കന്യാസ്ത്രീകളുടെ അറസ്റ്റ്: ഭരണഘടനയെ വെല്ലുവിളിക്കുന്ന നടപടി. രാജ്യത്തെ ഭരണാധികാരികള്‍ പ്രതികരിക്കാന്‍ തയ്യാറാകണം; ബസേലിയോഴ്‌സ് ക്ലീമിസ് ബാവ
കൊച്ചി: ഛത്തീസ്ഗഡില്‍ മനുഷ്യക്കടത്ത് ആരോപിച്ച് മലയാളികളായ സിസ്റ്റര്‍മാരെ അറസ്റ്റ് ചെയ്ത സംഭവം ഭരണഘടനയെ വെല്ലുവിളിക്കുന്ന നടപടിയെന്ന് കര്‍ദിനാള്‍ ബസേലിയോഴ്‌സ് ക്ലീമിസ് കത്തോലിക്കാ ബാവ.
കന്യാസ്ത്രീകളെ അറസ്റ്റുചെയ്ത നടപടിയില്‍ കത്തോലിക്കാ സഭ ഒന്നാകെ കടുത്ത പ്രതിഷേധം രേഖപ്പെടുത്തുന്നുവെന്നും അദ്ദേഹം പറഞ്ഞു. സംഭവത്തില്‍ മാധ്യമങ്ങളോട് പ്രതികരിക്കുകയായിരുന്നു അദ്ദേഹം.
''ഈ സംഭവത്തില്‍ നടന്നിരിക്കുന്നത് കടുത്ത ഭരണഘടനാ ലംഘനമാണ്. ഭാരതത്തിലെ സ്വതന്ത്ര ജീവിതത്തോടുള്ള കടന്നു കയറ്റമാണിത്. രാജ്യത്ത് മതന്യൂനപക്ഷങ്ങള്‍ക്കെതിരായ അതിക്രമങ്ങള്‍ ദിനം പ്രതി വര്‍ധിച്ച് വരികയാണ്. ഇതില്‍ കടുത്ത അമര്‍ഷം സഭയുടെ ഭാഗമായി രേഖപ്പെടുത്തുന്നു''. അദ്ദേഹം ചൂണ്ടിക്കാട്ടി.
''ഇവിടെ മത സ്വതന്ത്ര്യം നടപ്പിലാക്കണം. മനുഷ്യാവകാശത്തിനു മേലുള്ള കടന്നുകയറ്റം ആണ് നടന്നിരിക്കുന്നത്.
രാജ്യത്തിന്റെ സംസ്‌കൃതിയെ തകര്‍ക്കുന്ന നടപടിയില്‍ രാജ്യം ഭരിക്കുന്ന ഭരണാധികാരികള്‍ സംഭവത്തില്‍ പ്രതികരിക്കാന്‍ തയ്യാറാകണമെന്നും ശക്തമായ നടപടി ഉണ്ടാകണമെന്നും'' അദ്ദേഹം മാധ്യമങ്ങളോടായി പറഞ്ഞു.