ഉറങ്ങും മുൻപ്.........എന്റെ സ്‌നേഹിതരേ, നിങ്ങളോടു ഞാന്‍ പറയുന്നു, ശരീരത്തെ കൊല്ലുന്നതില്‍ക്കവിഞ്ഞ്‌ ഒന്നും ചെയ്യാന്‍ കഴിയാത്തവരെ നിങ്ങള്‍ ഭയപ്പെടേണ്ടാ

പിതാവിന്റെയും പുത്രന്റെയും പരിശുദ്ധാത്മാവിന്റെയും നാമത്തിൽ... ആമേൻ
സ്വർഗ്ഗസ്ഥനായ ഞങ്ങളുടെ നല്ല ദൈവമേ... ഈ നല്ല രാത്രിയിൽ അങ്ങയുടെ സന്നിധിയിൽ ഞങ്ങൾ ഒന്നിച്ചുചേരുന്നു. പകൽ മുഴുവൻ ഞങ്ങളെ കാത്തുപരിപാലിച്ച അങ്ങയുടെ അളവറ്റ കാരുണ്യത്തിന് ഞങ്ങൾ നന്ദി പറയുന്നു.
നാഥാ, അങ്ങയുടെ തിരുവചനം ഞങ്ങളെ ഓർമ്മിപ്പിക്കുന്നു: "എന്റെ സ്‌നേഹിതരേ, നിങ്ങളോടു ഞാന്‍ പറയുന്നു, ശരീരത്തെ കൊല്ലുന്നതില്‍ക്കവിഞ്ഞ്‌ ഒന്നും ചെയ്യാന്‍ കഴിയാത്തവരെ നിങ്ങള്‍ ഭയപ്പെടേണ്ടാ. ഈ വചനത്തിന്റെ ശക്തിയാൽ ഞങ്ങളുടെ ഹൃദയങ്ങളെ അവിടുന്ന് നിറയ്ക്കണമേ.
ഈ ലോകത്തിലെ പ്രതിസന്ധികളെയോ, രോഗങ്ങളെയോ, ശത്രുക്കളെയോ ഓർത്ത് ഭയപ്പെടാതെ, ഞങ്ങളുടെ ആത്മാവിനെ കാത്തുസൂക്ഷിക്കുന്ന അങ്ങയിൽ മാത്രം പൂർണ്ണമായി ആശ്രയിക്കാൻ ഞങ്ങളെ പഠിപ്പിക്കണമേ. മനുഷ്യർക്കോ ലോകത്തിനോ തകർക്കാൻ കഴിയാത്ത ആത്മീയ ധൈര്യം ഞങ്ങൾക്ക് നൽകണമേ. അങ്ങയുടെ സ്നേഹിതർ എന്ന് ഞങ്ങളെ വിളിച്ചതിന് അങ്ങേക്ക് ഞങ്ങൾ നന്ദി പറയുന്നു. ആ സൗഹൃദത്തിന് യോഗ്യരായി ജീവിക്കാൻ ഞങ്ങളെ അനുഗ്രഹിക്കണമേ.
ഇന്ന് രാത്രിയിൽ എല്ലാ ഭയങ്ങളിൽ നിന്നും ആശങ്കകളിൽ നിന്നും ഞങ്ങളുടെ മനസ്സിനെ മോചിപ്പിക്കണമേ. അങ്ങയുടെ തിരുക്കരങ്ങളിൽ ഞങ്ങളുടെ ശരീരത്തെയും ആത്മാവിനെയും സമർപ്പിക്കുന്നു. അങ്ങയുടെ ദൂതന്മാരെ അയച്ച് ഞങ്ങളുടെ ഭവനത്തെയും പ്രിയപ്പെട്ടവരെയും കാത്തുപരിപാലിക്കണമേ. പ്രത്യാശയോടെയും സമാധാനത്തോടെയും ഉറങ്ങാനും, പുതുശക്തിയോടെ നാളെ ഉണരാനും ഞങ്ങളെ സഹായിക്കണമേ.
ഞങ്ങളുടെ രക്ഷകനും നാഥനുമായ ഈശോമിശിഹാ വഴി ഞങ്ങൾ സമർപ്പിക്കുന്ന പ്രാർത്ഥന കേട്ടരുളണമേ... ആമേൻ