ഉറങ്ങും മുൻപ്.........ദൈവമേ, ഞങ്ങളെ പുനരുദ്ധരിക്കണമേ!അങ്ങയുടെ മുഖം പ്രകാശിക്കുകയും ഞങ്ങള്‍ രക്ഷപെടുകയും ചെയ്യട്ടെ!

കാരുണ്യവാനായ ഞങ്ങളുടെ നല്ല ദൈവമേ... ഈ പകൽ മുഴുവൻ അവിടുന്ന് ഞങ്ങൾക്ക് നൽകിയ എല്ലാ നന്മകൾക്കും സംരക്ഷണത്തിനും ഞങ്ങൾ നന്ദി പറയുന്നു. ജോലിയിലും പഠനത്തിലും ഞങ്ങളുടെ യാത്രകളിലും അങ്ങയുടെ കരം ഞങ്ങളോടുകൂടെ ഉണ്ടായിരുന്നുവല്ലോ. ഇപ്പോൾ ഈ സന്ധ്യയിൽ, ഒരു കുടുംബമായി അങ്ങയുടെ തിരുമുമ്പിൽ ഒന്നിച്ചുചേരാൻ ഞങ്ങൾക്ക് നൽകിയ ഈ നല്ല നിമിഷത്തെ ഓർത്ത് ഞങ്ങൾ അങ്ങയെ സ്തുതിക്കുന്നു.
നാഥാ, ഈ പകൽ സമയത്ത് ഞങ്ങളുടെ ചിന്തകളാലോ, വാക്കുകളാലോ, പ്രവർത്തികളാലോ അങ്ങയെ വിട്ട് അകന്നുപോയിട്ടുണ്ടെങ്കിൽ ഞങ്ങളോട് ക്ഷമിക്കണമേ. ഞങ്ങളുടെ ഹൃദയത്തിലെ അന്ധകാരത്തെ നീക്കി അങ്ങയുടെ പ്രകാശം ഞങ്ങളിൽ നിറയ്ക്കണമേ.
കർത്താവേ, ഭൂമിയെയും ആകാശത്തെയും അതിലുള്ള സകലത്തെയും നിയന്ത്രിക്കുന്നവനും പരിപാലിക്കുന്നവനും അങ്ങാണല്ലോ. പ്രകൃതിയുടെ സർവ്വ ശക്തികൾക്കും മേൽ അങ്ങേയ്ക്ക് അധികാരമുണ്ടെന്ന് ഞങ്ങൾ ഏറ്റുപറയുന്നു. നാഥാ, ഭയപ്പെടുത്തുന്ന ശക്തമായ മഴ, കാറ്റ്, മിന്നൽ, ഉരുൾപൊട്ടൽ, വെള്ളപ്പൊക്കം തുടങ്ങിയ എല്ലാവിധ പ്രകൃതി ദുരന്തങ്ങളിൽ നിന്നും ഞങ്ങളെയും ഞങ്ങളുടെ ഭവനങ്ങളേയും കാത്തുരക്ഷിക്കണമേ. പ്രകൃതിയുടെ കോപത്തിന് മുന്നിൽ ഞങ്ങൾ തളർന്നുപോകാതെ അങ്ങയുടെ ശക്തമായ കൈകളാൽ ഞങ്ങൾക്ക് കോട്ട തീർക്കണമേ.
പൊതുവായ യാചന
സങ്കീർത്തകൻ പ്രാർത്ഥിച്ചതുപോലെ ഞങ്ങളെയും ഞങ്ങളുടെ കുടുംബത്തെയും അവിടുന്ന് പുനരുദ്ധരിക്കുകയും ആത്മീയമായി പുതുക്കുകയും ചെയ്യണമേ. ജീവിതത്തിലെ പ്രതിസന്ധികളും തളർച്ചകളും ഞങ്ങളെ കീഴ്പ്പെടുത്തുമ്പോൾ അങ്ങയുടെ പ്രകാശമുള്ള മുഖം ഞങ്ങളുടെ നേർക്ക് തിരിക്കണമേ. ആ മുഖപ്രകാശത്താൽ ഞങ്ങൾ രക്ഷപെടുകയും സമാധാനം കണ്ടെത്തുകയും ചെയ്യട്ടെ. ഞങ്ങളുടെ ഭവനം അങ്ങയുടെ സാന്നിധ്യത്താൽ നിറയ്ക്കണമേ.
ഈ രാത്രിയിൽ ഞങ്ങൾ ഉറങ്ങാൻ കിടക്കുമ്പോൾ അങ്ങയുടെ വിശുദ്ധ മാലാഖമാരുടെ കാവൽ ഞങ്ങൾക്ക് നൽകണമേ. ദുഃസ്വപ്നങ്ങളിൽ നിന്നും ഭയങ്ങളിൽ നിന്നും രോഗങ്ങളിൽ നിന്നും ഞങ്ങളെ കാത്തുരക്ഷിക്കണമേ. നാളെ പ്രത്യാശയോടെ ഒരു പുതിയ പുലരിയിലേക്ക് ഉണരാൻ ഞങ്ങളെ അനുഗ്രഹിക്കണമേ.
ഭൂമിയിലെ ഞങ്ങളുടെ ആയുസ്സ് അവസാനിക്കുമ്പോൾ, അങ്ങയുടെ പ്രകാശമുള്ള മുഖം കണ്ട് നിത്യമായി ആനന്ദിക്കാൻ ഞങ്ങളെല്ലാവരെയും യോഗ്യരാക്കണമേ.
നമ്മുടെ കർത്താവീശോ മിശിഹായുടെ കൃപയും പിതാവായ ദൈവത്തിന്റെ സ്നേഹവും പരിശുദ്ധാത്മാവിന്റെ സഹവാസവും ഞങ്ങളുടെമേലും ഈ ലോകം മുഴുവന്റെമേലും ഇപ്പോഴും എപ്പോഴും എന്നേക്കും ഉണ്ടായിരിക്കട്ടെ...
ആമേൻ

1.സ്വർഗ്ഗസ്ഥനായ പിതാവേ..., 3.നന്മനിറഞ്ഞ മറിയമേ..., 1.ത്രിത്വസ്തുതി...