അനാവശ്യ ചിന്തകൾ അലട്ടുന്നുണ്ടോ? മനസ്സിനെ ശാന്തമാക്കാൻ ചില വഴികൾ

നമ്മുടെ ആഗ്രഹത്തിന് വിരുദ്ധമായി പെട്ടെന്ന് മനസ്സിലേക്ക് കടന്നുവരുന്ന അനാവശ്യമായ ചിന്തകൾ പലപ്പോഴും വലിയ അസ്വസ്ഥതകളുണ്ടാക്കാറുണ്ട്. ഭയമോ, കുറ്റബോധമോ, ആശങ്കയോ ഒക്കെയാണ് ഇത്തരം ചിന്തകൾ സമ്മാനിക്കുന്നത്. ഇവയെ എങ്ങനെ ഫലപ്രദമായി നേരിടാമെന്നും മാനസിക സമാധാനം വീണ്ടെടുക്കാമെന്നും പരിശോധിക്കാം.

എന്താണ് അനാവശ്യ ചിന്തകൾ?

മനസ്സിന്റെ നിയന്ത്രണത്തിലല്ലാതെ കടന്നുവരുന്ന അസ്വാഭാവികമായ ചിന്തകളാണിവ. ഇവ പലപ്പോഴും നമ്മുടെ സ്വഭാവവുമായോ മൂല്യങ്ങളുമായോ ബന്ധമുള്ളതാകണമെന്നില്ല. ഇത്തരം ചിന്തകൾ ഉണ്ടാകുന്നത് സാധാരണമാണെന്നും എന്നാൽ അവയെ എങ്ങനെ കൈകാര്യം ചെയ്യുന്നു എന്നതിലാണ് കാര്യമെന്നും മനഃശാസ്ത്ര വിദഗ്ധർ ചൂണ്ടിക്കാട്ടുന്നു.

അനാവശ്യ ചിന്തകളെ നേരിടാൻ ചില നിർദ്ദേശങ്ങൾ

അംഗീകരിക്കുക

ഇത്തരം ചിന്തകൾ മനസ്സിലേക്ക് വരുമ്പോൾ അവയെ പ്രതിരോധിക്കാനോ പേടിക്കാനോ ശ്രമിക്കാതെ, അതൊരു ചിന്ത മാത്രമാണെന്ന് തിരിച്ചറിയുക. “എനിക്ക് ഇപ്പോൾ അനാവശ്യമായ ഒരു ചിന്ത വന്നു” എന്ന് സ്വയം പറയുന്നതിലൂടെ അതിന്റെ തീവ്രത കുറയ്ക്കാം.

ചിന്തകളല്ല നിങ്ങൾ

നിങ്ങളുടെ മനസ്സിലേക്ക് വരുന്ന എല്ലാ ചിന്തകളും നിങ്ങളുടെ വ്യക്തിത്വമല്ല. ഒരു വിമാനം ആകാശത്തു കൂടെ പറന്നുപോകുന്നതുപോലെ ഈ ചിന്തകളെ കടന്നുപോകാൻ അനുവദിക്കുക.

വർത്തമാനകാലത്ത് ജീവിക്കുക

ചിന്തകൾ ഭൂതകാലത്തേക്കോ ഭാവിയിലേക്കോ നിങ്ങളെ കൊണ്ടുപോകുമ്പോൾ, ശ്വസനത്തിലോ ചുറ്റുമുള്ള വസ്തുക്കളിലോ ശ്രദ്ധ കേന്ദ്രീകരിച്ച് വർത്തമാനകാലത്തിലേക്ക് മടങ്ങിവരിക.

പ്രാർഥനയും ധ്യാനവും

വിശ്വാസികളെ സംബന്ധിച്ചിടത്തോളം പ്രാർഥന വലിയൊരു ആശ്വാസമാണ്. മനസ്സിനെ അസ്വസ്ഥമാക്കുന്ന ചിന്തകൾ വരുമ്പോൾ ദൈവത്തോട് സഹായം തേടുന്നത് മനസ്സിന് കരുത്ത് നൽകും.

ഇത്തരം ചിന്തകൾ ദൈനംദിന ജീവിതത്തെ ബാധിക്കുന്ന തരത്തിൽ അമിതമാവുകയാണെങ്കിൽ ഒരു കൗൺസിലറുടെയോ ഡോക്ടറുടെയോ സഹായം തേടാൻ മടിക്കരുത്. മാനസികാരോഗ്യം ശാരീരിക ആരോഗ്യം പോലെ തന്നെ പ്രധാനമാണെന്ന് ഓർക്കുക.

നെഗറ്റീവ് ചിന്തകളെ പോസിറ്റീവ് പ്രവൃത്തികൾ കൊണ്ട് നേരിടുക എന്നതാണ് ഏറ്റവും വലിയ പോംവഴി. ഇഷ്ടമുള്ള വിനോദങ്ങളിൽ ഏർപ്പെടുക, സുഹൃത്തുക്കളുമായി സംസാരിക്കുക തുടങ്ങിയവ മനസ്സിനെ തിരിച്ചുവിടാൻ സഹായിക്കും. ശാന്തമായ മനസ്സോടെ ജീവിതത്തെ നേരിടാൻ ഇത്തരം കൊച്ചു മാറ്റങ്ങൾ വലിയ സഹായമാകും.