ഉറങ്ങും മുൻപ്.........യേശു അവരുടെ നേരേ നോക്കി പറഞ്ഞു: മനുഷ്യന് ഇത് അസാധ്യമാണ്; ദൈവത്തിന് അങ്ങനെയല്ല. അവിടുത്തേക്ക് എല്ലാം സാധിക്കും
കാരുണ്യവാനായ ഞങ്ങളുടെ നല്ല ദൈവമേ...
പകൽ മുഴുവൻ അവിടുന്ന് നൽകിയ എല്ലാ നന്മകൾക്കും കാവലിനും ഞങ്ങൾ നന്ദി പറയുന്നു. ഈ സന്ധ്യാനേരത്ത് അങ്ങയുടെ സന്നിധിയിൽ ഞങ്ങൾ ആയിരിക്കുമ്പോൾ, അങ്ങയുടെ ജീവൻ്റെ വചനം ഞങ്ങളെ ഓർമ്മിപ്പിക്കുന്നു:
"മനുഷ്യന് ഇത് അസാധ്യമാണ്; ദൈവത്തിന് അങ്ങനെയല്ല. അവിടുത്തേക്ക് എല്ലാം സാധിക്കും".
അതെ കർത്താവേ, ഞങ്ങളുടെ ജീവിതത്തിലെ പ്രതിസന്ധികളും ഭാരങ്ങളും കാണുമ്പോൾ പലപ്പോഴും ഞങ്ങൾ ഭയപ്പെടുന്നു. മനുഷ്യസഹജമായ ഞങ്ങളുടെ ബുദ്ധിക്കും ശക്തിക്കും അസാധ്യമെന്ന് തോന്നുന്ന പല കാര്യങ്ങളും ഞങ്ങളുടെ മുന്നിലുണ്ട്. എന്നാൽ അങ്ങേക്ക് അസാധ്യമായി ഒന്നുമില്ലെന്ന സത്യം ഈ വചനത്തിലൂടെ ഞങ്ങളുടെ ഹൃദയങ്ങളിൽ ധൈര്യം നിറയ്ക്കുന്നു.
ഈ സന്ധ്യയിൽ ഞങ്ങളെ അലട്ടുന്ന എല്ലാ സാമ്പത്തിക ബുദ്ധിമുട്ടുകളും കടബാധ്യതകളും ഞങ്ങൾ അങ്ങയുടെ പാദങ്ങളിൽ സമർപ്പിച്ചു പ്രാർത്ഥിക്കുന്നു. വരുമാനക്കുറവും, ആവശ്യങ്ങളും, ഞങ്ങളെ ശ്വാസം മുട്ടിക്കുന്ന സാമ്പത്തിക ഭാരങ്ങളും അങ്ങേക്ക് അറിയാമല്ലോ. കർത്താവേ, മനുഷ്യർ വഴി അടഞ്ഞെന്നു പറയുന്നിടത്ത് പുതിയ വഴികൾ തുറക്കുന്നവനാണ് അവിടുന്ന്. ഞങ്ങളുടെ ജോലിയിലും ബിസിനസ്സിലും അങ്ങയുടെ അനുഗ്രഹം ചൊരിയണമേ. കടബാധ്യതകളിൽ നിന്ന് ഞങ്ങൾക്ക് വിടുതൽ നൽകി, അങ്ങയുടെ അത്ഭുതകരമായ സമൃദ്ധി കൊണ്ട് ഞങ്ങളുടെ കുടുംബത്തെ നിറയ്ക്കണമേ.
ഭയത്തിന്മേൽ ഞങ്ങൾക്ക് ജയം നൽകി, അങ്ങയിലുള്ള ഉറച്ച വിശ്വാസത്താൽ ഞങ്ങളെ ശക്തരാക്കണമേ. ഈ രാത്രിയിൽ അങ്ങയുടെ സമാധാനവും സംരക്ഷണവും ഞങ്ങളുടെ കുടുംബങ്ങളിലും ഹൃദയങ്ങളിലും നിറയ്ക്കണമേ. നാളത്തെ പുലരിയിലേക്ക് പ്രത്യാശയോടെയും ആത്മധൈര്യത്തോടെയും കടന്നുചെല്ലാൻ അങ്ങയുടെ പരിശുദ്ധാത്മാവ് ഞങ്ങളെ വഴിനടത്തട്ടെ... ആമേൻ