ഉറങ്ങും മുൻപ്.........ആകാശ വും ഭൂമിയും കടന്നുപോകും. എന്നാല്‍, എന്റെ വചനങ്ങള്‍ കടന്നുപോവുകയില്ല

കരുണാ സമ്പന്നനായ ഞങ്ങളുടെ സ്വർഗ്ഗീയ പിതാവേ...
"ആകാശവും ഭൂമിയും കടന്നുപോകും; എന്നാൽ എന്റെ വചനങ്ങൾ കടന്നുപോവുകയില്ല" എന്ന് അരുളിച്ചെയ്ത ജീവനുള്ള ദൈവമേ,
ഈ പകൽ മുഴുവൻ അവിടുന്ന് ഞങ്ങൾക്ക് നൽകിയ എല്ലാ നന്മകൾക്കും കാവലിനും ഞങ്ങൾ നന്ദി പറയുന്നു. സൂര്യൻ അസ്തമിക്കുകയും ഇരുൾ പരക്കുകയും ചെയ്യുന്ന ഈ സന്ധ്യാസമയത്ത്, ലോകത്തിലെ സകലതും മാറിപ്പോകുന്നവയും താൽക്കാലികവുമാണെന്ന് ഞങ്ങൾ തിരിച്ചറിയുന്നു.
കർത്താവേ, ഞങ്ങളുടെ ജീവിതത്തിലെ പ്രതിസന്ധികളിലും തകർച്ചകളിലും മാഞ്ഞുപോകാത്ത അങ്ങയുടെ തിരുവചനത്തിൽ മാത്രം ആശ്രയിക്കാൻ ഞങ്ങളെ പഠിപ്പിക്കണമേ. മാറിക്കൊണ്ടിരിക്കുന്ന ഈ ലോകത്തിൽ മാറാത്ത അങ്ങയുടെ വാഗ്ദാനങ്ങൾ ഞങ്ങൾക്ക് കോട്ടയും അഭയവുമായിരിക്കട്ടെ. അങ്ങയുടെ വചനത്തിന്റെ വെളിച്ചം ഞങ്ങളുടെ ഹൃദയങ്ങളിലും ഈ ഭവനത്തിലും നിറയ്ക്കണമേ.
ഈ രാത്രിയിൽ ഞങ്ങളുടെ മേലും ഞങ്ങളുടെ കുടുംബാംഗങ്ങളുടെ മേലും അങ്ങയുടെ സംരക്ഷണം ഉണ്ടായിരിക്കട്ടെ. എല്ലാ തിന്മകളിൽ നിന്നും ഭയങ്ങളിൽ നിന്നും ഞങ്ങളെ കാത്തുപാലിക്കണമേ. അങ്ങയുടെ അനശ്വരമായ വചനത്തിൽ വിശ്വസിച്ച്, സമാധാനത്തോടെ ഉറങ്ങാൻ ഞങ്ങളെ അനുഗ്രഹിക്കണമേ... ആമേൻ