തുമ്പച്ചി കുരിശുമലയില്‍ തീര്‍ത്ഥാടനം 27 വരെ
മൂലമറ്റം: പാലാ രൂപതയിലെ പ്രധാന തീര്‍ത്ഥാടന കേന്ദ്രങ്ങളിലൊന്നായ അറക്കുളം തുമ്പച്ചി കുരിശുമലയില്‍ ഈ വര്‍ഷത്തെ തീര്‍ത്ഥാടനം 27 വരെ നടക്കുമെന്ന് സെന്റ് മേരീസ് ദൈവാലയ വികാരി ഫാ. മൈക്കിള്‍ കിഴക്കേപറമ്പില്‍, സഹവികാരി ഫാ. ജോര്‍ജ് ഞാറ്റുതൊട്ടിയില്‍ എന്നിവര്‍ അറിയിച്ചു.
വലിയ നോമ്പിലെ എല്ലാ വെള്ളിയാഴ്ചകളിലും രാവിലെ 6.30 ന്ഗദ്സമേനിയില്‍നിന്ന് മലമുകളിലേക്ക് കുരിശിന്റെ വഴിയും തുടര്‍ന്ന് വിശുദ്ധ കുര്‍ബാനയും നടന്നുവരുന്നു.
നാല്‍പതാം വെള്ളിയിലെ കുരിശിന്റെ വഴിയെത്തുടര്‍ന്ന് ഫാ. ജേക്കബ് കടുതോട്ടില്‍ ആഘോഷമായ വിശുദ്ധ കുര്‍ബാനയര്‍പ്പിച്ചു. വചനസന്ദേശം ഫാ. ജോസഫ് കുറ്റിയാങ്കല്‍ നടത്തി. ഏപ്രില്‍ 18ന് ദുഃഖവെള്ളിയാഴ്ച രാവിലെ ആറിന് ഇടവക ദൈവാലയത്തില്‍ തിരുക്കര്‍മങ്ങള്‍. തുടര്‍ന്ന് എട്ടിന് നൂറുകണക്കിന് വിശ്വാസികള്‍ പങ്കെടുക്കുന്ന ഭക്തിനിര്‍ഭരമായ കുരിശിന്റെ വഴി അറക്കുളം അശോക കവലയില്‍നിന്നും മെയിന്‍ റോഡിലൂടെ തുമ്പച്ചിയിലേക്ക് നടത്തപ്പെടും.
11 മണിക്ക് സമാപന പ്രാര്‍ത്ഥനയെത്തുടര്‍ന്ന് റവ. ഡോ. വില്‍സണ്‍ ജോസഫ് കദളിക്കാട്ടില്‍ പുത്തന്‍പുര (ഡയറക്ടര്‍ ജനറല്‍ എംഎസ്ടി) പീഡാനുഭവസന്ദേശം നല്‍കും, പുതുഞായര്‍ ദിവസങ്ങളിലും തുമ്പച്ചിയില്‍ തിരുക്കര്‍മങ്ങള്‍ ഉണ്ടായിരിക്കും.