ഷാര്‍ജയിലേക്ക് പോകേണ്ട എയര്‍ ഇന്ത്യ എക്‌സ്പ്രസ് വിമാനം ടേക്ക് ഓഫ് റദ്ദാക്കി
ഷാര്‍ജ:ഷാര്‍ജയിലേക്ക് പോകേണ്ട എയര്‍ ഇന്ത്യ എക്‌സ്പ്രസ് വിമാനം ടേക്ക് ഓഫിന് മിനിറ്റുകള്‍ക്ക് മുമ്പ് യാത്ര റദ്ദാക്കി. കഴിഞ്ഞ ദിവസം ട്രിച്ചി അന്താരാഷ്ട്ര വിമാനത്താവളത്തിലാണ് സംഭവം നടന്നത്. സാങ്കേതിക തകരാര്‍ മൂലമാണ് യാത്ര റദ്ദാക്കിയത്. പത്ത് മണിക്കൂറിന് ശേഷമാണ് യാത്രക്കാര്‍ക്ക് മറ്റൊരു വിമാനം ഏര്‍പ്പാടാക്കിയത്.
എയര്‍ ഇന്ത്യ എക്‌സ്പ്രസിന്റെ ഐഎക്‌സ് 613 വിമാനം കഴിഞ്ഞ ദിവസം രാവിലെ 4.25നാണ് പുറപ്പെടേണ്ടിയിരുന്നത്. 100 യാത്രക്കാരാണ് വിമാനത്തിലുണ്ടായിരുന്നത്. വിമാനം റണ്‍വേയിലെത്തി ടേക്ക് ഓഫിനൊരുങ്ങുന്നതിനിടെയാണ് സാങ്കേതിക തകരാര്‍ ശ്രദ്ധയില്‍പ്പെടുകയും വിമാനം റദ്ദാക്കുകയും ചെയ്തത്.
ട്രിച്ചി വിമാനത്താവളത്തില്‍ നിന്നുള്ള സര്‍വീസ് സാങ്കേതിക തകരാര്‍ മൂലം റദ്ദാക്കിയെന്നും യാത്രക്കാര്‍ക്ക് ഭക്ഷണവും റീഫണ്ടോ, കോംപ്ലിമെന്ററി റീഷെഡ്യൂളിങ്ങോ തിരഞ്ഞെടുക്കാനുള്ള ഓപ്ഷനും നല്‍കിയതായും എയര്‍ ഇന്ത്യ എക്‌സ്പ്രസ് വക്താവ് വ്യക്തമാക്കി.