ഉറങ്ങും മുൻപ്.........
കര്ത്താവേ, അങ്ങയുടെ കാരുണ്യംഎന്നില്നിന്നു പിന്വലിക്കരുതേ!അവിടുത്തെ സ്നേഹവും വിശ്വസ്തതയും എന്നെ സംരക്ഷിക്കട്ടെ!
സ്തുതികൾക്ക് യോഗ്യനായ ഞങ്ങളുടെ നല്ല ദൈവമേ...
ഞങ്ങളെ അളവറ്റു സ്നേഹിക്കുന്ന ഞങ്ങളുടെ സ്വർഗ്ഗസ്ഥനായ പിതാവേ, അങ്ങയുടെ സന്നിധിയിലേക്ക് ഞങ്ങളുടെ ഹൃദയങ്ങളെ ഉയർത്തി ഞങ്ങൾ അങ്ങയെ ആരാധിക്കുന്നു. ഞങ്ങളുടെ ജീവിതത്തിലെ എല്ലാ നന്മകൾക്കും കാവലിനും ഞങ്ങൾ അങ്ങേയ്ക്ക് നന്ദി പറയുന്നു.
നാഥാ, ഞങ്ങളുടെ ബലഹീനതകളിലും തളർച്ചകളിലും അങ്ങയുടെ സാന്നിധ്യം ഞങ്ങൾക്ക് തണലാകണമേ. വചനത്തിൽ അങ്ങ് അരുളിച്ചെയ്തതുപോലെ ഞങ്ങൾ പ്രാർത്ഥിക്കുന്നു:
"കർത്താവേ, അങ്ങയുടെ കാരുണ്യം എന്നിൽനിന്നു പിൻവലിക്കരുതേ! അവിടുത്തെ സ്നേഹവും വിശ്വസ്തതയും എന്നെ സംരക്ഷിക്കട്ടെ!"
അതെ കർത്താവേ, ഞങ്ങളുടെ യോഗ്യതകൾ കൊണ്ടല്ല, അങ്ങയുടെ അനന്തമായ കരുണ കൊണ്ടാണ് ഞങ്ങൾ ജീവിക്കുന്നത്. ഈ ലോകത്തിന്റെ തിന്മകളിൽ നിന്നും, രോഗങ്ങളിൽ നിന്നും, മാനസികമായ തകർച്ചകളിൽ നിന്നും അങ്ങയുടെ തിരുരക്തത്താൽ ഞങ്ങളെ പൊതിയണമേ. ശത്രുവിന്റെ കെണികളിൽ വീഴാതെ അങ്ങയുടെ സ്വർഗ്ഗീയ ദൂതന്മാരെ അയച്ച് ഞങ്ങളുടെ വഴികളെ കാത്തുപാലിക്കണമേ.
മാറിക്കൊണ്ടിരിക്കുന്ന ഈ ലോകത്തിൽ മാറാത്തവനായി നിൽക്കുന്ന അങ്ങയുടെ വിശ്വസ്തത മാത്രമാണ് ഞങ്ങളുടെ പ്രത്യാശ. ഞങ്ങളുടെ കുടുംബത്തെയും ഞങ്ങളുടെ പ്രിയപ്പെട്ടവരെയും അങ്ങയുടെ സ്നേഹത്തിന്റെ തണലിൽ ഒളിപ്പിക്കണമേ. ഭാവിയെക്കുറിച്ചുള്ള ഭയങ്ങളെ മാറ്റി, അങ്ങയുടെ പദ്ധതികളിൽ പൂർണ്ണമായി വിശ്വസിക്കാനുള്ള കൃപ ഞങ്ങൾക്ക് നൽകണമേ.
ഇന്ന് ഞങ്ങൾ ആയിരിക്കുന്ന അവസ്ഥകളെയും ഞങ്ങളുടെ പ്രാർത്ഥനാ നിയോഗങ്ങളെയും അങ്ങയുടെ കരങ്ങളിൽ സമർപ്പിക്കുന്നു. അങ്ങയുടെ തിരുഹിതം ഞങ്ങളുടെ ജീവിതത്തിൽ നിറവേറട്ടെ.
ഈ പ്രാർത്ഥന കർത്താവായ ഈശോമിശിഹായുടെ നാമത്തിൽ സമർപ്പിക്കുന്നു...
ആമേൻ