കര്‍ണാടക വോട്ടര്‍പട്ടികയില്‍ സ്വയം മരണം സാക്ഷ്യപ്പെടുത്തി 37 പേര്, പരസ്പരം കൊന്ന് 334 ജോഡികള്‍, വെട്ടിലായത് തിരഞ്ഞെടുപ്പ് കമ്മിഷന്‍
ബെംഗളൂരു: വോട്ടര്‍പട്ടികയില്‍ നിന്ന് പേര് നീക്കം ചെയ്യാന്‍ അപേക്ഷ നല്‍കിയത് ജീവിച്ചിരിക്കുന്ന അതേ വോട്ടര്‍മാര്‍, കാരണമായി ചൂണ്ടിക്കാട്ടിയത് സ്വന്തം മരണവും. കര്‍ണാടകയിലെ വോട്ടര്‍പട്ടിക പ്രത്യേക തീവ്ര പുനഃപരിശോധനയില്‍ കണ്ടെത്തിയ ഈ വിചിത്രമായ ക്രമക്കേട് തിരഞ്ഞെടുപ്പ് കമ്മിഷന്‍ ഉദ്യോഗസ്ഥരെപ്പോലും ഞെട്ടിച്ചിരിക്കുകയാണ്.
സംസ്ഥാനത്ത് 37 വോട്ടര്‍മാര്‍ തങ്ങള്‍ 'മരിച്ചുപോയി' എന്ന് കാണിച്ച് പേര് വെട്ടാന്‍ സ്വന്തം പേരില്‍ത്തന്നെ അപേക്ഷ നല്‍കിയപ്പോള്‍, 334 ജോഡി വോട്ടര്‍മാര്‍ (ആകെ 668 പേര്) പരസ്പരം മരിച്ചവരാണെന്ന് കാണിച്ച് എതിര്‍പ്പുകള്‍ ഫയല്‍ ചെയ്തു. കേന്ദ്ര തിരഞ്ഞെടുപ്പ് കമ്മിഷന്റെ രേഖകള്‍ വിശകലനം ചെയ്ത് 'മാന്‍ഡേറ്റ് അനലിറ്റിക്‌സ് ആന്‍ഡ് കണ്‍സള്‍ട്ടിങ്' നടത്തിയ പഠനം ഉദ്ധരിച്ച് 'ദി ഹിന്ദു' ആണ് ഇക്കാര്യം റിപ്പോര്‍ട്ട് ചെയ്തത്.
ഒരാള്‍ മരിക്കുകയോ താമസം മാറുകയോ ചെയ്താല്‍ വോട്ടര്‍പട്ടികയില്‍ നിന്ന് പേര് ഒഴിവാക്കാന്‍ സമര്‍പ്പിക്കേണ്ടത് 'ഫോം-7' ആണ്. എന്നാല്‍, കര്‍ണാടകയില്‍ ലഭിച്ച 37 അപേക്ഷകളില്‍ അപേക്ഷകന്റെ പേരും ഒഴിവാക്കേണ്ട ആളുടെ പേരും ഇനീഷ്യല്‍ അടക്കം ഒന്നാണ്. ഇവര്‍ സ്വന്തം മരണകാരണം കാണിച്ചാണ് ഫോം സമര്‍പ്പിച്ചിരിക്കുന്നത്. ജൂണ്‍ 30-ന് ആരംഭിച്ച എസ്.ഐ.ആര്‍ പ്രക്രിയയ്ക്ക് മുന്‍പാണ് ഇത്തരം ഭൂരിഭാഗം അപേക്ഷകളും സമര്‍പ്പിക്കപ്പെട്ടത്. സെപ്റ്റംബര്‍ 17-നും 26-നും ഇടയില്‍ മഗാഡി, സണ്ടൂര്‍, ബ്യാട്ടരായണപുര മണ്ഡലങ്ങളില്‍ നിന്ന് ലഭിച്ച ഇത്തരം മൂന്ന് അപേക്ഷകള്‍ കരട് വോട്ടര്‍പട്ടികയിലും ഉള്‍പ്പെട്ടിട്ടുണ്ട്.
സോഫ്റ്റ് വെയറിലെ തകരാറുകളോ ഡാറ്റാബേസ് പിഴവുകളോ ആകാം ഇതിന് കാരണമെന്നാണ് ഉദ്യോഗസ്ഥരുടെ പ്രാഥമിക വിശദീകരണം. പലയിടത്തും ബി.എല്‍.ഒമാര്‍ ഇത്തരമൊരു അപേക്ഷയെക്കുറിച്ച് അറിഞ്ഞിട്ടുപോലുമില്ല.
ഒരേ പോളിങ് സ്റ്റേഷനില്‍ രജിസ്റ്റര്‍ ചെയ്ത 668 വോട്ടര്‍മാര്‍ പരസ്പരം മരിച്ചതായി രേഖപ്പെടുത്തി ഫോം-7 നല്‍കിയതാണ് മറ്റൊരു വിചിത്ര സംഭവം. ഒരാള്‍ മറ്റൊരാള്‍ മരിച്ചുവെന്ന് കാണിച്ച് അപേക്ഷ നല്‍കുമ്പോള്‍, രണ്ടാമത്തെയാള്‍ തിരിച്ചും എതിര്‍പ്പ് ഫയല്‍ ചെയ്യുകയായിരുന്നു.
25-ലധികം ജില്ലകളിലായി ഇത്തരം 334 ജോഡി കേസുകള്‍ റിപ്പോര്‍ട്ട് ചെയ്തിട്ടുണ്ട്. ജൂണ്‍ 16-ന് പട്ടിക മരവിപ്പിക്കുന്നതിന് തൊട്ടുമുമ്പ്, ജൂണ്‍ മാസത്തില്‍ മാത്രം ഇത്തരം 333 കേസുകള്‍ ഫയല്‍ ചെയ്യപ്പെട്ടു.