ചൈനീസ് വിദേശകാര്യ മന്ത്രിയുമായി ചര്‍ച്ച നടത്തി അജിത് ഡോവല്‍
ബെയ്ജിംഗില്‍ ചൈനീസ് വിദേശകാര്യ മന്ത്രി വാങ് യീയുമായി കൂടിക്കാഴ്ച നടത്തി ദേശീയ സുരക്ഷാ ഉപദേഷ്ടാവ് (എന്‍എസ്എ) അജിത് ഡോവല്‍. ഈ കൂടിക്കാഴ്ചയില്‍, അതിര്‍ത്തി കടന്നുള്ള ഭീകരവാദത്തിന് പാകിസ്ഥാന്‍ നല്‍കുന്ന പിന്തുണയെ പരോക്ഷമായി പരാമര്‍ശിച്ചുകൊണ്ട്, പ്രാദേശിക സമാധാനത്തിനും സുസ്ഥിരതയ്ക്കും വേണ്ടി എല്ലാത്തരം ഭീകരവാദത്തെയും ചെറുക്കേണ്ടതിന്റെ ആവശ്യകത ഡോവല്‍ ഊന്നിപ്പറഞ്ഞു.
പഹല്‍ഗാമില്‍ 26 സാധാരണക്കാര്‍ കൊല്ലപ്പെട്ട ഭീകരാക്രമണത്തിന് മറുപടിയായി മെയ് 7 ന് പുലര്‍ച്ചെ ഇന്ത്യ പാകിസ്ഥാന്‍ അതിര്‍ത്തിയിലെ ഒമ്പത് ഭീകര ക്യാമ്പുകളില്‍ മിന്നലാക്രമണം നടത്തിയതിന് ഏകദേശം ഒന്നര മാസത്തിന് ശേഷമാണ് ഡോവലിന്റെ ഈ പ്രസ്താവന. ഷാങ്ഹായ് സഹകരണ സംഘടനയുടെ (എസ്സിഒ) ഉന്നത ദേശീയ സുരക്ഷാ ഉദ്യോഗസ്ഥരുടെ യോഗത്തില്‍ പങ്കെടുക്കാനാണ് എന്‍എസ്എ ഡോവല്‍ ചൈന സന്ദര്‍ശിക്കുന്നത്. സുരക്ഷാ വിഷയങ്ങളില്‍ ശ്രദ്ധ കേന്ദ്രീകരിക്കുന്ന ഒരു പ്രാദേശിക ഗ്രൂപ്പാണ് എസ്സിഒ.
കിഴക്കന്‍ ലഡാക്ക് അതിര്‍ത്തിയിലെ സംഘര്‍ഷത്തെത്തുടര്‍ന്ന് വഷളായ ബന്ധം മെച്ചപ്പെടുത്താനുള്ള ശ്രമങ്ങള്‍ക്കിടയിലാണ് ഈ കൂടിക്കാഴ്ച നടന്നത്. ഇന്ത്യ-ചൈന ബന്ധത്തിന്റെ വിവിധ വിഷയങ്ങളെക്കുറിച്ചും ഡോവലും വാങും ചര്‍ച്ച ചെയ്തു.
ഇന്ത്യ-ചൈന ബന്ധങ്ങളിലെ സമീപകാല സംഭവവികാസങ്ങള്‍ ഇരുപക്ഷവും വിലയിരുത്തി. ബന്ധങ്ങളുടെ മൊത്തത്തിലുള്ള വളര്‍ച്ച പ്രോത്സാഹിപ്പിക്കേണ്ടതിന്റെ ആവശ്യകത ഇരുവരും ഊന്നിപ്പറഞ്ഞു. ജനങ്ങള്‍ തമ്മിലുള്ള ഇടപെഴകല്‍ വര്‍ദ്ധിപ്പിക്കുന്നതിലൂടെ ഇത് സാധ്യമാക്കാമെന്ന് വിദേശകാര്യ മന്ത്രാലയം (എംഇഎ) അറിയിച്ചു.
ഇന്ത്യ-ചൈന ബന്ധത്തില്‍ ചില നല്ല പുരോഗതി ഉണ്ടായിട്ടുണ്ടെന്നും, ആശയവിനിമയം മെച്ചപ്പെടുത്തുകയും പരസ്പര വിശ്വാസം വളര്‍ത്തുകയും പ്രായോഗിക പ്രശ്‌നങ്ങള്‍ പരിഹരിക്കാന്‍ ശ്രമിക്കുകയും ചെയ്യേണ്ടത് അത്യാവശ്യമാണെന്നും ഇന്ത്യയിലെ ചൈനീസ് പ്രതിനിധി സൂ ഫെയ്ഹോങ് പറഞ്ഞു.