നൂറ്റാണ്ടുകള്‍ക്ക് ശേഷം പ്രഭു പത്‌നിയ്ക്കു കത്തോലിക്ക വിശ്വാസപ്രകാരം യാത്രാമൊഴി; അനുശോചനമറിയിച്ച് പാപ്പയും
ലണ്ടന്‍: മരണമടഞ്ഞ കത്തോലിക്ക വിശ്വാസിയായിരുന്ന കെന്റിലെ പ്രഭു പത്‌നി കാതറീന്‍ ലൂസി മേരിയുടെ വിയോഗത്തില്‍ പാപ്പയുടെ അനുശോചനം. ഇന്നലെ സെപ്റ്റംബര്‍ 16ന് ലണ്ടനിലെ വെസ്റ്റ്മിന്‍സ്റ്റര്‍ കത്തീഡ്രലില്‍ നടന്ന മൃതസംസ്‌കാര ശുശ്രൂഷകള്‍ക്കിടെയാണ് പാപ്പയുടെ അനുശോചന സന്ദേശം വായിച്ചത്.
പതിനാറാം നൂറ്റാണ്ടിലെ ആംഗ്ലിക്കന്‍ നവീകരണത്തിനു ശേഷം ഇതാദ്യമായാണ് ബ്രിട്ടീഷ് രാജകുടുംബത്തിലെ അംഗത്തിന് കത്തോലിക്കാ വിശ്വാസ പ്രകാരമുള്ള മൃതസംസ്‌കാരം നടത്തിയത്.
ചാള്‍സ് മൂന്നാമന്‍ രാജാവിന് ടെലഗ്രാമിലൂടെ അയച്ച ലെയോ പതിനാലാമന്‍ പാപ്പയുടെ അനുശോചന സന്ദേശം മൃതസംസ്‌കാര ശുശ്രൂഷകള്‍ക്കിടെ വായിക്കുകയായിരിന്നു.
രാജകുടുംബത്തിലെ അംഗങ്ങളോടും പരേതയുടെ ഭര്‍ത്താവ് കെന്റിലെ പ്രഭുവിനോടും മക്കളോടും പാപ്പ തന്റെ സാമീപ്യം അറിയിക്കുകയും പരേതയുടെ ആത്മാവിനെ സ്വര്‍ഗ്ഗീയപിതാവിന്റെ കാരുണ്യത്തിനു സമര്‍പ്പിക്കുകയും ചെയ്തു.
ഔദ്യോഗിക കൃത്യനിര്‍വ്വഹണത്തില്‍ പ്രകടിപ്പിച്ചിട്ടുള്ള അര്‍പ്പണബുദ്ധി, ദുര്‍ബ്ബലരോടുള്ള കരുതല്‍, ക്രിസ്തീയ നന്മയുടെ പൈതൃകം തുടങ്ങിയവ പാപ്പ തന്റെ അനുശോചന സന്ദേശത്തില്‍ അനുസ്മരിച്ചു.
ഇന്നലെ ചൊവ്വാഴ്ച വെസ്റ്റ്മിന്‍സ്റ്റര്‍ കത്തീഡ്രലില്‍ ഉച്ചയ്ക്കായിരുന്നു കത്തോലിക്ക വിശ്വാസ പ്രകാരമുള്ള മൃതസംസ്‌കാര കര്‍മ്മങ്ങള്‍ നടന്നത്.
ചാള്‍സ് രാജാവും കമീല രാജ്ഞിയും മറ്റു രാജകുടുംബാംഗങ്ങളും പങ്കെടുത്തു. പതിനാറാം നൂറ്റാണ്ടിലെ ആംഗ്ലിക്കന്‍ നവീകരണത്തിനു ശേഷം ബ്രിട്ടീഷ് രാജകുടുംബത്തിലെ ഒരു അംഗം കത്തോലിക്ക ആചാരപ്രകാരം സംസ്‌ക്കരിക്കപ്പെട്ടത് ഇതാദ്യമായാണ്.
സെപ്റ്റംബര്‍ നാലിനാണ് 92 വയസ്സുണ്ടായിരിന്ന കാതറിന്‍ ലൂസി മേരി വിടവാങ്ങിയത്. ജന്മം കൊണ്ട് ആംഗ്ലിക്കന്‍ വിശ്വാസിയായിരിന്നു കാതറിന്‍.
1961-ല്‍ ??കെന്റ് പ്രഭുവും ജോര്‍ജ്ജ് അഞ്ചാമന്‍ രാജാവിന്റെ ചെറുമകനുമായ പ്രിന്‍സ് എഡ്വേര്‍ഡ് രാജകുമാരനെ വിവാഹം കഴിച്ചു. 1975-ല്‍, തന്റെ നാലാമത്തെ കുട്ടിയെ ഗര്‍ഭിണിയായിരിക്കെ, പ്രഭുപത്‌നിയ്ക്കു അഞ്ചാംപനി ബാധിച്ചു.
തുടര്‍ന്നു ഗര്‍ഭഛിദ്രം നടത്തി. പിന്നീട് ഗര്‍ഭാവസ്ഥയുടെ 36-ാം ആഴ്ചയില്‍ അവള്‍ക്ക് കുഞ്ഞിനെ നഷ്ടപ്പെട്ടു. രണ്ട് വര്‍ഷം മുമ്പ് നടത്തിയ ഗര്‍ഭഛിദ്രത്തിനുള്ള ശിക്ഷയായാണ് അവള്‍ അതിനെ കണക്കാക്കിയത്.
വ്യക്തിപരമായ സഹനങ്ങളുടെയും അനുഭവങ്ങളുടെയും പശ്ചാത്തലത്തില്‍ നിന്നാണ് പ്രഭുപത്‌നി കത്തോലിക്കാ വിശ്വാസത്തിലേക്കു പരിവര്‍ത്തനം ചെയ്യുന്നത്.