തേങ്ങ വില കുതിക്കുന്നതിനൊപ്പം അടയ്ക്ക വിലയും കുതിക്കുന്നു
കോട്ടയം: കേരളത്തില്‍ തേങ്ങയുടെ വില കുതിച്ചുയരുന്നതിനൊപ്പം അടയ്ക്കയുടെ വിലയും കുതിക്കുകയാണ്. സംസ്ഥാനത്തെ ചന്തകളില്‍ നാടന്‍ അടയ്ക്കയുടെ വരവ് കുറഞ്ഞതാണ് വില കുതിച്ചുയരാന്‍ കാരണമാകുന്നത്.
നിലവില്‍ ഒരു അടയ്ക്കാ വേണമെങ്കില്‍ 13 രൂപ നല്‍കേണ്ട സാഹചര്യമാണ്. ഒരാഴ്ച്ചയ്ക്കിടെയാണ് അടയ്ക്കയുടെ വിലയില്‍ ഇത്രയേറെ വര്‍ധനവുണ്ടായത്.
നേരത്തേ എട്ടു രൂപ വരെയായിരുന്നു ഒരു അടയ്ക്കയുടെ വില. ഒരാഴ്ച്ചയ്ക്കിടെ അഞ്ചു രൂപയുടെ വര്‍ധനവാണുണ്ടായത്.
മംഗലാപുരം, മേട്ടുപ്പാളയം, സത്യമംഗലം, ആനമല തുടങ്ങിയ സ്ഥലങ്ങളിലെ അടയ്ക്കയാണ് സംസ്ഥാനത്തെ വിപണികളില്‍ ഇപ്പോള്‍ ലഭിക്കുന്നത്. നാടന്‍ അടയ്ക്കയേക്കാള്‍ വലുപ്പമുണ്ട് എന്നതും ഏത് കാലത്തും ഇവിടങ്ങളില്‍ നിന്നും അടയ്ക്ക ലഭിക്കും എന്നതുമാണ് ഈ പ്രദേശങ്ങളെ വ്യാപാരികള്‍ ആശ്രയിക്കാന്‍ കാരണം.
ചില സ്ഥലങ്ങളില്‍ ശ്രീലങ്കന്‍ അടയ്ക്കയും സുലഭമാണ്. കിലോ 260 രൂപ നിരക്കില്‍ മൊത്തവില്‍പ്പനക്കാര്‍ വാങ്ങുന്ന അടയ്ക്ക എണ്ണിയാണ് ചില്ലറ വില്‍പ്പന.
കാലാവസ്ഥാവ്യതിയാനമാണ് കേരളത്തിലെ അടയ്ക്കാ കര്‍ഷകരെ പ്രതികൂലമായി ബാധിച്ചത്. കാലാവസ്ഥയിലെ മാറ്റം അടയ്ക്ക മൂക്കുന്നതിനും പഴുക്കുന്നതിനും കാലതാമസം വരുന്നത് വിപണിയിലേക്കുള്ള വരവിനെ ബാധിച്ചിട്ടുണ്ട്.
ഏപ്രില്‍, മേയ് മാസത്തോടെ കേരളത്തിലെ അടയ്ക്ക തീര്‍ന്നാല്‍ മറയൂര്‍, കോഴിക്കോട് ഭാഗത്തുനിന്നുള്ള അടയ്ക്ക വിപണിയിലെത്തും. ഓഗസ്റ്റ് പകുതിയോടെ വീണ്ടും നാടന്‍ അടയ്ക്ക എത്തും.
മരത്തില്‍ കയറി അടയ്ക്ക പറിക്കുന്നതിനുള്ള ബുദ്ധിമുട്ടും കൊട്ടപ്പാക്കിനുള്ള പ്രിയവും കാരണം കൂടുതലാളുകളും താഴെവീഴുന്നവ ഉണക്കി തൊണ്ട് പൊളിച്ച് വില്‍ക്കുകയാണ്.
മുമ്പ് മലബാര്‍ മേഖലയിലായിരുന്നു ഇത്തരം അടയ്ക്കയ്ക്ക് ഡിമാന്‍ണ്ടെങ്കില്‍ ഇപ്പോള്‍ മധ്യതിരുവിതാംകൂറിലും ഉണങ്ങിയതാണ് വിപണിയിലെത്തുന്നത്. കൊട്ടപ്പാക്കിന് കിലോയ്ക്ക് 400-ന് മുകളില്‍ വില വന്നിരുന്നു.
കേരളത്തിലെ അടയ്ക്കയുടെ സീസണ്‍ കഴിഞ്ഞാല്‍ തമിഴ്‌നാട്ടിലെ രാജപാളയം, കര്‍ണാടകയിലെ മംഗളൂരു തുടങ്ങിയ സ്ഥലങ്ങളില്‍നിന്നാണ് കേരളത്തിലേക്ക് അടയ്ക്ക എത്തുന്നത്. ഇടുക്കി ജില്ലയിലെ മറയൂരില്‍നിന്നും പഴുത്ത അടയ്ക്ക ലഭ്യമായിരുന്നു. ശക്തമായ മഴയാണ് വില വര്‍ധനയ്ക്ക് കാരണം