മുണ്ടിയപ്പള്ളിയിൽ ‘കമ്മ്യൂണിറ്റി ഹീലിംഗ് ക്ലിനിക്’ പ്രവർത്തനം ആരംഭിച്ചു; ഗ്രാമീണ ആരോഗ്യമേഖലയിൽ പുതിയ ചുവടുവെപ്പുമായി ബിലീവേഴ്സ് ചർച്ച് മെഡിക്കൽ കോളേജ് ആശുപത്രി
തിരുവല്ല: ഗ്രാമീണ മേഖലയിലെ ആരോഗ്യ പരിരക്ഷ മെച്ചപ്പെടുത്തുന്നതിനായി ബിലീവേഴ്സ് ചർച്ച് മെഡിക്കൽ കോളേജ് ആശുപത്രിയുടെ നേതൃത്വത്തിൽ മുണ്ടിയപ്പള്ളിയിൽ സജ്ജീകരിച്ച 'കമ്മ്യൂണിറ്റി ഹീലിംഗ് ക്ലിനിക്' പ്രവർത്തനം ആരംഭിച്ചു.
കവിയൂർ പഞ്ചായത്തിലെ മുണ്ടിയപ്പള്ളി ബിലീവേഴ്സ് മെഡിക്കൽ സെന്ററിൽ നടന്ന ചടങ്ങിൽ ബിലീവേഴ്സ് ചർച്ച് മെഡിക്കൽ കോളേജ് ആശുപത്രി ഡയറക്ടറും സി.ഇ.ഒയുമായ പ്രൊഫ ഡോ. ജോർജ് ചാണ്ടി മറ്റീത്ര ക്ലിനിക്കിന്റെ ഉദ്ഘാടനം നിർവഹിച്ചു.
രാജ്യത്തെ ആരോഗ്യമേഖല നേരിടുന്ന പ്രധാന പ്രശ്നങ്ങളായ ഉയർന്ന രോഗബാധനിരക്കും ചികിത്സാ സൗകര്യങ്ങളുടെ കുറവും പരിഹരിക്കുന്നതിൽ ഇത്തരം കമ്മ്യൂണിറ്റി ക്ലിനിക്കുകൾ വലിയ പങ്കുവഹിക്കുമെന്ന് ഉദ്ഘാടന പ്രസംഗത്തിൽ പ്രൊഫ ഡോ. ജോർജ് ചാണ്ടി മറ്റീത്ര വ്യക്തമാക്കി.
മിതമായ നിരക്കിൽ മികച്ച ചികിത്സാ സൗകര്യങ്ങൾ കവിയൂർ പഞ്ചായത്തിലെ ജനങ്ങളുടെ അരികിലെത്തിക്കുന്ന ഈ പദ്ധതി രാജ്യത്തിന് തന്നെ മാതൃകയായ ഒരു ആരോഗ്യ സംരക്ഷണ മോഡലായി മാറുമെന്നും അദ്ദേഹം സൂചിപ്പിച്ചു.
ബിലീവേഴ്സ് ചർച്ച് മെഡിക്കൽ കോളേജ് കമ്മ്യൂണിറ്റി മെഡിസിൻ വിഭാഗം മേധാവി ഡോ. റീത്ത ഐസക് അധ്യക്ഷത വഹിച്ചു. ഭക്ഷണക്രമം സംബന്ധിച്ച കൗൺസിലിംഗ്, ജീവിതശൈലീ മാറ്റങ്ങൾ എന്നിവയിലൂടെ രോഗങ്ങളെ പ്രതിരോധിക്കുന്നതിലാണ് ക്ലിനിക് ശ്രദ്ധ കേന്ദ്രീകരിക്കുന്നതെന്ന് ഡോ. റീത്ത ഐസക് അധ്യക്ഷ പ്രസംഗത്തിൽ പറഞ്ഞു.
കേവലം രോഗചികിത്സ എന്നതിനപ്പുറം, രോഗികൾക്ക് ആശ്വാസവും കരുതലും നൽകുന്ന സമഗ്രമായ സൗഖ്യത്തിനാണ് ക്ലിനിക് മുൻഗണന നൽകുന്നത്. പരിശീലനം ലഭിച്ച ആരോഗ്യ പ്രവർത്തകർ മുഖേന രോഗലക്ഷണങ്ങൾ മുൻകൂട്ടി കണ്ടെത്തുക എന്നതാണ് ഈ സംരംഭത്തിന്റെ പ്രധാന ലക്ഷ്യം.
രോഗം വന്നതിനുശേഷം ചികിത്സിക്കുന്ന രീതിയിൽ നിന്ന് മാറി, പ്രമേഹം, അമിത രക്തസമ്മർദ്ദം, അമിതവണ്ണം തുടങ്ങിയ ജീവിതശൈലീ രോഗങ്ങൾക്കായുള്ള സ്ക്രീനിംഗ്, ബോധവൽക്കരണ ക്ലാസുകൾ, മുതിർന്നവർക്കുള്ള വാക്സിനേഷൻ, ക്യാൻസർ പ്രതിരോധ പരിശോധനകൾ എന്നിവയ്ക്ക് ക്ലിനിക് പ്രാധാന്യം നൽകുന്നു.
ബിലീവേഴ്സ് ആശുപത്രി അസോസിയേറ്റ് ഡയറക്ടർ ഡോ. ജോൺ വല്യത്ത്, ബിലീവേഴ്സ് ചർച്ച് മെഡിക്കൽ കോളേജ് വൈസ് പ്രിൻസിപ്പൽ ഡോ. വിജയമ്മ കെ.എൻ, കവിയൂർ പഞ്ചായത്ത് വാർഡ് മെമ്പർമാരായ റാഹേൽ മാത്യു, മണിരാജ്, ഫിലിപ്പ് സി.ജി, ബീന സി. ജോൺ എന്നിവർ ആശംസകൾ അർപ്പിച്ചു. ചടങ്ങിൽ പ്രൊഫ. ഡോ സരിത വർഗീസ് സ്വാഗതവും അവിരാ ചാക്കോ നന്ദിയും രേഖപ്പെടുത്തി.