സൗദി അറേബ്യയിൽ നിരോധിത മരുന്ന് കൈവശം വച്ചതിന് പിടിയിലായ വയനാട് സ്വദേശിനിയെ കുറ്റക്കാരിയല്ലെന്ന് കണ്ട് വിട്ടയച്ചു
റിയാദ്: സൗദി അറേബ്യയിൽ നിരോധിത മരുന്ന് കൈവശം വച്ചതിന് പിടിയിലായ വയനാട് അയ്യൻകൊല്ലി സ്വദേശിനി ഫിലോമിനയെ വിട്ടയച്ചു. സൗദിയിൽ നിരോധിച്ച മരുന്നുകൾ കൈവശം വച്ചതുമായി ബന്ധപ്പെട്ടാണ് ഇവരെ കസ്റ്റഡിയിലെടുത്തിരുന്നത്.
എന്നാൽ സൗദി ഫുഡ് ആന്‍റ് ഡ്രഗ് അതോറിറ്റിയുടെയും നാർകോടിക്‌സ് കൺട്രോൾ ഡയറക്‌ടറേറ്റിന്‍റെയും പരിശോധനയിൽ ലഹരി മരുന്നല്ലെന്ന് തെളിയുകയായിരുന്നു.
സംഭവത്തിൽ ഇന്ത്യൻ എംബസിയുടെയും കോൺസുലേറ്റിന്‍റെയും ഇടപെടൽ നടത്തിയിരുന്നു.
മൂന്ന് വർഷമായി റിയാദിലെ കിംഗ് ഫഹദ് ആശുപത്രിയിൽ നഴ്‌സായി ജോലി ചെയ്തുവരികയായിരുന്നു ഫിലോമിന. വാർഷികാവധി കഴിഞ്ഞ് ഈ മാസം പത്തിനാണ് ഫിലോമിന ബംഗളൂരുവിൽനിന്ന് വിമാനമാർഗം ജിദ്ദയിലെത്തിയത്. തുടർന്ന് കണക്ഷൻ വിമാനത്തിൽ റിയാദിലേക്ക് പോകാനായിരുന്നു പദ്ധതി.
ജിദ്ദ വിമാനത്താവളത്തിൽ ഇറങ്ങിയശേഷം രാത്രി എട്ടരയോടെ പിതാവിനും ഭർത്താവിനും ഫിലോമിന ശബ്ദ്‌ദസന്ദേശം അയച്ചിരുന്നു. വിമാനത്താവളത്തിലെ ഉദ്യോഗസ്ഥർ തന്നെ തടഞ്ഞുവച്ചതായി സന്ദേശത്തിൽ അറിയിച്ചിരുന്നു.
തുടർന്ന് കുടുംബാംഗങ്ങളും സാമൂഹിക പ്രവർത്തകരും നടത്തിയ അന്വേഷണത്തിലാണ് ഫിലോമിന സൗദി പോലീസിന്‍റെ കസ്റ്റഡിയിലാണെന്ന വിവരം സ്ഥിരീകരിച്ചത്.