ബെംഗളൂരു മുംബൈ വന്ദേ ഭാരത് സ്ലീപ്പര്‍ ട്രെയിന്‍ നവംബറില്‍ സര്‍വീസ് ആരംഭിച്ചേക്കും; യാത്രാസമയം 6 മണിക്കൂറോളം കുറയും
ദക്ഷിണേന്ത്യയെയും പടിഞ്ഞാറന്‍ ഇന്ത്യയെയും ബന്ധിപ്പിച്ചുകൊണ്ട് ബെംഗളൂരുവിനും മുംബൈയ്ക്കുമിടയില്‍ പുതിയ വന്ദേ ഭാരത് സ്ലീപ്പര്‍ ട്രെയിന്‍ സര്‍വീസ് ഉടന്‍ യാഥാര്‍ത്ഥ്യമാകുന്നു.
കര്‍ണാടക രാജ്യോത്സവ ദിനമായ നവംബര്‍ 1-ന് ട്രെയിന്‍ ഫ്‌ലാഗ് ഓഫ് ചെയ്യാനും, നവംബര്‍ 2 മുതല്‍ പതിവ് സര്‍വീസുകള്‍ ആരംഭിക്കാനുമാണ് സാധ്യത. എങ്കിലും ഇതുസംബന്ധിച്ച് റെയില്‍വേ മന്ത്രാലയത്തിന്റെ ഔദ്യോഗിക സ്ഥിരീകരണത്തിനായി യാത്രക്കാര്‍ കാത്തിരിക്കേണ്ടതുണ്ട്.
ബെംഗളൂരുവിലെ സര്‍ എം. വിശ്വേശ്വരയ്യ ടെര്‍മിനലില്‍ (എസ്.എം.വി.ടി) നിന്ന് പുറപ്പെട്ട് മുംബൈ സി.എസ്.എംടിയിലേക്കാണ് ഈ പുതിയ സര്‍വീസ് വിഭാവനം ചെയ്തിരിക്കുന്നത്. നിലവിലുള്ള ഉദ്യാന്‍ എക്‌സ്പ്രസിനെ അപേക്ഷിച്ച് ഏകദേശം 6 മണിക്കൂറോളം യാത്രാസമയം ലാഭിക്കാന്‍ പുതിയ വന്ദേ ഭാരത് ട്രെയിനിലൂടെ സാധിക്കും. വെറും 16 മണിക്കൂറിനുള്ളില്‍ 1,118 കിലോമീറ്റര്‍ ദൂരം പിന്നിടുന്ന ഈ രാത്രികാല സര്‍വീസ് യാത്രക്കാര്‍ക്ക് വലിയ ആശ്വാസമാകും.
ആഴ്ചയില്‍ ആറ് ദിവസം സര്‍വീസ് നടത്തുന്ന ഈ ട്രെയിനില്‍ എസി ഫസ്റ്റ് ക്ലാസ്, എസി ടു-ടയര്‍, എസി ത്രീ-ടയര്‍ വിഭാഗങ്ങളിലായി ആകെ 823 ബെര്‍ത്തുകളുള്ള 16 കോച്ചുകളാണുണ്ടാകുക.
കര്‍ണാടക, ആന്ധ്രാപ്രദേശ്, തെലങ്കാന, മഹാരാഷ്ട്ര എന്നീ സംസ്ഥാനങ്ങളിലായി ഏഴ് പ്രധാന സ്റ്റേഷനുകളിലാണ് ട്രെയിനിന് സ്റ്റോപ്പുണ്ടാകാന്‍ സാധ്യതയുള്ളത്. എസി ത്രീ-ടയറിന് ഏകദേശം 2,684 രൂപ മുതല്‍ എസി ഫസ്റ്റ് ക്ലാസിന് 4,250 രൂപ വരെയായിരിക്കും ടിക്കറ്റ് നിരക്കെന്നാണ് സൂചന.
റെയില്‍വേയുടെ ഔദ്യോഗിക ടൈംടേബിളും പ്രഖ്യാപനവും പുറത്തുവരുന്നതോടെ ബുക്കിംഗ് വിവരങ്ങള്‍ ലഭ്യമാകും. ഈ പുതിയ അതിവേഗ രാത്രികാല റെയില്‍ കണക്ഷന്‍ ബെംഗളൂരുവിനും മുംബൈയ്ക്കുമിടയിലുള്ള യാത്ര കൂടുതല്‍ സുഖകരവും വേഗതയേറിയതുമാക്കുമെന്നാണ് പ്രതീക്ഷിക്കുന്നത്.