ഉറങ്ങും മുൻപ്........."യേശു അവരുടെ നേരേ നോക്കി പറഞ്ഞു: മനുഷ്യന് ഇത് അസാധ്യമാണ്; ദൈവത്തിന് അങ്ങനെയല്ല. അവിടുത്തേക്ക് എല്ലാം സാധിക്കും."

ഞങ്ങളുടെ നാഥനും ദൈവവുമായ നല്ല ഈശോയേ... ഈ സന്ധ്യയിൽ അങ്ങയുടെ സന്നിധിയിൽ ഞങ്ങൾ മുട്ടുമടക്കുന്നു. ഇന്ന് പകൽ മുഴുവൻ ഞങ്ങളുടെ ശ്വാസമായി, പ്രകാശമായി, വഴികാട്ടിയായി കൂടെയിരുന്ന അങ്ങയുടെ അനന്തമായ കാരുണ്യത്തിന് ഞങ്ങൾ നന്ദി പറയുന്നു.

പരാജയപ്പെടാമായിരുന്ന എത്രയോ സാഹചര്യങ്ങളിൽ നിന്നാണ് അങ്ങയുടെ അദൃശ്യമായ കരം ഞങ്ങളെ താങ്ങിനിർത്തിയത്! ഞങ്ങളുടെ ബുദ്ധിയോ കഴിവോ അല്ല, അങ്ങയുടെ കൃപ മാത്രമാണ് ഞങ്ങളെ ഈ നിമിഷം വരെ ജീവനോടെ നിലനിർത്തിയത്. കർത്താവേ, ഞങ്ങളുടെ ജീവിതത്തിലെ ചെറുതും വലുതുമായ എല്ലാ നന്മകൾക്കുമായി ഞങ്ങൾ അങ്ങയെ സ്തുതിക്കുന്നു, നന്ദി പറയുന്നു.

കരുണാനിധിയായ കർത്താവേ, അങ്ങയുടെ സന്നിധിയിലേക്ക് വരുമ്പോൾ ഞങ്ങളുടെ ഹൃദയത്തിന്റെ നഗ്നതയെ ഞങ്ങൾ മറച്ചുവെക്കുന്നില്ല. ഇന്ന് പകൽസമയം ഞങ്ങളുടെ ചിന്തകളിൽ വന്ന അശുദ്ധി, വാക്കുകളിൽ വന്ന കാഠിന്യം, പ്രവർത്തികളിൽ സംഭവിച്ച വീഴ്ചകൾ, മറ്റുള്ളവരോട് കാണിച്ച അസഹിഷ്ണുത... അങ്ങയുടെ തിരുഹൃദയത്തെ വേദനിപ്പിച്ച എല്ലാ പാപങ്ങളും ഓർത്ത് ഞങ്ങൾ മനസ്താപപ്പെടുന്നു.

നാഥാ, ഞങ്ങളുടെ കുറവുകളെ അങ്ങയുടെ കാൽവരിയിലെ തിരുരക്തത്താൽ കഴുകി വിശുദ്ധീകരിക്കണമേ. അങ്ങയുടെ കാരുണ്യത്തിന്റെ അലകടലിൽ ഞങ്ങളുടെ പാപക്കറകളെ മുക്കി വിശുദ്ധീകരിക്കണമേ.

ഞങ്ങളുടെ നല്ല ദൈവമേ, മനുഷ്യന്റെ യുക്തിയും കണക്കുകൂട്ടലുകളും അവസാനിക്കുന്നിടത്താണ് അങ്ങയുടെ അത്ഭുതങ്ങൾ ആരംഭിക്കുന്നത് എന്ന് അങ്ങ് ഞങ്ങളെ ഓർമ്മിപ്പിക്കുന്നു. "മനുഷ്യന് ഇത് അസാധ്യമാണ്; ദൈവത്തിന് അങ്ങനെയല്ല" എന്ന അങ്ങയുടെ ജീവനുള്ള വചനം ഞങ്ങളുടെ ആത്മാവിന് പുതിയൊരു ഉണർവ് തരുന്നു.

ഈശോയേ, മനുഷ്യസാധ്യമായ എല്ലാ വഴികളും അടഞ്ഞുപോയ, ഞങ്ങളുടെ ചിന്തകൾക്ക് പരിഹാരം കാണാൻ കഴിയാത്ത ചില അന്ധകാര മേഖലകൾ ഞങ്ങളുടെ ജീവിതത്തിലുണ്ട്. ഞങ്ങളുടെ ഹൃദയങ്ങളെ ഭാരപ്പെടുത്തുന്ന ആ വലിയ അസാധ്യതകളെ ഈ സന്ധ്യയിൽ ഞങ്ങൾ അങ്ങയുടെ തിരുമുറിവുകളിലേക്ക് സമർപ്പിക്കുന്നു:

* കർത്താവേ, വിട്ടുമാറാത്ത രോഗങ്ങൾ നൽകുന്ന ശാരീരികവും മാനസികവുമായ തളർച്ചകൾ... (വ്യക്തിപരമായ രോഗങ്ങൾ ഓർക്കുക)

* പരിഹാരമില്ലാതെ നീണ്ടുപോകുന്ന സാമ്പത്തിക ബാധ്യതകളും കുടുംബത്തിലെ കഷ്ടപ്പാടുകളും...

* എത്ര പ്രാർത്ഥിച്ചിട്ടും മാറ്റമില്ലാതെ തുടരുന്ന ജീവിത സാഹചര്യങ്ങളും തകർന്ന ബന്ധങ്ങളും...

* നാളെയെക്കുറിച്ചുള്ള ഭയവും, ഉള്ളിൽ അനുഭവപ്പെടുന്ന ശൂന്യതയും അസ്വസ്ഥതകളും...

നാഥാ, ലോകം ഞങ്ങൾക്ക് മുന്നിൽ വാതിലുകൾ കൊട്ടിയടക്കുമ്പോൾ, "ഇനി ഇതിനൊരു മാറ്റമില്ല" എന്ന് മനുഷ്യർ വിധി എഴുതുമ്പോൾ, അങ്ങയുടെ തിരുമുഖത്തേക്ക് നോക്കാൻ ഞങ്ങളെ പഠിപ്പിക്കണമേ. അവിടുത്തേക്ക് എല്ലാം സാധ്യമാണ്. അങ്ങ് വിചാരിച്ചാൽ മാറാത്ത ഏത് രോഗമാണുള്ളത്? അങ്ങ് കൽപ്പിച്ചാൽ ശാന്തമാകാത്ത ഏത് കൊടുങ്കാറ്റാണുള്ളത്? അങ്ങയുടെ ഒരു ചെറിയ സ്പർശനം മതി ഞങ്ങളുടെ ഈ അസാധ്യ സാഹചര്യങ്ങളെ അത്ഭുതകരമായ സാക്ഷ്യങ്ങളാക്കി മാറ്റാൻ എന്ന് ഞങ്ങൾ പൂർണ്ണമായി വിശ്വസിക്കുന്നു.

ഈശോയേ, ഈ രാത്രിയിൽ ഞങ്ങളുടെ ഹൃദയങ്ങളിലേക്കും ഞങ്ങളുടെ ഭവനങ്ങളിലേക്കും അങ്ങയുടെ സമാധാനം ഒഴുകിയിറങ്ങട്ടെ. ഞങ്ങളുടെ സങ്കടങ്ങളുടെ മേൽ അങ്ങയുടെ ആശ്വാസത്തിന്റെ തൈലം പൂശണമേ. ഞങ്ങളുടെ പ്രാർത്ഥനകൾക്ക് ഞങ്ങൾ ആഗ്രഹിക്കുന്ന സമയത്തല്ല, അങ്ങയുടെ ഏറ്റവും അനുയോജ്യമായ സമയത്ത് അങ്ങ് ഉത്തരം നൽകുമെന്ന് വിശ്വസിക്കാനുള്ള ക്ഷമ ഞങ്ങൾക്ക് നൽകണമേ.

ഈ രാത്രിയിൽ ഭയമില്ലാതെ, അങ്ങയുടെ മടിയിൽ കിടക്കുന്ന ഒരു ശിശുവിനെപ്പോലെ പ്രത്യാശയോടെ ഉറങ്ങാൻ ഞങ്ങളെ അനുഗ്രഹിക്കണമേ. ഞങ്ങളുടെ കുടുംബങ്ങളേയും പ്രിയപ്പെട്ടവരെയും അങ്ങയുടെ വിശുദ്ധ രക്തത്തിന്റെ കോട്ടയ്ക്കുള്ളിൽ കാത്തുസൂക്ഷിക്കണമേ. ദുഷ്ടാരൂപികളുടെ എല്ലാ കെണികളിൽ നിന്നും അസ്വസ്ഥമായ സ്വപ്നങ്ങളിൽ നിന്നും ഞങ്ങളെ സംരക്ഷിക്കണമേ.

നാളെ രാവിലെ അങ്ങയുടെ അത്ഭുതങ്ങൾ കാണാൻ വിശ്വാസത്തോടെ ഉണരാനുള്ള കൃപ നൽകണമേ. ഞങ്ങളുടെ നല്ല ദൈവമേ, അങ്ങേക്ക് അസാധ്യമായി ഒന്നുമില്ലല്ലോ. ഞങ്ങൾ ഞങ്ങളെത്തന്നെ പൂർണ്ണമായി അങ്ങയുടെ തിരുവിഷ്ടത്തിന് വിട്ടു തരുന്നു.

ഞങ്ങളുടെ നാഥനും രക്ഷകനുമായ ഈശോമിശിഹാ വഴി ഞങ്ങൾ സമർപ്പിക്കുന്ന പ്രാർത്ഥന കേട്ടരുളണമേ... ആമേൻ

1 സ്വർഗ്ഗസ്ഥനായ പിതാവേ..., 1 നന്മനിറഞ്ഞ മറിയമേ..., 1 ത്രിത്വസ്തുതി...

See less