അബ്ദുല്‍ റഹീം മേയ് മാസത്തോടെ പുറത്തിറങ്ങും, ഒപ്പം നിന്ന് എല്ലാവര്‍ക്കും നന്ദിയെന്ന് നിയമസഹായ സമിതി
സൗദി:സൗദി ജയിലില്‍ കഴിയുന്ന അബ്ദുല്‍ റഹീമിന്റെ മോചനത്തിന് ആശ്വാസം നല്‍കുന്ന വിധിയാണ് കോടതിയില്‍ നിന്ന് ഉണ്ടായതെന്ന് നിയമസഹായ സമിതി. ഒപ്പം നിന്ന് എല്ലാവര്‍ക്കും നന്ദി. ശിക്ഷാ നടപടികള്‍ പൂര്‍ത്തിയാക്കി മേയ് മാസത്തോടെ റഹീം പുറത്തിറങ്ങുമെന്ന് പ്രതീക്ഷിക്കുന്നതായും നിയമസമിതി ഭാരവാഹികള്‍ പറഞ്ഞു
റിയാദിലെ ജയിലില്‍ കഴിയുന്ന കോഴിക്കോട് ഫറോക്ക് സ്വദേശി അബ്ദുറഹീമിന്റെ കേസില്‍ കീഴ് കോടതിയുടെ വിധി ശരിവെച്ച് സൗദി സുപ്രീം കോടതിയുടെ ഉത്തരവ് പുറത്തുവന്നിരുന്നു. അപ്പീല്‍ കോടതിയുടെ വിധിക്കെതിരെ പ്രോസിക്യൂഷന്‍ നല്‍കിയ അപ്പീല്‍ സുപ്രിംകോടതി തള്ളുകയായിരുന്നു.
നേരത്തെ മെയ് 26ന് ഇരുപത് വര്‍ഷത്തെ ശിക്ഷ വിധിച്ച റിയാദിലെ ക്രിമിനല്‍ കോടതിയുടെ വിധി ജൂലൈ 9 ന് അപ്പീല്‍ കോടതി ശരിവെച്ചിരുന്നു. റഹീമിന്റെ മോചനത്തിനായി പ്രവര്‍ത്തിച്ച എല്ലാവര്‍ക്കും നന്ദി അറിയിക്കുന്നതായി നിയമസഹായ സമിതി ഭാരവാഹികള്‍ പറഞ്ഞു
പ്രോസിക്യൂഷന്റെ അപ്പീലിനെതിരെ അബ്ദുറഹീമിന്റെ അഭിഭാഷകരും സുപ്രിംകോടതിയില്‍ അപ്പീല്‍ നല്‍കിയിരുന്നു. സുപ്രീം കോടതിയുടെ വിധി ഏറെ സന്തോഷം നല്‍കുന്നതാണെന്ന് റിയാദിലെ അബ്ദുള്‍ റഹീം നിയമ സഹായ സമിതി കഴിഞ്ഞദിവസം അറിയിച്ചിരുന്നു.