ഉറങ്ങും മുൻപ്.........നിന്റെ പ്രയത്നം കര്‍ത്താവില്‍ അര്‍പ്പിക്കുക;നിന്റെ പദ്ധതികള്‍ ഫലമണിയും

അത്യുന്നതനും സർവ്വശക്തനുമായ ഞങ്ങളുടെ ദൈവമേ... കരുണാനിധിയായ ഞങ്ങളുടെ സ്വർഗ്ഗീയ പിതാവേ, ഈ സന്ധ്യാസമയത്ത് അങ്ങയുടെ സന്നിധിയിൽ ഞങ്ങൾ ഒന്നിച്ചുചേർന്ന് അങ്ങയെ ആരാധിക്കുന്നു. ഈ പകൽ മുഴുവൻ ഞങ്ങളെ കാത്ത് പരിപാലിച്ച അങ്ങേയ്ക്ക് നന്ദി പറയുന്നു, എല്ലാ അപകടങ്ങളിൽ നിന്നും ദോഷങ്ങളിൽ നിന്നും രോഗങ്ങളിൽ നിന്നും ഞങ്ങളെ കാത്ത അങ്ങയുടെ വലിയ സ്നേഹത്തിന് ഞങ്ങൾ നന്ദി പറയുന്നു. ഞങ്ങൾ അറിഞ്ഞും അറിയാതെയും ചെയ്തുപോയ എല്ലാ തെറ്റുകളും കുറവുകളും ക്ഷമിച്ച്, അങ്ങയുടെ തിരുരക്തത്താൽ ഞങ്ങളെ ശുദ്ധീകരിക്കണമേ.
"നിന്റെ പ്രയത്‌നം കര്‍ത്താവില്‍ അര്‍പ്പിക്കുക; നിന്റെ പദ്‌ധതികള്‍ ഫലമണിയും"  എന്ന അങ്ങയുടെ തിരു വചനം ഈ നിമിഷം ഞങ്ങൾ പൂർണ്ണ ഹൃദയത്തോടെ ഏറ്റുപറഞ്ഞ് പ്രാർത്ഥിക്കുന്നു. കർത്താവേ, ഞങ്ങളുടെ സ്വന്തം ജ്ഞാനത്തിലോ, കഴിവിലോ, മനുഷ്യസഹായത്തിലോ അല്ല, അങ്ങയുടെ വാഗ്ദാനങ്ങളിലാണ് ഞങ്ങൾ ആശ്രയിക്കുന്നത്. ഞങ്ങളുടെ ജീവിതത്തിലെ എല്ലാ പ്രയത്നങ്ങളും, അധ്വാനങ്ങളും, ഞങ്ങൾ എടുത്തുപോന്ന എല്ലാ തീരുമാനങ്ങളും അങ്ങയുടെ തൃക്കരങ്ങളിൽ പൂർണ്ണമായി സമർപ്പിക്കുന്നു. ഞങ്ങളുടെ ഭാവിയെക്കുറിച്ചുള്ള എല്ലാ പദ്ധതികളും അങ്ങയുടെ തിരുഹിതത്തിന് അനുസൃതമായി വഴിനടത്തണമേ.
നാഥാ, ഞങ്ങളുടെ മനസ്സിനെ അലട്ടുന്ന എല്ലാ ആശങ്കകളും ഭാരങ്ങളും അങ്ങയുടെ പാദങ്ങളിൽ ഞങ്ങൾ ഇറക്കിവെക്കുന്നു. ഞങ്ങളുടെ പ്രയത്നങ്ങളിൽ ഉണ്ടാകുന്ന തടസ്സങ്ങളും പരാജയഭീതികളും അങ്ങയുടെ നാമത്തിൽ ഞങ്ങൾ ദൂരെയകറ്റുന്നു. അങ്ങയുടെ പരിശുദ്ധാത്മാവിനാൽ ഞങ്ങളെ നിറയ്ക്കണമേ. വരും ദിവസങ്ങളിൽ ഞങ്ങൾ ചെയ്യുന്ന കാര്യങ്ങളിലെല്ലാം അങ്ങയുടെ കരം കൂടെയുണ്ടായിരിക്കട്ടെ. ഞങ്ങളുടെ വഴിയിലെ പ്രതിസന്ധികളെ മാറ്റി, അങ്ങയുടെ മഹത്വത്തിനായി ഞങ്ങളുടെ പദ്ധതികളെ ഫലമണിയിക്കണമേ.
ഈ രാത്രിയിൽ ഞങ്ങളുടെ ഭവനത്തെയും കുടുംബാംഗങ്ങളെയും അങ്ങയുടെ തിരുക്കരങ്ങളിൽ ഏൽപ്പിക്കുന്നു. എല്ലാ ഭയങ്ങളിൽ നിന്നും അശുദ്ധ ശക്തികളുടെ ശല്യങ്ങളിൽ നിന്നും അങ്ങയുടെ ദൂതന്മാരെ അയച്ച് ഞങ്ങൾക്ക് കാവൽ ഒരുക്കണമേ. സമാധാനപൂർണ്ണമായ ഉറക്കവും വിശ്രമവും ഞങ്ങൾക്ക് നൽകി, നാളത്തെ പുതിയ പുലരിയിൽ പുതിയ പ്രത്യാശയോടെയും വലിയ ആത്മീയ ശക്തിയോടെയും ഉണരുവാൻ ഞങ്ങളെ അനുഗ്രഹിക്കണമേ.
ഞങ്ങളുടെ രക്ഷകനും നാഥനുമായ ഈശോമിശിഹായുടെ അതിപരിശുദ്ധമായ നാമത്തിൽ ഞങ്ങൾ സമർപ്പിച്ചു പ്രാർത്ഥിക്കുന്നു...