വിണ്ടും ഇറാന് ആക്രമണം; വിജയകരമായി പ്രതിരോധിച്ച് കുവൈത്തും ബഹ്റൈനും
കുവൈത്ത് സിറ്റി: ഇറാന് ആക്രമണങ്ങളെ വിജയകരമായി പ്രതിരോധിച്ച് കുവൈത്തും ബഹ്റൈനും. ആക്രമണത്തില് കുവൈത്തിന്റെ വ്യോമപ്രതിരോധ സംവിധാനങ്ങള് അടിയന്തരമായി സജ്ജമാക്കുകയും ശത്രുക്കളുടെ മിസൈലുകളും ഡ്രോണുകളും ആകാശത്തുതന്നെ തകര്ക്കുകയും ചെയ്തതായി കുവൈത്ത് സായുധസേനയുടെ ജനറല് കമാന്ഡ് അറിയിച്ചു.
നിശ്ചിത പ്രവര്ത്തനക്രമങ്ങള് പാലിച്ചാണ് രാജ്യം വ്യോമാക്രമണങ്ങളെ നേരിട്ടത്. അനാവശ്യ ഭീതി ഒഴിവാക്കാന് ജനങ്ങള് ഔദ്യോഗിക കേന്ദ്രങ്ങളില് നിന്നുള്ള വിവരങ്ങള് മാത്രം ആശ്രയിക്കണമെന്നും സുരക്ഷാ ഉദ്യോഗസ്ഥര് നല്കുന്ന നിര്ദേശങ്ങള് കൃത്യമായി പാലിക്കണമെന്നും അധികൃതര് കര്ശന നിര്ദേശം നല്കി.
അതേസമയം, ഇറാന്റെ ഭാഗത്തുനിന്നുണ്ടായ ശക്തമായ വ്യോമാക്രമണങ്ങളെ ബഹ്റൈന് സൈന്യവും വിജയകരമായി പ്രതിരോധിച്ചു. പുലര്ച്ചെയോടെ രാജ്യത്ത് വ്യോമാക്രമണ മുന്നറിയിപ്പ് നല്കുന്ന സൈറണുകള് മുഴങ്ങിയതായി ബഹ്റൈന് ആഭ്യന്തര മന്ത്രാലയം വ്യക്തമാക്കി. സുരക്ഷിതമായ ഇടങ്ങളിലേക്ക് അടിയന്തരമായി മാറാന് ജനങ്ങള്ക്ക് മന്ത്രാലയം നിര്ദേശം നല്കിയിട്ടുണ്ട്. ഇറാന്റെ വ്യോമാക്രമണങ്ങളെ ബഹ്റൈന്റെ വ്യോമപ്രതിരോധ സംവിധാനം നേരിട്ടതായും വിജയകരമായി പ്രതിരോധിച്ചതായും ബഹ്റൈന് രാജാവിന്റെ മാധ്യമ ഉപദേശകന് സ്ഥിരീകരിച്ചു.