ടിന്‍ഡര്‍ ഡേറ്റ് കഴിഞ്ഞയുടന്‍ ബ്ലോക്ക് ചെയ്തു; ബെംഗളൂരുവില്‍ യുവാവിന് നഷ്ടപ്പെട്ടത് 27,200 രൂപ, ഡേറ്റിംഗ് ആപ്പ് തട്ടിപ്പുകള്‍ വീണ്ടും സജീവമാകുന്നു
ബെംഗളൂരു: ഡേറ്റിംഗ് ആപ്പുകള്‍ വഴിയുള്ള സാമ്പത്തിക തട്ടിപ്പുകള്‍ നഗരത്തില്‍ വര്‍ധിക്കുന്നു. ടിന്‍ഡര്‍ വഴി പരിചയപ്പെട്ട യുവതിയുമായുള്ള കൂടിക്കാഴ്ചയ്ക്ക് പിന്നാലെ ബെംഗളൂരു സ്വദേശിയായ യുവാവിന് 27,200 രൂപ നഷ്ടപ്പെട്ടു. റസ്റ്റോറന്റില്‍ വെച്ചുള്ള ഡേറ്റിംഗിന് ശേഷം യുവതിയുമായുള്ള ബന്ധം വിച്ഛേദിക്കപ്പെടുകയും, തന്നെ സോഷ്യല്‍ മീഡിയയിലും കോണ്‍ടാക്റ്റുകളിലും ബ്ലോക്ക് ചെയ്യുകയും ചെയ്തുവെന്ന് യുവാവ് വെളിപ്പെടുത്തി. സമാനമായ തട്ടിപ്പുകളില്‍ മറ്റുള്ളവര്‍ വീണുപോകാതിരിക്കാന്‍ മുന്‍കരുതല്‍ എന്ന നിലയ്ക്കാണ് താന്‍ ഈ അനുഭവം റെഡ്ഡിറ്റിലൂടെ പൊതുജനങ്ങളുമായി പങ്കുവെച്ചതെന്ന് അദ്ദേഹം വ്യക്തമാക്കി.
കഴിഞ്ഞ ജൂലൈ 26 നാണ് സംഭവം നടന്നത്. ഒക്ടോബര്‍ ആദ്യവാരമാണ് യുവാവ് തന്റെ അനുഭവം റെഡ്ഡിറ്റില്‍ പോസ്റ്റ് ചെയ്തത്. താന്‍ കടന്നുപോയ വ്യക്തിപരമായ പ്രതിസന്ധികളില്‍ നിന്നും വേര്‍പിരിയലില്‍ നിന്നും മോചനം തേടിയാണ് യഥാര്‍ത്ഥ ബന്ധങ്ങള്‍ക്കായി ഡേറ്റിംഗ് ആപ്പുകളെ ആശ്രയിച്ചതെന്ന് അദ്ദേഹം കുറിപ്പില്‍ പറയുന്നു. 'നിഷ' എന്ന് സ്വയം പരിചയപ്പെടുത്തിയ യുവതി ബനശങ്കരിയിലെ ഒരു റസ്റ്റോറന്റില്‍ വെച്ച് ഒരു പാനീയം കുടിക്കാന്‍ കാണാമെന്ന് ആവശ്യപ്പെടുകയായിരുന്നു.
മീറ്റിംഗിന് ശേഷം ബില്ലിന്റെ വിഹിതം അടുത്ത ദിവസം തന്നെ നല്‍കാമെന്ന് യുവതി വാഗ്ദാനം ചെയ്തിരുന്നുവെങ്കിലും പിന്നീട് ആ തുക നല്‍കിയില്ല. റസ്റ്റോറന്റ് ബില്ലിന്റെ പകര്‍പ്പ് തന്റെ കൈവശം ഇല്ലാത്തതിനാല്‍ കൃത്യമായ തുക എത്രയെന്ന് പരിശോധിക്കാനും സാധിച്ചില്ല. ആകെ 27,200 രൂപയാണ് തനിക്ക് നഷ്ടപ്പെട്ടതെന്നും ഈ അനുഭവം ഉണ്ടാക്കിയ മാനസിക ആഘാതമാണ് തന്നെ ഏറെ വേദനിപ്പിക്കുന്നതെന്നും അദ്ദേഹം വ്യക്തമാക്കി. സംഭവവുമായി ബന്ധപ്പെട്ട് ചാറ്റുകളുടെയും ഇടപാട് ചരിത്രത്തിന്റെയും സ്‌ക്രീന്‍ഷോട്ടുകള്‍ തന്റെ പക്കലുണ്ടെന്നും അദ്ദേഹം കൂട്ടിച്ചേര്‍ത്തു.