സെപ്റ്റംബര്‍ 21-ന് അന്താരാഷ്ട്ര ശാന്തി ദിനമായി ആചരിക്കുന്നു
സെപ്റ്റംബര്‍ 21-ന് അനുവര്‍ഷം അന്താരാഷ്ട്രസമാധാന ദിനം ഐക്യരാഷ്ട്രസഭയുടെ ആഭിമുഖ്യത്തില്‍ ആചരിക്കുന്നു.
''സമാധാനം വാഴുന്ന ഒരു ലോകത്തിനായി ഇപ്പോള്‍ കര്‍മ്മനിരതരാകൂ'' എന്നതാണ് ഈ ദിനാചരണത്തിന്റെ ഇക്കൊല്ലത്തെ വിചിന്തന പ്രമേയം.
സമാധാനത്തിനായി പ്രവര്‍ത്തിക്കാന്‍ സര്‍ക്കാരിനോ സംഘടനകള്‍ക്കോ മാത്രമല്ല ഓരോരുത്തര്‍ക്കുമുള്ള വിളിയെക്കുറിച്ച് ഓര്‍മ്മിപ്പിക്കുന്നതാണ് ഈ പ്രമേയം.
യുദ്ധത്തിന്റെ ക്രൂരതയ്ക്കും അപമാനങ്ങള്‍ക്കുമിടയില്‍, ലോകമെമ്പാടും ജീവിതങ്ങള്‍ തകര്‍ക്കപ്പെടുകയും ബാല്യങ്ങള്‍ ഇല്ലാതാക്കപ്പെടുകയും, മൗലികമായ മാനവാന്തസ്സ് ചവിട്ടിമെതിക്കപ്പെടുകയുമാണെന്ന് ഐക്യരാഷ്ട്രസഭയുടെ കാര്യദര്‍ശി അന്തോണിയൊ ഗുട്ടേരെസ് പറയുന്നു.
1981 നവംബര്‍ 30-നാണ് ഐക്യരാഷ്ട്രസഭയുടെ പൊതുസമ്മേളനം സെപ്റ്റംബര്‍ 21 അന്താരാഷ്ട്രസമാധാന ദിനമായി പ്രഖ്യാപിച്ചത്.
വിശ്വശാന്തിയെക്കുറിച്ചുള്ള അവബോധം വളര്‍ത്തുന്നതിനായി വിദ്യാഭ്യാസ പ്രവര്‍ത്തനങ്ങള്‍ പരിപോഷിപ്പിക്കുന്നതില്‍ ഈ അന്താരാഷ്ട്രദിനത്തില്‍ സവിശേഷമാം വിധം ശ്രദ്ധ കേന്ദ്രീകരിക്കാന്‍ ഐക്യരാഷ്ട്രസഭ അംഗരാജ്യങ്ങളോടും, സര്‍ക്കാര്‍ - സര്‍ക്കാരിതര സംഘടനകളോടും, വ്യക്തികളോടും ആവശ്യപ്പെടുന്നു.