പാലക്കാട് - കോഴിക്കോട് റൂട്ടില് പുതിയ ട്രെയിന്. തിങ്കളാഴ്ച മുതല് പ്രത്യേക തീവണ്ടി താത്കാലികമായി ഓടിത്തുടങ്ങും
പാലക്കാട്/കണ്ണൂര്: പാലക്കാട് - കോഴിക്കോട് പാതയില് പകല് യാത്രാദുരിതത്തിന് താത്കാലികമായി ഒരു പരിഹാരം എത്തിയിരിക്കുകയാണ്. തിങ്കളാഴ്ച മുതല് പ്രത്യേക തീവണ്ടി താത്കാലികമായി ഓടിത്തുടങ്ങും.
രാവിലെ 10.10-ന് കോഴിക്കോട്ടുനിന്ന് അണ്റിസര്വ്ഡ് എക്സ്പ്രസ് സ്പെഷ്യലായി ഓടിത്തുടങ്ങുന്ന വണ്ടി ഉച്ചയ്ക്ക് 1.05-ന് പാലക്കാട്ടെത്തും. തിരികെ 1.50-ന് പുറപ്പെടും. 23 മുതല് സെപ്തംബര് 15 വരെ ഈ വണ്ടി ഓടുമെന്നാണ് ടൈംടേബിളില് സൂചിപ്പിച്ചിട്ടുള്ളത്.
അതേസമയം പകല് 11.30നും നാലിനുമിടയില് പാലക്കാടിനും കോഴിക്കോടിനുമിടയ്ക്ക് പകല് വണ്ടികളില്ല എന്ന പരാതിക്ക് വര്ഷങ്ങളുടെ പഴക്കമുണ്ട്. കണ്ണൂര്-ഷൊര്ണൂര് അണ്റിസര്വ്ഡ് സ്പെഷലാണ് പാലക്കാട്ടേക്കെത്തുന്നത്.
കോഴിക്കോടിനും പാലക്കാടിനുമിടയില് ഫറോക്ക്, പരപ്പനങ്ങാടി, താനൂര്, തിരൂര്, കുറ്റിപ്പുറം, പട്ടാമ്പി, ഷൊര്ണൂര്, ഒറ്റപ്പാലം എന്നിവിടങ്ങളില് സ്റ്റോപ്പുണ്ടാവും. ശനിയാഴ്ചയൊഴികെ എല്ലാ ദിവസവും പാലക്കാട്ടെത്തുന്ന വണ്ടി ശനിയാഴ്ചകളില് ഷൊര്ണൂര് വരെ മാത്രമേ ഉണ്ടാവൂ.
നാലു നമ്പറുകളിലാണ് വണ്ടി സര്വീസ് നടത്തുക. 18 കോച്ചുകളാണ് ഉള്ളത്. വൈകുന്നേരം എറണാകുളത്തുനിന്ന് ഷൊര്ണൂര് വരെയെത്തുന്ന മെമു വണ്ടി പ്രത്യേകവണ്ടിയായി നിലമ്പൂര് വരെ നീട്ടുന്ന കാര്യവും പരിഗണനയിലുണ്ട്.