റഷ്യന്‍ റോക്കറ്റ് ഡ്രോണ്‍ ആക്രമണങ്ങളില്‍ കിയെവില്‍ 23 പേരെങ്കിലും കൊല്ലപ്പെട്ടു
ഉക്രൈന്‍:ഉക്രൈന്‍ തലസ്ഥാനമായ കിയെവിന് നേരെ റഷ്യ കഴിഞ്ഞ ദിവസം നടത്തിയ അക്രമങ്ങളില്‍ കുട്ടികളുള്‍പ്പെടെ ഇരുപത്തിമൂന്ന് പേരെങ്കിലും മരണമടഞ്ഞുവെന്നും അടുത്തിടെയുണ്ടായ ആക്രമണങ്ങളില്‍ ഏറ്റവും രൂക്ഷമായതാണ് വ്യാഴാഴ്ച രാത്രിയുണ്ടായതെന്നും വെള്ളിയാഴ്ച ഉക്രൈന്‍ അറിയിച്ചു.
കിയെവിലെ ബ്രിട്ടീഷ് കൗണ്‍സില്‍, യൂറോപ്യന്‍ യൂണിയന്‍ എന്നിവയുടെ ഓഫീസുകള്‍ക്കും ആക്രമണത്തില്‍ കേടുപാടുകള്‍ ഉണ്ടായെന്നും ഉക്രൈന്‍ വ്യക്തമാക്കി. സംഭവത്തെത്തുടര്‍ന്ന് ബ്രിട്ടനും യൂറോപ്യന്‍ യൂണിയനും റഷ്യയിലേക്കുള്ള തങ്ങളുടെ പ്രതിനിധികളെ വിളിച്ചുവരുത്തി.
ജനവാസപ്രദേശങ്ങളില്‍ ഉണ്ടായ അതിഭീകരമായ ഈ ആക്രമണം മുന്നറിയിപ്പില്ലാതെയാണ് നടന്നതെന്നും, ആക്രമണത്തിന്റെ ഇരകളായവര്‍ തകര്‍ന്ന കെട്ടിടങ്ങള്‍ക്കുള്ളില്‍ അകപ്പെട്ടിരിക്കുകയാണെന്നും സംഭവത്തെക്കുറിച്ച് പ്രദേശത്തുനിന്നുള്ള ആളുകള്‍ അറിയിച്ചു.
സംഭവത്തെക്കുറിച്ച് പരാമര്‍ശിച്ച ഉക്രൈന്‍ പ്രസിഡന്റ് വോളോദിമീര്‍ സെലെന്‍സ്‌കി, മിസൈലുകള്‍ക്കും ഡ്രോണുകള്‍ക്കും വേണ്ടി റഷ്യ നയതന്ത്രത്തെ തള്ളിപ്പറയുകയാണെന്നും, വടക്കന്‍ കൊറിയ പോലെയുള്ള രാജ്യങ്ങളുമായുള്ള ബന്ധം കൂടുതല്‍ ശക്തിപ്പെടുത്തുകയെന്നും കുറ്റപ്പെടുത്തി.
കൊലപാതകത്തിന് ഉത്തരവാദികളായവര്‍ സ്വതന്ത്രരായി രക്ഷപെടാതിരിക്കുന്നതിനുള്ള നടപടികള്‍ ഉണ്ടാകണമെന്നും കൂടുതല്‍ ശക്തമായ ഉപരോധം ഏര്‍പ്പെടുത്തണമെന്നും അദ്ദേഹം ആവശ്യപ്പെട്ടു.
കോപ്പന്‍ഹേഗനില്‍ നടന്ന സമ്മേളനത്തില്‍ യൂറോപ്പിനെ പ്രതിനിധീകരിച്ച് യൂറോപ്പിന്റെ വിദേശകാര്യനയമേധാവി കാജാ കല്ലാസ്, ഉക്രൈന്‍ പ്രസിഡന്റിന്റെ പ്രതികരണം ഏറ്റെടുത്ത് 'സമാധാനത്തിനായുള്ള ശ്രമങ്ങളെ പുട്ടിന്‍ പരിഹസിക്കുകയാണെന്നാണ് ഈ ആക്രമണങ്ങള്‍ വ്യക്തമാക്കുന്നതെന്ന്' കുറ്റപ്പെടുത്തുകയും റഷ്യയുടെ മേലുള്ള സമ്മര്‍ദ്ധം വര്‍ദ്ധിപ്പിക്കുകയാണ് വേണ്ടതെന്ന് അഭിപ്രായപ്പെടുകയും ചെയ്തു.