ഉറങ്ങും മുൻപ്.........നീതിമാന്റെ ക്ളേശങ്ങള്‍ അസംഖ്യമാണ്‌,അവയില്‍ നിന്നെല്ലാം കര്‍ത്താവു അവനെ മോചിപ്പിക്കുന്നു

പിതാവിന്റെയും പുത്രന്റെയും പരിശുദ്ധാത്മാവിന്റെയും നാമത്തിൽ, ആമേൻ.
സർവ്വശക്തനും ജീവിക്കുന്നവനുമായ ദൈവമേ...
ഈ സന്ധ്യാസമയത്ത് അങ്ങയുടെ സന്നിധിയിലേക്ക് ഞങ്ങൾ കടന്നുവരുന്നു. കടന്നുപോയ പകൽ സമയത്ത് ഞങ്ങളെ കാത്തുപരിപാലിച്ച അങ്ങയുടെ വലിയ സ്നേഹത്തിന് ഞങ്ങൾ നന്ദി പറയുന്നു. ഈ രാത്രിയിൽ അങ്ങയുടെ ജീവൻ്റെ വചനം പ്രഖ്യാപിച്ചുകൊണ്ട് ഞങ്ങൾ പ്രാർത്ഥിക്കുന്നു.
ഞങ്ങളുടെ ജീവിതത്തിന് നേരെ ഉയരുന്ന എല്ലാ ക്ലേശങ്ങളെയും പ്രതിസന്ധികളെയും അങ്ങയുടെ വചനത്തിന്റെ അധികാരത്താൽ ഞങ്ങൾ ശാസിക്കുന്നു. ഞങ്ങളെ തളർത്തുന്ന സാമ്പത്തിക തകർച്ചകൾ, ശാരീരിക രോഗങ്ങൾ, മാനസിക ഭാരങ്ങൾ, ശത്രുവിന്റെ തന്ത്രങ്ങൾ എന്നിവയ്ക്ക് മേൽ ഈ വചനത്തിന്റെ ശക്തി ഞങ്ങളുടെ മേൽ വ്യാപരിക്കട്ടെ. ഞങ്ങളുടെ ക്ലേശങ്ങൾ അസംഖ്യമായിരിക്കാം, എന്നാൽ അവയിൽ നിന്നെല്ലാം ഞങ്ങളെ മോചിപ്പിക്കാൻ അങ്ങയുടെ ശക്തമായ കരങ്ങൾക്ക് കഴിയുമെന്ന് ഞങ്ങൾ പൂർണ്ണമായി വിശ്വസിക്കുന്നു.
വചനമായ യേശുവേ,
ഈ രാത്രിയിൽ ഞങ്ങളുടെ മേലും ഞങ്ങളുടെ കുടുംബത്തിന്മേലും അങ്ങയുടെ തിരുരക്തത്താൽ കഴുകി ഞങ്ങളെ സംരക്ഷിക്കണമേ. ഞങ്ങളുടെ സമാധാനം കെടുത്തുന്ന എല്ലാ അന്ധകാര ശക്തികളെയും ഭയത്തിന്റെ ആത്മാക്കളെയും യേശുവിന്റെ നാമത്തിൽ ഞങ്ങൾ ബന്ധിച്ച് അങ്ങയുടെ കുരിശിൻ ചുവട്ടിൽ സമർപ്പിക്കുന്നു. ദുഃസ്വപ്നങ്ങളിൽ നിന്നും രാത്രിയിലെ സകല വിപത്തുകളിൽ നിന്നും ഞങ്ങളെ കാത്തു സംരക്ഷിക്കണമേ. അങ്ങയുടെ പരിശുദ്ധാത്മാവിനാൽ ഞങ്ങളെ നിറയ്ക്കണമേ. അങ്ങയുടെ സ്വർഗ്ഗീയ സമാധാനം ഈ രാത്രിയിൽ ഞങ്ങളുടെ ഹൃദയത്തിലും ഭവനത്തിലും നിറയട്ടെ. കർത്താവ് ഞങ്ങൾക്ക് തരാൻ പോകുന്ന വലിയ മോചനത്തെയും വിജയത്തെയും ഓർത്ത് ഞങ്ങൾ മുൻകൂട്ടി അങ്ങേയ്ക്ക് സ്തുതി അർപ്പിക്കുന്നു... ആമേൻ
നന്മ നിറഞ്ഞ മറിയമേ... (1)
പിതാവിനും പുത്രനും പരിശുദ്ധാത്മാവിനും സ്തുതി... (1)
ആമേൻ