പശ്ചിമ ബംഗാളില്‍ ക്രൈസ്തവ കുടുംബങ്ങള്‍ക്കു നേരെ ആക്രമണം: സംരക്ഷണം ഏര്‍പ്പെടുത്തി പോലീസ്
മിഡ്നാപൂര്‍: പശ്ചിമ ബംഗാളില്‍ ക്രൈസ്തവ വിശ്വാസം ഉപേക്ഷിക്കുവാന്‍ ആവശ്യപ്പെട്ട് തീവ്രഹിന്ദുത്വവാദികള്‍ ആക്രമണം നടത്തിയ ബംഗാളിലെ ക്രിസ്ത്യന്‍ കുടുംബങ്ങള്‍ക്ക് പോലീസ് സംരക്ഷണം.
പാസ്‌കിം മിഡ്നാപൂര്‍ ജില്ലയില്‍ ക്രിസ്ത്യന്‍ കുടുംബങ്ങള്‍ക്കുനേരെ തീവ്ര ഹിന്ദുത്വ സംഘടനയായ ബജ്രംഗ്ദള്‍ പ്രവര്‍ത്തകര്‍ ആക്രമണം നടത്തിയെന്ന ആരോപണത്തില്‍ പോലീസ് എഫ്.ഐ.ആര്‍ (എകഞ) രജിസ്റ്റര്‍ ചെയ്ത ശേഷമാണ്, ഇരകളായ കുടുംബങ്ങള്‍ക്ക് പോലീസ് സംരക്ഷണം ഏര്‍പ്പെടുത്തിയത്. കഴിഞ്ഞ ശനിയാഴ്ച ഇവരുടെ വീടുകള്‍ക്ക് പുറത്ത് പോലീസ് ഉദ്യോഗസ്ഥരെ വിന്യസിച്ചുകൊണ്ടാണ് സംരക്ഷണം നല്‍കിയത്.
യേശുക്രിസ്തുവിലുള്ള വിശ്വാസം ഉപേക്ഷിക്കണമെന്ന് ആവശ്യപ്പെട്ട്, പ്രായപൂര്‍ത്തിയാകാത്ത കുട്ടികളടങ്ങിയ മൂന്ന് കുടുംബങ്ങളെ ആക്രമിച്ചുവെന്നും, ബലാത്സംഗ ഭീഷണിയും വധഭീഷണിയും മുഴക്കിയെന്നും ആരോപിച്ച് ക്രൈസ്തവ വിശ്വാസിയായ സ്ത്രീ നല്‍കിയ പരാതിയുടെ അടിസ്ഥാനത്തിലാണ് ഒക്ടോബര്‍ 20-ന് ചന്ദ്രകോണ പോലീസ് സ്റ്റേഷനില്‍ എഫ്.ഐ.ആര്‍ രജിസ്റ്റര്‍ ചെയ്തു കേസെടുത്തത്.
എഫ്.ഐ.ആറില്‍ പതിമൂന്ന് പേരെ പ്രതിചേര്‍ത്തിട്ടുണ്ട്. പരാതിക്കാരിയുടെ മൊഴിപ്രകാരം ഇവര്‍ ബജ്രംഗ്ദളുമായി ബന്ധമുള്ളവരാണെന്ന് സ്ഥിരീകരിച്ചിട്ടുണ്ട്. കുടുംബങ്ങള്‍ക്ക് പോലീസ് സംരക്ഷണം നല്‍കിയിട്ടുണ്ടെങ്കിലും, ഇതുവരെ ആരെയും അറസ്റ്റ് ചെയ്തിട്ടില്ലായെന്ന് ബംഗിയ ക്രിസ്റ്റിയ പരിസേബ' എന്ന സംഘടനയുടെ സ്ഥാപകനായ ഹെറോദ് മല്ലിക്ക് 'ഹിന്ദു' ദിനപത്രത്തോട് വെളിപ്പെടുത്തി.
ഒക്ടോബര്‍ 18-ന് തുടങ്ങിയ ആക്രമണങ്ങള്‍ ഒക്ടോബര്‍ 20 വരെ നീണ്ടുനിന്നതായി പരാതിക്കാരിയായ സ്ത്രീ വെളിപ്പെടുത്തിയിരിന്നു. പ്രതികള്‍ വീട്ടില്‍ അതിക്രമിച്ചുകയറി, ക്രൈസ്തവ വിശ്വാസം ഉപേക്ഷിച്ച് ഹിന്ദുമതത്തിലേക്ക് മടങ്ങാന്‍ തന്റെ കുടുംബത്തെ നിര്‍ബന്ധിച്ചുവെന്നും 'ശുദ്ധീകരണ ചടങ്ങ്' എന്ന പേരില്‍, എല്ലാവരുടെയും മുന്നില്‍വെച്ച് ബലമായി കുളിപ്പിച്ചതായും പരാതിയുണ്ടായിരിന്നു. ദുര്‍ഗ്ഗാ പൂജ പന്തലിലേക്ക് പ്രതികള്‍ തങ്ങളെ നിര്‍ബന്ധിച്ച് കൊണ്ടുപോയെന്നും, അവിടെവെച്ച് ബലപ്രയോഗത്തിലൂടെ ഹിന്ദു ആചാരങ്ങള്‍ ചെയ്യാന്‍ നിര്‍ബന്ധിതരാക്കിയെന്നും അവര്‍ ആരോപിച്ചു.
ചന്ദ്രകോണയിലെ കുടുംബങ്ങള്‍ അവരുടെ വിശ്വാസത്തിന്റെ പേരില്‍ ആക്രമിക്കപ്പെടുന്നത് പതിവാണെന്നും കഴിഞ്ഞ ഏതാനും മാസങ്ങള്‍ക്കുള്ളില്‍ ക്രിസ്ത്യാനികള്‍ക്ക് നേരെ ഇത്തരത്തിലുള്ള 45 ആക്രമണങ്ങള്‍ നടന്നിട്ടുണ്ടെന്നും ഹെറോദ് മല്ലിക്ക് വെളിപ്പെടുത്തി. സംഭവത്തില്‍ ക്രിയാത്മക നടപടിയുണ്ടാകുമെന്ന പ്രതീക്ഷയിലാണ് മേഖലയിലെ ക്രൈസ്തവര്‍.