വീട്ടമ്മയെ വീടിനുള്ളിൽ ദുരൂഹസാഹചര്യത്തിൽ മരിച്ചനിലയിൽ കണ്ടെത്തി. മൃതദേഹം കണ്ടത് ജോലി കഴിഞ്ഞ് വീട്ടിലെത്തിയ മകൻ. മുഖത്ത് മുണ്ട് ചുറ്റിയ നിലയിലും അതിനുമുകളിലായി തലയിണവച്ച നിലയിലുമായിരുന്നു മൃതദേഹം

തൊടുപുഴ: കരിങ്കുന്നം നേടിയശാലയിൽ വയോധികയെ വീടിനുള്ളിൽ ദുരൂഹസാഹചര്യത്തിൽ മരിച്ച നിലയിൽ കണ്ടെത്തി. തോട്ടപ്പുറത്തു വീട്ടിൽ പരേതനായ കുമാരന്‍റെ ഭാര്യ പദ്മാവതിയാണ് (72) മരണപ്പെട്ടത്.

ശനിയാഴ്ച വൈകുന്നേരം 6:50-ഓടെ ജോലി കഴിഞ്ഞ് വീട്ടിലെത്തിയ മകൻ ശരത്താണ് മുറിക്കുള്ളിൽ മൃതദേഹം ആദ്യം കണ്ടത്. പദ്മാവതിയുടെ മുഖത്ത് മുണ്ട് ചുറ്റിയ നിലയിലും അതിനുമുകളിലായി തലയിണവച്ച നിലയിലുമായിരുന്നുവെന്ന് മകൻ പൊലിസിന് മൊഴി നൽകി.

ഇവർ കഴുത്തിൽ അണിഞ്ഞിരുന്ന രണ്ട് പവന്‍റെ സ്വർണമാല കാണാനില്ലെന്നും പരാതിയിലുണ്ട്. വിവരമറിഞ്ഞ് സ്ഥലത്തെത്തിയ കരിങ്കുന്നം പൊലിസ് കേസ് രജിസ്റ്റർ ചെയ്യുകയും മേൽനടപടികൾ സ്വീകരിക്കുകയും ചെയ്തു