ഉറങ്ങും മുൻപ്.........നിങ്ങളുടെ പിതാക്കന്മാരുടെ ദൈവമായ കര്ത്താവു നിങ്ങളെ ആയിരം മടങ്ങു വര്ധിപ്പിക്കുകയും അവിടുന്നു വാഗ്ദാനം ചെയ്തിട്ടുള്ളതു പോലെ നിങ്ങളെ അനുഗ്രഹിക്കുകയും ചെയ്യട്ടെ!
ഞങ്ങളുടെ നല്ല ഈശോയെ... അവിടുത്തെ ഞങ്ങൾ സ്തുതിച്ചു പ്രാർത്ഥിക്കുന്നു. ജീവിതത്തിൽ സഹനങ്ങൾ കടന്നു വരുമ്പോൾ പലപ്പോഴും ഞങ്ങൾ അവിടുത്തെ വിട്ട് അകന്നു പോകുന്നു. ഭൂമിയിലേയ്ക്ക് ജനിക്കുവാൻ ഇടം പോലും ലഭിയ്ക്കാത്ത അവസ്ഥയിൽ ദൈവ പുത്രൻ കടന്നു വന്നിട്ടും, ആദ്യ ദിനങ്ങളിൽ തന്നെ ശിശുവിനെയും കൊണ്ട് പലായനം ചെയ്യേണ്ടി വന്നിട്ടും തിരുകുടുംബം അങ്ങയുടെ തീരുമാനത്തോട് പ്രതികൂലമായി നിലകൊണ്ടില്ല. ദൈവത്തെ തള്ളി പറഞ്ഞുമില്ല. പിതാവേ, തിരുകുടുംബത്തിന്റെ മാതൃകയിൽ ഉള്ള ഒരു ദൈവ വിശ്വാസം ഞങ്ങളിൽ വളർന്നു വരുവാൻ അവിടുന്ന് കൃപ നല്കണമേ. ഞങ്ങളുടെ ജീവിതത്തിൽ ഇന്ന് വരെ കടന്നു വന്നിട്ടുള്ള എല്ലാ സഹനങ്ങളെയും അവിടുത്തെ സന്നിധിയിൽ സമർപ്പിച്ചു പ്രാർത്ഥിക്കുന്നു. ദൈവമേ ഓരോ സഹനത്തെയും അവിടുന്ന് അനുഗ്രഹമാക്കി മാറ്റണമേ. സ്വർഗ്ഗ രാജ്യത്തിൽ ഞങ്ങളുടെ സമ്പത്തു വർദ്ധിപ്പിക്കുവാൻ സഹനങ്ങൾ ഞങ്ങൾക്ക് ഉപകാരമായി മാറട്ടെ. നാഥാ, സഹിക്കുവാൻ ആകാത്ത വേദനകൾ അവിടുന്ന് ഞങ്ങൾക്ക് നൽകരുതേ. വേദനയുടെ നിമിഷങ്ങളിൽ അവിടുത്തെ വിളിച്ചു അപേക്ഷിക്കുമ്പോൾ ഇതാ ഞാൻ എന്ന് അവിടുന്ന് മറുപടി നൽകണമേ. ഭയത്തിന്റെയും സങ്കടത്തിന്റെയും അവസ്ഥകളിൽ നിന്നും ഞങ്ങളെ മോചിപ്പിക്കണമേ. സ്വർഗ്ഗത്തിന്റെ സന്തോഷത്തിൽ ആയിരിക്കുവാൻ പിതാവേ, ഞങ്ങളെ അനുഗ്രഹിക്കണമേ... ആമേൻ