പവര് കട്ട് എന്നുവരെ തുടരുമെന്ന് ഇപ്പോള് പറയാനാവില്ല, എത്രയും വേഗം പരിഹരിക്കുകയാണ് ലക്ഷ്യം: മന്ത്രി സണ്ണി ജോസഫ്
തിരുവനന്തപുരം: സംസ്ഥാനത്തെ വൈദ്യുതി പ്രതിസന്ധിക്ക് പരിഹാരം കാണാന് എല്ലാ വഴികളും പരിശ്രമിച്ചുകൊണ്ടിരിക്കുകയാണെന്ന് വൈദ്യുതി മന്ത്രി സണ്ണി ജോസഫ്. എന്ടിപിസിയില് നിന്ന് ഉയര്ന്ന നിരക്കില് വൈദ്യുതി വാങ്ങാനുള്ള തീരുമാനം പൂര്ണമായും ഉപേക്ഷിച്ചിട്ടില്ലെന്നും വിഷയത്തില് എല്ലാ വശങ്ങളും ചര്ച്ചയിലാണെന്നും മന്ത്രി വ്യക്തമാക്കി.
യൂണിറ്റിന് 30 രൂപ നിരക്കില് പുറത്തുനിന്ന് വൈദ്യുതി വാങ്ങുന്നത് വലിയ സാമ്പത്തിക ബാധ്യത ഉണ്ടാക്കുമെന്ന കാര്യം വ്യക്തമാണ്. അതിനാല് എന്ടിപിസിയില് നിന്ന് വൈദ്യുതി വാങ്ങുന്നതുമായി ബന്ധപ്പെട്ട് മുഖ്യമന്ത്രിയുമായും മന്ത്രിസഭയുമായും കൂടുതല് ചര്ച്ചകള് നടത്തേണ്ടതുണ്ട്. സാമ്പത്തിക സ്രോതസ് കണ്ടെത്തുന്നതും മന്ത്രിസഭയുടെ അനുമതി ലഭിക്കുന്നതും അനുസരിച്ചായിരിക്കും ഈ വിഷയത്തില് അന്തിമ തീരുമാനമെടുക്കുക.
നിലവിലുള്ള വൈദ്യുതി നിയന്ത്രണവും പവര്കട്ടും എന്ന് അവസാനിക്കും എന്ന് കൃത്യമായ തീയതി ഇപ്പോള് പറയാന് സാധിക്കില്ല. എന്നാല് എത്രയും വേഗത്തില് പ്രതിസന്ധി പരിഹരിക്കാനാണ് സര്ക്കാര് ലക്ഷ്യമിടുന്നത്. കേന്ദ്രത്തില് നിന്ന് ലഭിച്ച 250 മെഗാവാട്ടും സ്വാപ്പ് കരാര് വഴിയുള്ള വിഹിതവും അടക്കം ലഭിച്ചുതുടങ്ങുന്നത് പ്രതിസന്ധിക്ക് ഒരു പരിധിവരെ ആശ്വാസമാകുമെന്നും മന്ത്രി കൂട്ടിച്ചേര്ത്തു.
അതേസമയം, മാസപ്പടി കേസുമായി ബന്ധപ്പെട്ട് ആഭ്യന്തര വകുപ്പിന് ഇഡി കൈമാറിയ രേഖകളിലെ വിശദാംശങ്ങള് മാധ്യമങ്ങളിലൂടെ പുറത്തുവന്ന വിഷയത്തിലും മന്ത്രി പ്രതികരിച്ചു. ആഭ്യന്തര വകുപ്പിന് ലഭിച്ച രേഖകളാണ് പുറത്തുവന്നതെന്നും അതെങ്ങനെ ഇഡി ചോര്ത്തി നല്കിയതാണെന്ന് പറയാനാകുമെന്നും അദ്ദേഹം ചോദിച്ചു.
വിഷയത്തില് നിലവില് നിയമവശങ്ങള് വിശദമായി പരിശോധിച്ചുവരികയാണെന്നും പോലീസില് കേസെടുക്കണമോ എന്ന കാര്യത്തില് തീരുമാനം പിന്നീടായിരിക്കുമെന്നും അദ്ദേഹം പറഞ്ഞു.