ഉറങ്ങും മുൻപ്.........പിതാവിന്റെയും പുത്രന്റെയും പരിശുദ്ധാത്മാവിന്റെയും നാമത്തിൽ, ആമേൻ

"ഒരുവന്റെ വഴികൾ കർത്താവിന് പ്രീതികരമായിരിക്കുമ്പോൾ ശത്രുക്കൾപോലും അവനോട് ഇണങ്ങിക്കഴിയുന്നു."  സുഭാഷിതങ്ങൾ 16 : 7

കാരുണ്യവാനായ ഞങ്ങളുടെ ദൈവമേ... അനുഗ്രഹപ്രദമായ ഈ സന്ധ്യാസമയത്ത് അങ്ങയുടെ സന്നിധിയിൽ ഞങ്ങൾ ഒന്നിച്ചുചേരുന്നു. ഇന്നത്തെ പകൽ മുഴുവൻ അവിടുന്ന് ഞങ്ങൾക്ക് നൽകിയ എല്ലാ നന്മകൾക്കും കാവലിനും ഞങ്ങൾ  നന്ദി പറയുന്നു. ഞങ്ങൾ അറിഞ്ഞും അറിയാതെയും ചെയ്തുപോയ എല്ലാ തെറ്റുകളും, കുറ്റങ്ങളും ക്ഷമിച്ച്, അങ്ങയുടെ തിരുരക്തത്താൽ ഞങ്ങളെ ശുദ്ധീകരിക്കണമേ.
ജീവന്റെ നാഥനായ കർത്താവേ, അങ്ങയുടെ ജീവനുള്ള വചനം ഞങ്ങളെ ഓർമ്മിപ്പിക്കുന്നത് ഞങ്ങളുടെ വഴികൾ അങ്ങേയ്ക്ക് പ്രീതികരമാകുമ്പോൾ ഞങ്ങളുടെ ശത്രുക്കൾ പോലും ഞങ്ങളോട് ഇണങ്ങുമെന്നാണ്. ദൈവമേ, ഞങ്ങളുടെ ചിന്തകളും വാക്കുകളും പ്രവർത്തികളും അങ്ങയുടെ തിരുഹിതത്തിന് അനുസൃതമായി മാറ്റാൻ ഞങ്ങളെ സഹായിക്കണമേ. ഞങ്ങളുടെ ജീവിതവഴികൾ അങ്ങേയ്ക്ക് പ്രീതികരമായിരിക്കാൻ ആവശ്യമായ ജ്ഞാനവും വിവേകവും എളിമയും ഞങ്ങൾക്ക് നൽകണമേ.
ഞങ്ങളുടെ കുടുംബത്തിലും ജോലിസ്ഥലത്തും സമൂഹത്തിലും സമാധാനത്തിന്റെ വക്താക്കളാകാൻ ഞങ്ങളെ അനുഗ്രഹിക്കണമേ. ഞങ്ങളോട് വിദ്വേഷം പുലർത്തുന്നവർ, ഞങ്ങളെ തകർക്കാൻ ശ്രമിക്കുന്നവർ, ഞങ്ങളുടെ തകർച്ചയിൽ സന്തോഷിക്കുന്നവർ  എന്നിവരെയെല്ലാം അങ്ങയുടെ തിരുക്കരങ്ങളിൽ സമർപ്പിക്കുന്നു. അവരുടെ ഹൃദയങ്ങളെ അവിടുന്ന് സ്പർശിക്കണമേ. ഞങ്ങളുടെ ശത്രുതകളെല്ലാം മാറി, പരസ്പരം സ്നേഹിക്കാനും ക്ഷമിക്കാനും ഉള്ള കൃപ ഞങ്ങൾക്ക് നൽകണമേ. യാക്കോബും ഏസാവും തമ്മിൽ അനുരഞ്ജനപ്പെട്ടതുപോലെ, ഞങ്ങളുടെ ജീവിതത്തിലെ എല്ലാ തകർന്ന ബന്ധങ്ങളും അവിടുത്തെ സ്നേഹത്താൽ കൂട്ടിച്ചേർക്കണമേ.
ഈ രാത്രിയിൽ ഞങ്ങളുടെ വീടിനും കുടുംബാംഗങ്ങൾക്കും അങ്ങയുടെ ശക്തമായ കാവൽ നൽകണമേ. എല്ലാവിധ തിന്മകളിൽ നിന്നും രോഗങ്ങളിൽ നിന്നും ഭയത്തിൽ നിന്നും ഞങ്ങളെ സംരക്ഷിക്കണമേ. സമാധാനപൂർണ്ണമായ ഉറക്കവും പ്രത്യാശ നിറഞ്ഞ ഒരു പുതിയ പ്രഭാതവും ഞങ്ങൾക്ക് നൽകണമേ. ഞങ്ങളുടെ പ്രാർത്ഥനകൾ കേട്ട് ഞങ്ങളെ അനുഗ്രഹിക്കുന്ന നല്ല ദൈവമേ, അങ്ങയുടെ പരിശുദ്ധ നാമം എന്നേക്കും സ്തുതിക്കപ്പെടട്ടെ...
ആമേൻ

1 സ്വർഗ്ഗ. 1 നന്മ.