എന്നിവയെക്കുറിച്ച് സമൂഹം ഗൗരവമായി ആത്മപരിശോധന നടത്തണം.

ഇത്തരം ദുരന്തങ്ങളുടെ പശ്ചാത്തലത്തിൽ മാനസികാരോഗ്യ സംരക്ഷണത്തിന്റെയും കുടുംബ പിന്തുണയുടെയും യഥാർത്ഥ ആത്മീയ കാഴ്ചപ്പാടിന്റെയും ആവശ്യകത കൂടുതൽ ശക്തമായി ഉയർന്നുവരികയാണ്. മാതാപിതാക്കൾക്ക് കൗൺസിലിംഗ്, മാനസികാരോഗ്യ പിന്തുണ, മാതാപിതൃപരിശീലനം, കുടുംബബന്ധങ്ങൾ ശക്തിപ്പെടുത്തുന്നതിനുള്ള ഇടപെടലുകൾ എന്നിവ ലഭ്യമാക്കണം.

“ജീവൻ സംരക്ഷിക്കുക എന്നത് ജനിക്കാത്ത കുഞ്ഞിന്റെ ജീവൻ സംരക്ഷിക്കുന്നതിൽ മാത്രം ഒതുങ്ങുന്നില്ല; ജനിച്ച ഓരോ കുഞ്ഞിനും സ്നേഹത്തോടെയും സുരക്ഷിതമായും വളരാനുള്ള അവകാശം ഉറപ്പാക്കുന്നതുമാണ്. ‘മക്കൾ തടസമല്ല — അവർ നമ്മുടെ ഉത്തരവാദിത്വവും പ്രതീക്ഷയും ഭാവിയുമാണ്’ എന്ന ബോധം ഓരോ കുടുംബത്തിലും വളർത്തണം,” സാബു ജോസ് പറഞ്ഞു.

ഇത്തരം സംഭവങ്ങൾ ആവർത്തിക്കാതിരിക്കാൻ സർക്കാർ, കുടുംബങ്ങൾ, വിദ്യാഭ്യാസ-ആത്മീയ സ്ഥാപനങ്ങൾ, സാമൂഹിക സംഘടനകൾ എന്നിവർ ഏകോപിച്ച് പ്രവർത്തിക്കണമെന്നും പ്രൊ ലൈഫ് ഗ്ലോബൽ ഫെലോഷിപ്പ് ആവശ്യപ്പെട്ടു.

സാബു ജോസ്.
9446329343.