ഉറങ്ങും മുൻപ്.........പിതാവിന്റെയും പുത്രന്റെയും പരിശുദ്ധാത്മാവിന്റെയും നാമത്തിൽ ആമേൻ

കാരുണ്യക്കടലായ ഞങ്ങളുടെ നല്ല ദൈവമേ... അങ്ങയുടെ അനന്തമായ സ്നേഹത്തെയും പരിപാലനയെയും ഓർത്ത് ഞങ്ങൾ അങ്ങയെ സ്തുതിക്കുന്നു. പകലിന്റെ അധ്വാനങ്ങൾക്കും യാത്രകൾക്കും ശേഷം ഈ സന്ധ്യാസമയത്ത് അങ്ങയുടെ സന്നിധിയിൽ ആയിരിക്കുവാൻ ഞങ്ങൾക്ക് നൽകിയ ഈ വലിയ കൃപയ്ക്കായി നന്ദി പറയുന്നു. ഈ ദിവസം മുഴുവൻ അവിടുന്ന് ഞങ്ങളെ കാത്തുപരിപാലിച്ച വലിയ സ്നേഹത്തെ ഞങ്ങൾ ഈ നിമിഷം കൃതജ്ഞതയോടെ സ്മരിക്കുന്നു.

“കര്‍ത്താവ്‌ എല്ലാവര്‍ക്കും നല്ലവനാണ്‌; തന്റെ സര്‍വസൃഷ്‌ടിയുടെയും മേല്‍ അവിടുന്നു കരുണ ചൊരിയുന്നു.”
സങ്കീര്‍ത്തനങ്ങള്‍ 145:9
 
അതേ നാഥാ, അങ്ങ് എല്ലാവർക്കും നല്ലവനാണ്. അങ്ങയുടെ നന്മയിൽ നിന്ന് ഒഴിഞ്ഞുമാറാൻ ഈ പ്രപഞ്ചത്തിൽ ആർക്കും സാധിക്കുകയില്ല. അവിടുന്ന് സൃഷ്ടിച്ച പ്രകൃതിയിലെ ജീവജാലങ്ങൾക്കും, പ്രകാശത്തിനും, കാറ്റിനും, ജലത്തിനും ഉപരിയായി, അങ്ങയുടെ സ്വന്തം സാദൃശ്യത്തിൽ അങ്ങ് സൃഷ്ടിച്ച ഞങ്ങളുടെമേൽ അവിടുന്ന് ചൊരിയുന്ന കാരുണ്യം എത്രയോ വലുതാണ്. ഞങ്ങളുടെ യോഗ്യതകൾ നോക്കിയല്ല, മറിച്ച് അങ്ങയുടെ അളവറ്റ ദയയാലാണ് ഞങ്ങൾ ജീവിക്കുന്നത്. ഈ ലോകത്തിലെ സകല സൃഷ്ടികളിലും അങ്ങയുടെ സ്നേഹത്തിന്റെ കൈയൊപ്പ് ഞങ്ങൾ ദർശിക്കുന്നു. 
സ്നേഹനിധിയായ ദൈവമേ, അങ്ങ് ഞങ്ങളോട് ഇത്രമാത്രം നന്മയും കരുണയും കാണിച്ചിട്ടും, ഈ പകൽസമയത്ത് ഞങ്ങളുടെ ചിന്തകളാലോ, വാക്കുകളാലോ, പ്രവൃത്തികളാലോ അങ്ങയുടെ തിരുമനസ്സിന് വിരുദ്ധമായി പ്രവർത്തിച്ചിട്ടുണ്ടെങ്കിൽ ഞങ്ങളോട് ക്ഷമിക്കണമേ. അങ്ങയുടെ കാരുണ്യത്തിന്റെ തണലിൽ നിന്ന് ഞങ്ങൾ അകന്നുപോയ നിമിഷങ്ങളെ ഓർത്ത് ഞങ്ങൾ മനസ്താപപ്പെടുന്നു. അങ്ങയുടെ പരിശുദ്ധമായ രക്തത്താൽ ഞങ്ങളുടെ പാപക്കറകളെ കഴുകി വെടിപ്പാക്കണമേ. അങ്ങയുടെ അനന്തമായ കരുണയിൽ ഞങ്ങളെ വീണ്ടും ചേർത്തുകൊള്ളണമേ. 
കർത്താവേ, ഈ സന്ധ്യാസമയത്ത് ഞങ്ങളുടെ കുടുംബത്തെയും, ഞങ്ങളുമായി ബന്ധപ്പെട്ട എല്ലാവരെയും അങ്ങയുടെ തിരുസന്നിധിയിൽ സമർപ്പിക്കുന്നു. ഞങ്ങളുടെ ഭവനത്തിൽ അങ്ങയുടെ സമാധാനവും സന്തോഷവും നിറയ്ക്കണമേ. ഈ രാത്രിയിൽ ഞങ്ങൾക്ക് ആവശ്യമായ വിശ്രമവും സുരക്ഷിതത്വവും നൽകണമേ. രോഗികളായി കഴിയുന്നവരെയും, ദുഃഖിക്കുന്നവരെയും, ഒറ്റപ്പെടൽ അനുഭവിക്കുന്നവരെയും അവിടുന്ന് പ്രത്യേകം അങ്ങയുടെ കരുണയാൽ ആശ്വസിപ്പിക്കണമേ. സകല സൃഷ്ടികളുടെയും മേൽ കരുണ ചൊരിയുന്ന ദൈവമേ, പ്രകൃതിക്ഷോഭങ്ങളിൽ നിന്നും, രോഗാതുരിതങ്ങളിൽ നിന്നും, സകലവിധ തിന്മകളുടെ ശക്തികളിൽ നിന്നും ഞങ്ങളെയും ഈ ലോകത്തെ മുഴുവനെയും കാത്തുരക്ഷിക്കണമേ.
നാഥാ, അങ്ങയുടെ നന്മയിൽ വിശ്വസിച്ച് ഈ രാത്രിയിൽ ഞങ്ങൾ ഉറങ്ങാൻ കിടക്കുമ്പോൾ, അങ്ങയുടെ മാലാഖമാരുടെ കാവൽ ഞങ്ങൾക്ക് നൽകണമേ. നാളെ പ്രഭാതത്തിൽ അങ്ങയെ സ്തുതിക്കുവാനും, അങ്ങയുടെ നന്മ ലോകത്തോട് വിളിച്ചുപറയുവാനും പുതിയൊരു ദിവസം കൂടി ഞങ്ങൾക്ക് ദാനമായി നൽകണമേ. ഞങ്ങളുടെ പ്രാർത്ഥനകൾ അങ്ങയുടെ തിരുസന്നിധിയിൽ അർപ്പിക്കുന്നു... ആമേൻ